Makawandili Kumɛnu 6 - ALLALA KUMƐ

¹ N ya ko-gbɛrɛkɛ yen duninya kɛ rɔ min ma telen, ado a gbɛlɛ hadama-dannu kuma gben!

² Alla si nɔnfulu-tigiyɛ anubɛ gbiliyɛ latɛgɛ mɔgɛ do ma, ado a nyinita fenfen ma, a si wo sɔrɔn. Kɔnɔ Alla ti a ma, mɔgɛ wo ni ala nɔnfuli wo diya bɔ fɔ mɔgɔ-gbɛrɛkɛ! Wo ragbɛlɛ, ado a ma telen.

³ Hali mɔgɔ wa den kɛmɛ sɔrɔn, a ni kɔrɔya kɔbɔkɔbɔ, ni a ma a bolo-fen-diya bɔ, ado a ma togon a kilɛ fɛ, hali dan min suyi si bɔ a na burɔ, wo fisa ale ko.

⁴ Bawo dan wo yɛ la ma tii waan ma, ado a tora pinpi le tɔ, a wara-koe fanan danta pinpi wo le tɔ.

⁵ Hali dan wo min ma waan yen a yɛ la lun-kelen-bɛrɛni, a la si feri ka a niyi ladɛn ka tenbi kei wo la

⁶ min ya hali san waga fila bɔ kɔnɔ a ma a bolo-fen-diya bɔ. Anu fila bɛɛ si a laban sayɛ le ma.

⁷ Mɔgɛ ye wɔlɛ min bɛɛ kɛla duninya rɔ, a ye wo kɛla a buyi lela ko la kɔnɔ buyi ti wasa.

⁸ Tɔnɔ-nyamintan bi hɛnkilimɛ bolo ka tenbi kuntan wo la? Bolo-kolɔn wa a famayigi fen-tiginu tɛma, tɔnɔ-nyamintan bi wo la?

⁹ Wo ragbɛlɛ. Wo mani de iko mɔgɛ tenbi fɔnyɔ birala. Yanni mɔgɔ yɛ ni to bɔla fan bɛɛ la tuma-wo-tuma, a fisa, min bi a bolo, wo ni a hɛnɛ.

¹⁰ Koe min damasi ye ma-tina kaka, Alla ara ban wo latɛgɛla nun, bi ko ma, ado mɔgɛ ye nya min, Alla ara ban wo lɔnna. Alla min kolo mɔgɔ ko, wo ma ti sɔsɔ.

¹¹ I ye tola sɔsɔli sala nya min, i la ye tola fɛyala wo nya na le, ado ala ban si gbɛlɛya i kuma.

¹² Yon si mɔgɔ-munanfaga-koe lɔn duninya kɛ rɔ min tagbɛlɛ? Bawo mɔgɔ siyi-tele kunduyani de iko ninɛ. Yon si i kan-kɔma-koe lɔn duninya kɛ rɔ ni i fagara?