Maraka 3 - ALLALA KUMƐ

Kei Bolo Faganɛ Lakɛndɛya-Koe

¹ Wo kɔma, Yisa sɛgira Yahudiya-dina-bɔn la. Kei do ye nyɔ, a bole faganɛ a la.

² Mɔgɛ donu fanan bi nyɔ minnu bi a fɛ ka Yisa maburi tɔn tinyana. Woletɔ anu ya anu yɛ bɛn a ma, ni a si kei wo lakɛndɛya Sulen-Tele ma.

³ Yisa ya a fɔ kei bolo-faganɛ ye ko, “Na, i sɔ mɔgɛ bɛɛ yala yan.”

⁴ Wo kɔma, a ya mɔgɛnu manyinika ko, “Mala tɔn ko kama? Ma ni nfen ma Sulen-Tele ma, ma ni mɔgɔ dɛnbɛ, ka, ma ni mɔgɔ tɔrɔ? Ma ni mɔgɔ niyi lakanan, ka, ma ni a halaki?” Kɔnɔ anu ya a sigi-a-la don!

⁵ Yisa ya anu dama mafɛlɛn. A diminyara anu ma kɔnɔ a kinikinita anu ma fanan anuna yisi-gbɛlɛyɛla ko la. A ya a fɔ kei wo ye ko, “I ni i bole rasagan.” A ya a bole rasagan nkɛkuna, a kɛndɛyara kelenna!

⁶ Tiriyante wo rɔ, Farisinu anubɛ Mansa Hɛrodila bila-fɛ-mɔgɛ donu tara anu kun nayigi alako anu si Yisa faga-koe rabɛn nya min.

Nyama Ladɛn-Koe Kalili Dalɛ Dafɛ

⁷ Yisa anubɛ ala karan-dannu tara Kalili dalɛ dafɛ. Nyama-belebele bilara a fɛ. Wonu bɔra Kalili sigisɔn rɔ anubɛ Yudiya nyamanɛ rɔ

⁸ anubɛ Yerusalɛm soe burɔ anubɛ Aidumɛya nyamanɛ rɔ. Donu bɔra Yorodan bɛ kɔgɔma anubɛ so-mɛsɛ minnu bi Taya anubɛ Saidonla foolɛ rɔ. Yisa ya koe minnu kɛ nun, nyama-belebele wonu ya wo lamɔɛn min kɛ, anu nara a wara.

⁹ Nyama wo siya min kɛ, Yisa ya a fɔ ala karan-dannu ye ko anu ni kulɔn rabɛn a ye. A ya wo ma alako mɔgɛnu kana a ragbɛrɛn.

¹⁰ A ara mɔgɔ siyaman nakɛndɛya nun min kɛ, kirayatoe bɛɛ tora anu nyɔgɔn matuntunna alako anu si anu bole tugu a la nya min.

¹¹ Nba, nyina-yogomɛnu bi mɔgɛ minnu fɛ, wonu ba Yisa yen tuma-wo-tuma, anu si bui a kɔrɔ ka gbele-gbelen ko, “Allala dan le ile la!”

¹² Yisa ya a fɔ nyina-yogomɛnu ye a sɛbɛ-kuna-wɛ la ko anu kana a wara-koe fɔ.

Kilaya Tan-ni-Filɛ Yabɔ-Koe

¹³ Lunyɛ do, Yisa yɛlɛta kɔnkɛ do kuma tumɛ min, a ye nyinina mɔgɛ minnu ma, a ya wonu kele a wara. Anu nara tumɛ min,

¹⁴ a ya mɔgɔ tan-ni-fila yabɔ anu tɔ ka anu ma kilayɛnu na. A ya a fɔ anu ye ko, “N bara wo yabɔ alako wo si to n fɛ nya min. N si wo lata fanan ko anu ni kawandili bɔ mɔgɛnu ye,

¹⁵ ado wo si sɛnbɛ sɔrɔn ka nyinɛnu gben mɔgɛnu fɛ.”

