Maraka 5 - ALLALA KUMƐ

Nyina-Yogoma-Tigi Lakɛndɛya-Koe Yisa Bolo

¹ Nba, anu ke Kalili dalɛ kɔgɔma, Kadara kɛnuna nyamanɛ rɔ, kɔni,

² Yisa bɔra kulɔn rɔ nya min wo, kei do ya a taran nyɔ ka bɔ kaburu-soe burɔ. Nyina-yogomɛ bilanɛ kei wo fɛ.

³ A ara kaburu-soe ma a ki tinɛ la. Mɔgɔ-wo-mɔgɔ ti ke a kirila hali yɔlɔkɛ la tun.

⁴ Anu ba a bolenu anubɛ a kiannu nakiri, a si yɔlɔkɛnu tɛgɛ. Nɛgɛ min bi a kian ma, a si wonu takeri. Mɔgɔ-wo-mɔgɔ ti ke a marala tun!

⁵ Su-ni-tele, a ye kaburu-soenu burɔ anubɛ kɔnkɛnu tɛma. A ye gbele-gbelenna ka a nyɛrɛ matɛgɛtɛgɛ kuri la.

⁶ Nyinatoe wo ya Yisa yen wula-yan la tumɛ min, a burimatoe nara a nyɛnkin Yisa kɔrɔ.

^7-8 Yisa ya a fɔ nyinɛ wo ye ko, “Nyina-yogomɛ, bɔ kei kɛ fɛ!” A gbele-gbelenta a kulu-mayɛlɛnɛ la ko, “Alla min bi Fan Bɛɛ Kun Na, wola dan Yisa, i ye nyinina nfen ma n bolo? I keli ko i ti n tɔrɔ!”

⁹ Woletɔ Yisa ya a manyinika ko, “I tɔgɛ ye kama?” Nyinɛ wo ya a yabi ko, “N tɔgɔ le Nyama bawo ma siya!”

¹⁰ A tora Yisa madiyala ko a kana anu gben nyamanɛ wo rɔ.

¹¹ Nba, kɔsɔ-mɛlan donu bi nyɔ dafɛ. Anu bi anu de-nyinina kɔnkɔ-kerikerinya ma.

¹² Nyinɛnu ya Yisa madiya ko, “I ni ma lata kɔsɛnu tɛma alako ma ni don anu tɔ.”

¹³ A sɔnta wo ma. Nyina-yogomɛ wonu bɔra kei wo fɛ ka don kɔsɛnu tɔ. Kɔsɔ-kurɔn wo bɛɛ burimatoe yigira kɔnkɔ-kerikerinya la ka yigi dalɛ rɔ. Kɔsɔ-kurɔn minnu tora-a-rɔ yi rɔ, wonu mumɛ si waga fila nyɔgɔn bɔ.

¹⁴ Kɔsɔ-kandannɛ wonu burimatoe tara ka koe wo nyɛnsɛn soe anubɛ sɛnɛnu tɔ. Koe minnu bara ma, mɔgɛnu tara wo ragbɛ tinɛ.

¹⁵ Anu ke Yisa wara, anu ya kei wo yen, nyina-nyama ye min fɛ nun, a siginɛ, kurɛ ye a ma. A hɛnkili ma ara sɔ. Nba, anu dama kun makɔra.

¹⁶ Min kɛra nyinato-kɔrɛ wo ye anubɛ min kɛra kɔsɛnu na, minnu ya wo yen, wonu ya wo fɔ mɔgɛnu ye.

¹⁷ Wo le ya a ma, anu burunta Yisa madiyala ko a ni bɔ anuta nyamanɛ rɔ.

¹⁸ Yisa ye donna kulɔn rɔ tumɛ min, nyinato-kɔrɛ ya a madiya ko, “N fa, sɔn, n ni ta i fɛ!”

¹⁹ Kɔnɔ Yisa ma sɔn a ta-koe ma fɔ ka a fɔ a ye ko, “Sɛgi ila denbayɛ wara. Mari ara ko-nyimɛ min kɛ i ye, i ni wo fɔ anu ye.”

²⁰ Nba, so-kun-tan minnu bi nyɔla foolɛ rɔ, nyinato-kɔrɛ wo tara wo bɛɛ rɔ. Yisa ya min kɛ a ye, a ya wo bɛɛ fɔ anu ye. Min bɛɛ ya wo lamɔɛn, wonu dama kawara kati!

Yairasila Dunmusi anubɛ Musu-Kirayatoe

²¹ Yisa sɛgira dalɛ kɔgɔma tun. Nyama-belebele kinkinta Yisa la dalɛ dafɛ nyɔ.

