Maraka 16 - ALLALA KUMƐ

Yisa Lawuli Koe

¹ Sulen-Tele tenbira tumɛ min, Mariyama, Magadala kɛ anubɛ Yemesi na Mariyama anubɛ Salomi, wonu ya fen-suma-diyamɛ san alako nun anu ni ta a kɛ Yisa furi ma.

² Lɛhɛrɛ subaga-dɛ ma, sun-tele-fɛran, kɔni, anu tara kanbɛ dɛ la.

³ Anu bi tala tumɛ min, anu ya anu nyɔgɔn manyinika ko, “Yon si farɛ makuru-kurun ka a bɔ kanbɛ dɛ la ma ye?”

⁴ Nba, anu ya anu yɛ layɛlɛ nyɔ rɔ tumɛ min, anu ya a taran, fara-belebele wo makuru-kurunnɛ ka bɔ kanbɛ dɛ la.

⁵ Woletɔ anu donta kanbɛ burɔ. Duruki-gbɛ bilanɛ fonike do kan na, anu ya wo yen siginɛ a bolo-nyimɛ wara la. Anu kawara kati!

⁶ Ale fonike ko, “Wo kana kawa. Wo ye Yisa, Nasarɛti kɛ le nyinina min gbangbanta kɔlɔma ma nun. Kɔnɔ a sa yan. A la ara wuli! Anu ya a sa kan min, wo le kɛ la. Wo ni a mafɛlɛn.

⁷ Nba, wo ta a fɔ ala karan-dannu ye anubɛ Pita fanan ko a ye tala Kalili wo yarɔ. Wo si a yen nyɔ rɔ iko a ya a fɔ wo ye nya min.”

⁸ Kɛ lamɔɛn anu bolo, anu burimatoe bɔra kanbɛ dɛ la, anu bi yɛrɛyɛrɛna kilan bolo. Anu ma fenfen fɔ mɔgɔ-wo-mɔgɔ ye bawo anu kilannɛ. [

Yisa Bɔ-Koe Gbɛ rɔ Mariyama Magadala Kɛ Ye

⁹ Yisa wulita tumɛ min ka bɔ furinu tɛma Lɛhɛrɛ sɔgɔma, a bɔra gbɛ rɔ Mariyama Magadala kɛ fɔlɔn ye, a ya nyina wɔrɔnfilɛ gben min fɛ, kɔni.

¹⁰ Wo tara a fɔ a ta-nyɔgɛnu ye. A ya a taran, wonu bi dila.

¹¹ Nba, anu ya kumɛ wo lamɔɛn tumɛ min ko Yisa ye a kɛndɛ la, ado a ara a yen, anu ma la a la.

Yisa Bɔ-Koe Gbɛ rɔ Karan-Den Fila Ye

¹² Wo kɔma, Yisa bɔra gbɛ rɔ nya-gbɛrɛ ma mɔgɔ fila ye, wo tumɛ anu bi kilɛ la.

¹³ Anu sɛgira ka wo fɔ anu ta-nyɔgɛnu ye kɔnɔ wonu fanan ma la a la.

Yisa Bɔ-Koe Gbɛ rɔ Karan-Den Tan-ni-Kelan Ye

¹⁴ A laban, Yisa bɔra gbɛ rɔ ala karan-den tan-ni-kelan ye, anu bi anu de-nyinina tumɛ min. A ya anu makuma anuna dɛnkɛninyabɛlitayɛ anubɛ anuna tolo-gbɛlɛyɛla ko la bawo minnu ya a nimɛ yen, anu ma la wonuna sereyɛ la.

¹⁵ A ya a fɔ anu ye ko, “Wo ta duninya kan tinɛ bɛɛ rɔ ka kibara-nyimɛ lake mɔgɛ bɛɛ ma.

¹⁶ Min ba dɛnkɛninya ka batasi, wo si kisi. Kɔnɔ min ti dɛnkɛninya, wo si halaki.

¹⁷ Tamasere-sɛnbɛmɛ kɛnu si taran dɛnkɛninya-mɔgɛnu fɛ. Anu si nyinɛnu gben n tɔgɛ rɔ. Anu si kan-gbɛrɛnu fɔ.

¹⁸ Anu ba duguma-fan bira, wo ti anu madumɛ. Ni anu ya faga-fan min, a ti ko ma anu na. Anu ba anu bole sa kirayatoenu kuma, wonu si kɛndɛya.”

Yisa Yɛlɛ-Koe Arinyɛni Tɔ

¹⁹ Mari Yisa banta kumala anu ye tumɛ min, a layɛlɛta Arinyɛni tɔ ka a mayigi Alla kɔɛn-nyimɛ rɔ.

²⁰ Karan-dannu tara kawandilɛ bɔ kan tinɛ bɛɛ rɔ. Mari taranta anu fɛ ka tamasere-sɛnbɛmɛnu di anu ma minnu si a mayira ko anuna kawandilɛ, tonyɛ le.]