Makawandili Kumɛnu 5 - ALLALA KUMƐ

Kuntanya-Lanyiri Kiri-Koe

¹ A ma i fɛrɛma Alla Bato-Bɔn la. Yanni mɔgɛ ni kuntanya-sarakɛnu bɔ nyɔ iko kuntan donu bi a mala nya min, a fisa, a ni ta nyɔ ka hɛnkili sɔrɔn bawo kuntan wonu ma a lɔn ko anu bi ko-yogomɛ le kun na.

² I miri yanni i ni kuma. Alla yili-madiya-kumɛ kana bɔ mɔgɔ da rɔ yona. Ale ye san-kole rɔ, male ye dugu-kole kuma, woletɔ i kana kuma-pɔrɔtɔ-paratɛ fɔ.

³ Anu si a fɔ ko mɔgɛ ye hɔnna nya min, a ye kiyo-yogomɛ sala wo nya na le. Mɔgɛ ye tola kuma-siyamɛ fɔla nya min, a ye tola kun-takolonya-kumɛ fɔla wo nya na le.

⁴ Ni mɔgɔ banta Alla yili-madiyala ko-wo-ko rɔ, a bɛnta, a ni wo latɔnbagaya tiriya! Alla ti sewa kun-takolon sufa wonu na. I kuman-kan latɔnbagaya.

⁵ Ni i ti ke lanyiri latɔnbagayala, hali i ma a kiri nun.

⁶ I kana sɔn, i dɛ ni i don hakɛ rɔ min si a ma, i ni ta a fɔ saraka-masɔlɛ ye ko, “N ya Alla yili-madiya min na, n bara sama wo la.” Nfenna i si a ma, Alla ni diminya i ma? Nfenna i si sɔn Alla ni i bɔnɔ i tɔrɔ-gbɛ rɔ?

⁷ I mara kiyo-siyaman-sala la wo, i mara wɔli-fufafu-kɛla la wo, i mara kuma-pɔrɔtɔ-parata-fɔla la wo, ko kelen fisa wo bɛɛ ko. I wa Alla yili-madiya fan min na, fɔ i ni kilan Alla la ka a gbiliya.

Banaya-Fuyi Wara-Koe

⁸ Ni i ya a yen, bolo-kolɔnnu bi tɔrɔla, anu sa yo sɔrɔnna, ado anuna tonyɛ sa bɔla gbɛ rɔ, i kana tɛrɛna wo la. Wo ye tɛgɛla bawo anu kun-tigi minnu bi anu kuma, wonu fanan bi kun-tigi donu denu kɔrɔ.

⁹ Hali mansɛ min bi anu bɛɛ kun na, wo fɔlɔn yili-madiyanɛ sɛni-salɛnu bolo-fannu denu kuma.

¹⁰ Ni nɔnfuli diyara mɔgɔ-wo-mɔgɔ ye bɛrɛkɛ, nɔnfuli ti wo wasa mumɛ! Nɔnfulu-tigiyɛ diyara mɔgɛ min ye wɛ kɛ, hali wo ya nɔnfuli sɔrɔn duk, wo ti a wasa. Kɛ bɛrɛn tagbɛlɛ.

¹¹ Ila nɔnfuli ye siyayala nya min, a dɔnnɛnu bi siyayala wo nya na le. Tɔnɔ-nyamintan bi nɔnfulu-tigiya-su wo la, fɔ yala-tɔnɛ dɔrɔn?

¹² Wɔli-kɛlɛ ya fen-ni dɔn wo, a ya fen-ba dɔn wo, a si kinɔgɔ a diya. Kɔnɔ hali nɔnfulu-tigi ya fen-diyamɛ bɛɛ dɔn, a ti kinɔgɔ a fanbolo.

¹³ N bara ko kelen de yen duninya ma, min ma kin hali doni bɛrɛn. Mɔgɛ do si a raya ka nɔnfuli lamara a nyɛrɛ ye sinanna ko la.

¹⁴ Wo kɔma, a ni nɔnfuli wo don fan do rɔ, fan wo ni kasara a ma, a bolo-kolɔn ni to gbɛ! Hali a si min sigi ala dan ye, wo sa!

¹⁵ Bolo-kolɔn ye sɔrɔnna nya min, a bolo-kolɔn ye sɛgila wo nya na le. Hali a ya wɔli-su bɛɛ kɛ, a ti ta wo fenfen na a bolo.

¹⁶ Iko n ya a fɔ nya min, ko le kɛ la min ma kin duninya ma. Mɔgɛ ye wɔli-su min bɛɛ kɛla fɔnyɔ-gbansanna ko la, nfen tɔnɛ ye wo la? Mɔgɛ nara nya min, a ye sɛgila wo nya na le.

¹⁷ Ma ye pinpi le tɔ ma siyi-tele-bɛɛ kɔrɔ, ado yisi-magboyɛ anubɛ hɔnya, kirayɛ, anubɛ yigi-tɛgɛ, wonu denu-gbansan ye ma kuma.

¹⁸ N ya kɛ le dɔrɔn yen duninya ma min kin. Alla ara wati-kundu-nɛ min di mɔgɛ ma duninya kɛ rɔ, a fisa, a ni fen dɔn ka a min ka sewa a bolo-fen-sɔrɔnnɛnu tɔ. Duninya damɛ le wo la.

¹⁹ Ni Alla ya nɔnfulu-tigiyɛ latɛgɛ mɔgɛ ma, ado a ni a ma, a ni ala nɔnfulu-tigiyɛ wo diya bɔ, mɔgɛ wo ni baraka bira a ye ka sewa a bolo-fen-sɔrɔnnɛ wonu tɔ. Kɔ-fan le wonu na ka bɔ Alla bolo.

²⁰ Alla wa ladiyɛ-su wo di mɔgɛ ma, a ti a miri lefan ni a si faga yona.