Maraka 11 - ALLALA KUMƐ

Yerusalɛm Don-Koe Gbiliyɛ Rɔ

¹ Anu gbɛrɛnta Yerusalɛm ma tumɛ min, anu nara Bɛtafagi soe anubɛ Bɛtani so-mɛsɛnu dafɛ Ɔlifi kɔnkɛ kɔrɔ. Yisa ya ala karan-den fila lata anu yarɔ.

² A ya a sara wonu na ko, “So-nɛ min bi wo yarɔ, wo ta nyɔ. Wo wa ke nyɔ, wo si sofɛli-dan kirinɛ yen, mɔgɔ ma sigi bɛ min na. Wo ni a fulen ka na a la n ma.

³ Ni mɔgɔ-wo-mɔgɔ ya wo manyinika ko wo ye a fulenna min na, a fɔ a ye ko, ‘Mari makoe ye a la. Ma si na a la kaka.’ ”

⁴ Woletɔ anu tara. Anu ya sofɛli-dan kirinɛ yen bonda-dɛ dafɛ kilɛ la. Anu bi a fulenna tumɛ min,

⁵ minnu sɔnɛ nyɔ, wonu ya anu manyinika ko, “Wo ye sofɛli-dan wo fulenna nfenna?”

⁶ Anu ya anu yabi iko Yisa ya a fɔ anu ye nya min, woletɔ mɔgɛ wonu ya anu boloka. Anu tara.

⁷ Anu nara sofɛli-dan wo la Yisa wara. Anu ya anuna durukinu sa a kuma. Yisa sigira wonu na.

⁸ Mɔgɔ siyaman ya anuna durukinu tasa kilɛ la. Donu ya yanba-kun-kurannu tɛgɛ nyɔ dafɛ ka wonu sa kilɛ la.

⁹ Minnu bi a yarɔ anubɛ minnu bilanɛ a kɔma, wonu ya anu kan labɔ bɛrɛkɛ ko, “Alla tanto! Min bi nala Mari tɔgɛ rɔ, Allata duwɛ ni to wo fɛ!

¹⁰ Alla ni ata duwɛ layigi ma benba Mansa Dawudala mansaya-natoe kuma! Ma ni Alla tanto min bi san-kole rɔ!”

¹¹ Yisa donta Yerusalɛm soe burɔ tumɛ min, a tara Alla-Bato-Bɔn la. Anu ya nyɔ-burɛ rafɛlɛn. Wurɛ ara gbɛrɛn min kɛ nun, anubɛ ala karan-den tan-ni-filɛ bɔra ka ta Bɛtani soe burɔ.

Toro-Kuri Danka-Koe Yisa Bolo

¹² Wo banda kɛ, anu namatoe ka bɔ Bɛtani tumɛ min, kɔnkɛ ya Yisa bira.

¹³ A ya toro-kuri yen wula-yan la. A yanba-kun siyaman bi a ma, woletɔ a tara ka a mafɛlɛn ni a si ke ka a gbɔɛ do yen a la. Kɔnɔ a kera a ma tumɛ min, a ma gbɔɛ yen a la fɔ yanba-kun gbansan, ado toro-gbɔ-wati ma wo la.

¹⁴ Yisa ya a fɔ toro-kuri ye ko, “Mɔgɔ-wo-mɔgɔ ti i gbɔɛ dɔn tun!” Ala karan-dannu ya a kuman-kan wo lamɔɛn.

Yisa Ta-Koe Alla-Bato-Bɔn La

¹⁵ Anu kera Yerusalɛm tumɛ min, Yisa donta Alla-Bato-Bɔn la. Minnu bi sarakɛnu mayirala anubɛ minnu bi feri kɛla Alla-Bato-Bɔn la, a ya wo bɛɛ gben. A ya wodi-felennɛnuna tebulunu nabui anubɛ kangbo-ferelɛnuna sigi-fannu.

¹⁶ A ma sɔn ko mɔgɔ-wo-mɔgɔ ni anuna yilaya-fannu duni ka tenbi wonu na Alla-Bato-Bɔn kata burɔ.