²² Yahudiya dina-bon-kun-tigi Yairasi nara. A ya Yisa yen tumɛ min, a ya a sa a kin kɔrɔ

²³ ka a madiya a sɛbɛ-kuna-wɛ la! A ko, “Nna dunmusu fagamatoe le! I yandi, na. I ni i kɔɛn sa a kuma alako a si kɛndɛya nya min!”

²⁴ Yisa bilara a fɛ, ado mɔgɔ siyaman gbɛrɛnnɛ a ma a tɔnkɔn bɛɛ rɔ.

²⁵ Musi do taranta nyɔ min bara tɔrɔ san tan-ni-fila kɔrɔ musinuna kirayɛ bolo.

²⁶ Bɛsi-bɔla siyaman ya a mafɛlɛn, ado anu bara ala wodi bɛɛ ban kɔnɔ a ti fisaya fɔ ka to tagbayala wati bɛɛ.

²⁷ A ya Yisa wara-koe lamɔɛn min kɛ nun, a nara sɔ Yisa kɔma nyama tɛma ka a bole tugu ala duruki la.

²⁸ A miriya ko, “Ni n ya n bole tugu ala duruki la dɔrɔn, n si kɛndɛya.”

²⁹ A ya a bole tugu ala duruki la nya min wo, ala musu-kirayɛ banta kelenna! A ya a lɔn a fɛrɛ rɔ ko a ara kɛndɛya ka bɔ ala tɔrɔyɛ rɔ.

³⁰ Tiriyante wo rɔ, Yisa ya a lɔn ko sɛnbɛ do ara bɔ a rɔ. Woletɔ a ya a tintan nyama la. A ko, “Yon magara nna duruki la?”

³¹ Ala karan-dannu ya a yabi ko, “I ma mɔgɛnu gbɛrɛnnɛ yen i ma? I ye nyinikalɛ sala kama worɔ ko yon magara ila duruki la?”

³² Kɔnɔ Yisa tora a yɛ lakalanna alako min ya wo ma, a si wo yen nya min.

³³ Bawo musi ya a lɔn min kɛra a ye, a yɛrɛyɛrɛnmatoe nara kilan la a bolo ka a sa Yisa kin kɔrɔ. A ya tonyɛ bɛɛ fɔ a ye.

³⁴ Yisa ya a fɔ musi wo ye ko, “N na, ila dɛnkɛninyɛ ara i lakɛndɛya. Ta yisi-kimɛ rɔ. Ila kirayɛ ara ban i rɔ.”

³⁵ Yisa ye wo fɔla tumɛ min, mɔgɛ donu nara kilayɛ la ka bɔ Yairasila bɔn la. Wonu ya a fɔ Yairasi ye ko, “Ila dunmusi ara faga. Hali i ma karan-mɔgɔ tɔrɔ tun!”

³⁶ Anu ya min fɔ, Yisa ma a tole masɔ wo la fɔ ka a fɔ Yairasi ye ko, “I kana kilan. Dɛnkɛninya tun!”

³⁷ A ma sɔn mɔgɔ-gbɛrɛ ni bila a fɛ fɔ Pita anubɛ Yemesi anubɛ Yemesi na-kelen-nyɔgɛ, Yɔni.

³⁸ Anu ke kun-tigi wola bɔn la, Yisa ya sɔnkɔ-sɔnkɔ taran nyɔ. Mɔgɛnu gbele-gbelen-kan ye bɔla a nya-su bɛɛ ma.

³⁹ Yisa donta bɔn la ka a fɔ anu ye ko, “Sɔnkɔ-sɔnkɛ kɛ bɛɛ kunyɛ ye nfen na? Wo ye dila nfenna? Dunmusu kɛ ma faga. A ye kinɔgɔ le tɔ dɔrɔn!”

⁴⁰ Anu dama ya Yisa-mayɛlɛn dabira. Woletɔ a ya anu dama labɔ fɔ dennɛ wo na anubɛ a fa anubɛ ala karan-den sawɛ. Anu donta bɔn la, furi sanɛ kan min.

⁴¹ A ya a bira a bole ma ka a fɔ a ye ko, “Dunmusu-nɛ, n bi a fɔla i ye, i lasɔ!”

⁴² A ya a lasɔ tiriya ka tagama dabira. (A sɔrɔn ara san tan-ni-fila bɔ nun.) Kabana-koe wo kɛra tumɛ min, anu kawara kati!

⁴³ Kɔnɔ Yisa ya a magbɛlɛya anu ye ko anu kana a fɔ mɔgɔ-wo-mɔgɔ ye. A ko, “Wo ni dɔn-fen di a ma.”