¹⁶ A ya mɔgɔ tan-ni-filɛ minnu yabɔ, wonu denu denu bi kɛnu na, Saimon wo (Yisa ya min kele fanan ko Pita),

¹⁷ anubɛ Sɛbɛdila dannu Yemesi anubɛ Yɔni wo (Yisa ya minnu kele fanan ko, “San-gbalamɛla dannu”),

¹⁸ Anduru wo, Filipi wo, Batalamiyu wo, Matiyu wo, Tamasi wo, Alifala den Yemesi wo, Tadiyasi wo, Saimon wo (min si kɛlɛ kɛ ata nyamanɛla ko la)

¹⁹ anubɛ Yudasi-Isakariyati min ya Yisa don a yogenu bolo tɔ.

Yisa anubɛ Biyɛsiba

²⁰ Wo kɔma, Yisa tara a yiyɛ la. Nyama-belebele ya anu nadɛn tun ha Yisa anubɛ ala karan-dannu ma fɛrɛ sɔrɔn hali ka fen dɔn.

²¹ A warɛ-mɔgɛnu ya wo lamɔɛn tumɛ min, anu tara a bi tinɛ bawo anu miri ko a ara yuwaya!

²² Tɔn-karan-mɔgɛ minnu nara ka bɔ Yerusalɛm, wonu bi a fɔla ko, “Biyɛsiba min bi nyina-kun-tigiyɛ la, wo le ye Yisa fɛ!” Donu ko, “Setanɛ min bi nyina-mansɛ la, wo le ara nyina-gben-sɛnbɛ di a ma.”

²³ Yisa ya mɔgɛnu kele a wara ka tili kɛ tɛgɛ anu ye. A ko, “Setanɛ si ke Setanɛ gbenna, wa?

²⁴ Ni mɔgɛnu bi anu nyɔgɔn kɛlɛla nyamani-wo-nyamani rɔ, wo nyamanɛ ti mɛ.

²⁵ Ni kɛlɛ donta denbayɛ min tɛma, denbayɛ wo ti mɛ nyɛnsɛnna.

²⁶ Woletɔ ni Setanɛ ya Setanɛ kɛlɛ, ala mansayɛ si mɛ kama? A si tinya ka ban.

²⁷ “Mɔgɔ-wo-mɔgɔ ti ke sɛnbɛ-tigila bɔn tinyana ka a bolo-fannu bi fɔ ni a ya sɛnbɛ-tigi wo kiri fɔlɔn. Wo kɔma, a ni bon-burɔ-fannu bi.

²⁸ “Wo ni wo hɛnkili to kɛ ko! Mɔgɛnu bi hakɛ min bɛɛ kɛla anubɛ anu bi kuma-yogomɛ min bɛɛ fɔla, anu ma si koto wo bɛɛ la.

²⁹ Kɔnɔ mɔgɔ-wo-mɔgɔ min bi kuma-yogomɛ fɔla Allala Ni-Sɛnimɛ ma, a ma ti koto bi, a ma ti koto habadan!”

³⁰ Yisa ya kɛ fɔ bawo mɔgɛ donu ko, “Nyina-yogomɛ le ye a fɛ.”

Yisa Na anubɛ A Dɔgɛnu Bara-Koe

³¹ Yisa na anubɛ a dɔgɛnu nara. Anu sɔnɛ tora luyi ma. Anu ya mɔgɛ do sɔ Yisa kele tinɛ.

³² Yisa lafoonɛ nyama la. Anu ya a fɔ a ye ko, “I na anubɛ i dɔgɛnu bi luyi ma. Anu bi i yen-koe rɔ.”

³³ Yisa ya anu yabi ko, “N na ye yon na? N dɔgɛnu bi yonnu na?”

³⁴ Minnu siginɛ a dafɛ, a ya wonu mafɛlɛn. A ko, “N na anubɛ n dɔgɛnu denu bi kɛnu na!

³⁵ Minnu bi Alla diyana-koe kɛla, n na-kelen-nyɔgɛ anubɛ n na le wonu na.”