¹⁷ A ya mɔgɛnu karan ko, “A sɛbɛnɛ Allata kitabu rɔ ko, ‘Anu si nna Bato-Bɔn kele ko madiyali-kɛ-bɔn sibole bɛɛ ye’ kɔnɔ wole ye a mala kankannu dogon tinɛ la!”

¹⁸ Saraka-masɔla-wɛnu anubɛ tɔn-karan-mɔgɛnu ya wo lamɔɛn. Woletɔ anu wulita fɛrɛ nyinina Yisa faga-koe ma. Anu kilannɛ a la nun bawo nyama bɛɛ kawara ala karan ma.

¹⁹ Wura-dɛ wo la, Yisa anubɛ ala karan-dannu ya soe boloka.

Karan ka Bɛn Toro-Kuri Ma

²⁰ Wo banda kɛ, subaga-dɛ ma, anu bi tagamana kilɛ fɛ tumɛ min, anu ya toro-kuri wo yen tun. Toro-kuri wo la ara gbala ka bi a kuma ha dugu la.

²¹ Min kera nun, Pita ya a hɛnkili to wo ko. A ya a fɔ Yisa ye ko, “Karan-mɔgɔ, i ya toro-kuri min danka, wo mafɛlɛn, a la ara gbala feu!”

^22-23 Yisa ya anu yabi ko, “Wo ni wo hɛnkili to kɛ ko! Ni wo dɛnkɛninyara Alla ma, wo si ke a fɔla kɔnkɛ kɛ ye ko, ‘Bɔ yan. I ni ta bui kɔgɔ-yi rɔ.’ Ni wo ma sika wo yisi rɔ fɔ ka dɛnkɛninya ko wo ara min fɔ, wo si ma le, a si ma wo ye.

²⁴ Wola ko la, n bi kɛ fɔla wo ye. Wo wa madiyali kɛ ko dola ko la tumɛ min, wo ni la a la ko wo ara a sɔrɔn, a si kɛ wo ye.

²⁵ Kɔnɔ wo wa sɔ madiyali-kɛ-tinɛ, ni min diminyanɛ mɔgɛ do ma, a ni a makoto. Woletɔ wo Fa Alla min bi Arinyɛni tɔ, wo si wo hakɛnu makoto. [

²⁶ Ado nfan, ni wo ma donu makoto, wo Fa Alla min bi Arinyɛni tɔ, wo ti wole fanan makoto wo hakɛnu na.”]

Yisala Sɛnbɛ Manyinika-Koe

²⁷ Nba, anu sɛgira Yerusalɛm. Yisa ye tala Alla-Bato-Bɔn la tumɛ min, saraka-masɔla-wɛnu anubɛ tɔn-karan-mɔgɛnu anubɛ kɛmɔgɛnu nara a wara.

²⁸ Anu ya a manyinika ko, “I ye koe kɛnu kɛla nfen sɛnbɛ la? Yon ya sɛnbɛ kɛ di i ma?”

²⁹ Yisa ya anu yabi ko, “Nde si wo manyinika nyinikali kelen na dɔrɔn. Ni wo ya n yabi, n bi koe kɛnu kɛla sɛnbɛ min na, n si wo fɔ wo ye.

³⁰ Yɔni ya batasilɛ kɛ sɛnbɛ min na, wo bɔra mi? A bɔra Alla le bolo, ka, a bɔra mɔgɛnu bolo?”

³¹ Anu kumara anu nyɔgɔn ye, anu ko, “Ni ma ya a yabi ko, ‘A bɔra Alla le bolo,’ a si a fɔ ma ye ko, ‘Nba, nfenna wo ma la Yɔni la?’

³² Kɔnɔ ni ma ko, ‘A bɔra mɔgɛ le bolo,’ mɔgɛnu si min kɛ, ma kilannɛ wo la bawo anu dama lanɛ a la ko Yɔni, nɛbi le.”

³³ Woletɔ anu ya Yisa yabi ko, “Ma ma a lɔn.” Nba, Yisa ya a fɔ anu ye ko, “Nde fanan bi koe kɛnu kɛla sɛnbɛ min na, n ti wo fɔ wo ye.”