Makawandili Kumɛnu 1 - ALLALA KUMƐ

Duninya Kɛ Ragbɛlɛ!

¹ Kumɛ kɛnu bɔra nde, karan-mɔgɔ le bolo. Mansa Dawuda min bi mansayɛ la Yerusalɛm soe burɔ, wo kebila-mɔgɛ le nde la.

² Nde, karan-mɔgɔ ko duninya kɛ ragbɛlɛ. A ragbɛlɛ dɔgɔma-ma-de, ado a nya ti yen mumɛ!

³ Mɔgɛ si wɔli a siyi-tele kɔrɔ furr, kɔnɔ a si tɔnɔ nyamintan sɔrɔn duninya kɛ rɔ?

⁴ Su-ni-tele, dennɛnu bi sɔrɔnna, kinanu bi fagala kɔnɔ ha bi, duninya wo ye a gbɛ rɔ.

⁵ Tele ye bɔla, a ye buila. A wa ban buila, a si a buri tala, a ni ta bɔ a gbɛ rɔ tun.

⁶ Fɔnyɔ ye tola tugula dugula wara la le ka to ta-ni-sɛgi kɛla kantɔ-wara la. A ye tintan wo le kun na tolon!

⁷ Yi bɛɛ ye tala a labilala kɔgɔ-yi le ma kɔnɔ ha bi, kɔgɔ-yi ma bon bɛ a dagɛ ma. Yi kelan wo wuyan si yɛlɛ ka ma banda-yi la ka ta bɔ a kunyɛ la tun.

⁸ Dan sa a la. Dɛ ti ban kumala. Yɛ ti wasa ko mafɛlan la. Tolo-bɛrɛn ti bandan kuma-lamɔɛn la.

⁹ Ha bi, ko-wo-ko sa min nyɔgɔn ma ma wɛ, ado ko ti ma tun min nyɔgɔn ma ma wɛ. Ko-kura sa duninya kɛ rɔ.

¹⁰ Mɔgɛ si ke a fɔla ko, “I yɛ lata ko-kurɛ do ma,” wa? Kɔnɔ yanni ma ni sɔrɔn nun, wo nyɔgɔn-sufa ara mɛ mala.

¹¹ Mɔgɔ ti anu hɛnkili to fɔlɔ-mɔgɛnu ko, ado ma kegeyɛnu fanan hɛnkili ti to kaka-mɔgɛnu ko.

Wasabɛlitayɛ Ko-Lɔn-Koe Rɔ

¹² Nde, karan-mɔgɔ taranta mansayɛ la Isirɛla nyamanɛ kun na Yerusalɛm soe burɔ.

¹³ N ya n nyɛrɛ to karan ma alako koe min bɛɛsi ara ma duninya rɔ, n ni wo bɛɛ kɔrɛ lɔn. N bara a yen ko Alla ara dunu-belebele-wɛ le sigi ma kuma kɛ la.

¹⁴ N bara koe kɛ bɛɛ lakɔrɔsi duninya ma kɔnɔ duninya ragbɛlɛ! Ko-sufa wo mani de iko mɔgɔ tenbi fɔnyɔ birala.

¹⁵ Min ta ara ban dula, wo la ti telen tun. Ni min sa, wo dan ti lɔn.

¹⁶ N ya a fɔ n nyɛrɛ ma, n ko, “N ya hɛnkilimayɛ anubɛ ko-kɔrɔ-lɔn-burɛ anubɛ a kɔmɛ bɛɛ lɔn. N mankan ara ta wuu, ado mansa fɔlɔtɛ minnu bara sɔ n yarɔ Yerusalɛm soe burɔ, nta hɛnkilimayɛ anubɛ ko-kɔrɔ-lɔn kolo wo bɛɛtɛ ko.”

¹⁷ N sigira ka n miri. N ko n ni hɛnkilimayɛ anubɛ kuntanyɛ dan-nafarɛ lɔn. N ya wo bɛɛ lakɔrɔsi. Wo mani de iko mɔgɔ wa a fɔ ko a ye fɔnyɔ birala.

¹⁸ Mɔgɔla ko-lɔn ye tola warala nya min, ala kɔndɔfili ye tala warala wo nya na le. Mɔgɛ ye tola koe kɔrɔ lɔnna nya min, a yisi ye tola tɔrɔla a ma wo nya na le.