Makawandili Kumɛnu 7 - ALLALA KUMƐ

Hɛnkilimaya-Kumɛnu

¹ Tɔgɔ-nyimɛ fisa tulu-suma-diyamɛ ko. Mɔgɔ-saya-tele fisa a sɔrɔn-tele ko.

² Yanni mɔgɛ ni ta ladiya-bɔn la, a fisa, a ni ta saya-bɔn la bawo bɛɛ si a miri sayɛ ma nyɔ le, ado bɛɛla ban le sayɛ la.

³ Yisi-tinyɛ fisa yɛlɛn-kede-kede ko. Yisi-magboyɛ si mɔgɔ-yakɔrɛ yɛlɛma de kɔnɔ a si do sa mɔgɔ-hɛnkili kuma fanan.

⁴ Kun-takolon-miriya bɛnnɛ sewɛ ma tuma-wo-tuma kɔnɔ hɛnkilimɛ le ye a mirila saya-kɔrɛ ma.

⁵ Yanni kuntan ni i matɔgɔ, a fisa, hɛnkilimɛ ni i makuma.

⁶ Kuntanla yɛlan mani de iko gbankinya tenbi fɛrɛnna dagɛ-kɔrɔ-tɛ rɔ. A sɔnkɔ-sɔnkɔ da ra kolo kɔnɔ a ti ko nyinya dagɛ burɔ.

⁷ Kensunte si hɛnkilimɛ yɛlɛma kuntan la. Ni mɔgɛ ya dogonta-fan bira, wo ara fɛɛ sa a nyɛrɛ sɔn la.

⁸ Ko-laban kin ko-dabirɛ ko, ado munyɛ fisa wasinteyɛ ko.

⁹ I yisi kana bɔ tiriya bawo kuntan le yisi lakala.

¹⁰ Mɔgɔ kana a miri ko fɔlɔ fisa bi ko. Hɛnkilimaya-kuma ma wo la.

¹¹ A bɛnnɛ hɛnkili ni taran mɔgɛ bɛɛ bolo. A si mɔgɔ dɛnbɛ iko kɛɛ-tonɛ.

¹² Hɛnkili fanan si ko-nyinya i ma yarɔ ma iko wodi si ko-nyinya mɔgɛ ma nya min. Hɛnkilimayɛ si mɔgɔ-kunyɛ bɔ le nanparan rɔ. Ko-kɔrɔ-lɔn-tɔnɛ le wo la.

¹³ I miri Allata kabana-koenu ma. Alla ara min tadu, yon si ke wo latelenna?

¹⁴ I wara-koe tenbi tala a kilɛ fɛ, i ni nyagalen. Ni tɔrɔyɛ fanan nara i ma, i ni a lɔn ko Alla le si kun-nadiyɛ anubɛ tɔrɔyɛ di mɔgɛ ma. Mɔgɔ ma a lɔn ni min bi nala mala a la yarɔ ma.

¹⁵ Hali duninya ragbɛlɛ, n bara koe bɛɛ rayen n yɛ la. Lunyɛ do, mɔgɔ-nyimɛ si faga, hali a telennɛ, karagbɛlɛ ni to a niyi la, hali a wunduyogo.

¹⁶ Mɔgɔ kana ko-nyimɛ kɛ ka tenbi a dan kun na. Mɔgɔ kana ata hɛnkilimayɛ fanan natenbi a dan kun na. Ni i ya wo ma, i si i nyɛrɛ tabunden wo rɔ.

¹⁷ Mɔgɔ kana wunduyogoyɛ dan-natenbi, ado mɔgɔ kana ma kun-takolɔn la fanan alako i kana faga, ila wati ma ke wɛ.

¹⁸ I kana nyimayɛ anubɛ wunduyogoyɛ matuntun anu nyɔgɔn ye. A bɛɛ ra ni kɛnya i bolo bɛrɛtɛ! Ni i kilanta Alla la, i bɔra fenfen wara-koe rɔ, i si ta yarɔ ma.

¹⁹ Hɛnkilimayɛ si koe min nyinya mɔgɔ kelen ma, kun-tigi tan ti ke wo nyɔgɔ-sufa mala so-kun kelan ye.

²⁰ Mɔgɔ-wo-mɔgɔ sa nyɔ min si to ko-telennɛ kɛla tuma-wo-tuma, tele-kelen-bɛrɛni, a ma sama.

²¹ I kana to i tole masɔla mɔgɛnuna kumɛ kɛ dama la. Ni wo ma, lunyɛ do, i si i tanama-kumɛ lamɔɛn ila wɔli-kɛlɛ bolo,

²² ado ile nyɛrɛ ya a lɔn ko i wara mɔgɛnu tanama-kuma-siyaman fɔ.

²³ N ya nna hɛnkilimayɛ lawɔli ka kɛ damasi lakɔrɔsi. N ya n taya ko n ni ma hɛnkilimɛ la kɔnɔ n ma ke,

²⁴ ado hɛnkilimayɛ nya-yen ma di. Yon si ke hɛnkilimayɛ nya-yenna?

²⁵ Nba, n ya n miriya mumɛ bɛɛ to ale hɛnkilimayɛ ma ka a lakɔrɔsi ka koe bɛɛ kɔrɛ lɔn. N ya wunduyogoyɛ lakɔrɔsi ka a lɔn minna ko la fenfen sa a rɔ fɔ kun-takolonyɛ.

²⁶ N bara koe do yen min gbɛlɛ sayɛ ko. Wo le wo musi la min tɔgɛ musu-milibɛlɛ. A mani de iko gbɛrɛ. A yisi mani de iko fɛlɛ-wɛ. A bole mani de iko yɔlɔkɛ. Allata mɔgɛ le dɔrɔn si a masangba kɔnɔ a ti mɛ hakɛ-tigi wo lasɔrɔnna.

^27-28 Nde, karan-mɔgɔ ko n bara min nya-yen kɛ rɔ, wo ni wo tole masɔ wo la. N bi koe bɛɛ kɔrɛ nyinɛ la wati min, n ya kɛ ragbɛ doni-doninyɛ le ma. Iko mɔgɛnu si a fɔ nya min, anu ya kei kelen yen mɔgɔ waga kelen tɛma min telennɛ kɔnɔ hali musu-den-kelan, anu ma a yen min telennɛ.

²⁹ Kɔnɔ nde ya kɛ le dɔrɔn yen kɛ rɔ, Alla ya ma latelennɛ dan. A ma ma pirinkan. Male le wara ma nyɛrɛ pirinkan.