Makawandili Kumɛnu 4 - ALLALA KUMƐ

¹ N sigira ka n miri. Telenbɛlitayɛ min bi duninya rɔ, n ya wo lakɔrɔsi. Minnu bi kɔndɔfili rɔ, wonu bi dila kɔnɔ anu denkunna-wo-denkuna sa. Anu denkunna sa bawo minnu bi anu tɔrɔla, sɛnbɛ ye wonu denu bolo.

² Minnu bara bɔ anuna kɔndɔfili kɛ rɔ sayɛ bolo, wonu kun na ara diya kɛndɛwaganu ko.

³ Minnu tenbira mɔgɔ-faganɛ wonu na, wo le minnu ma sɔrɔn bɛ bawo ko-yogomɛ minnu bi duninya kɛ rɔ, wonu ma wo rayen bɛ anu yɛ la.

⁴ N bara a lɔn gbɛ, mɔgɛ bɛɛ sɛbɛ donnɛ wɔlɛ ma minna ko la. Ni i ya mɔgɔ-sɛbɛ-donnɛ yen, a sɔgɛ le a la, a ni tenbi a sigi-nyɔgɛ la. Hali wo, wo fanan tagbɛlɛ. Wo mani de fanan iko mɔgɔ tenbi fɔnyɔ birala.

⁵ Anu bi a fɔla ko kuntan le si a bole kɛ a kɔnkɔn tɔ ha kɔnkɛ ni a faga.

⁶ Yanni mɔgɛ ni a nyɛrɛ tɔrɔ wɔli-wɛ la, a fisa, fen-nɛ ni taran a bolo yisi-kimɛ rɔ bawo fen-nyinina-wɛ mani de iko mɔgɔ tenbi fɔnyɔ birala.

⁷ Wo kɔma, n ya ko-ragbɛlɛyanɛ do yen tun duninya rɔ.

⁸ Mɔgɛ do ye nyɔ, a kelan le siginɛ. Den sa a bolo, ado a na-kelen-nyɔgɔn sa. A sɛbɛ donnɛ wɔlɛ ma bɛrɛbɛrɛkɛ kɔnɔ a ye fan minnu sɔrɔnna, wonu ti a wasa. A ye wɔli-belebele wo kɛla yonna ko la ka a kan-kɔ sɔ nyɛrɛ-ladiyɛ la? Mɔnima-wɔli-su wo ragbɛlɛ de!

⁹ Kelengboyɛ ma bɛn wɔlɛ rɔ bawo mɔgɔ filɛta tɔnɛ siya.

¹⁰ Ni kelen buira, a ta-nyɔgɛ si a lasɔ le kɔnɔ ni a kelan le buira, wo yogo bawo a dɛnbɛna-gbɛrɛkɛ sa.

¹¹ Mɔgɔ filɛ le sanɛ bɛnta kimɛ rɔ kɔnɔ mɔgɔ kelan sanɛ si kimɛ bɔ a nyɛrɛ la kama?

¹² Mɔgɔ filɛ si waan min ka kɛlɛ rɔ, mɔgɔ kelan ti ke wo kala. Yili-kolo sawɛ fugannɛ a nyɔgɔn ma, wo tɛgɛ ma di.

¹³ Yanni kina-kun-takolɔn ni ma mansɛ la, ado a ti sɔn a tole masɔla mɔgɔ la, kemini-mɛsɛ bolo-kolon-hɛnkilimɛ tenbira mansa-su wo la.

¹⁴ Hali kemini-mɛsɛ bolo-kolɔn sɔrɔnta, ka, ni a bɔra le yele la ka ma mansɛ la, wo kin kina-kun-takolɔn wo ko.

¹⁵ N tora mɔgɛnu mafɛlɛnna anu tenbi sɔla keminɛ wo fɛ ha a ni ma mansɛ la. Ale kemini-hɛnkilimɛ wo ya mansa-kuntan wo gbɛ bi.

¹⁶ N bara nyama-belebele min tayen, wonu siya duk! Kɔnɔ tɔ-a-la, hali ale kemini-hɛnkilimɛ, anu gbunyara a kɔrɔ. Kɛ damasi ragbɛlɛ. A mani de iko mɔgɛ tenbi fɔnyɔ birala.