Maika 5 - ALLALA KUMƐ

¹ “Kɔnɔ kaka gbɛ, wo ni wola kɛlɛ-dannu nadɛn kan-tina-kelen bawo ma yogenu bara na bui ma ma ka ma kɛlɛ. Anu bara Isirɛla mansɛ dɛ ratii a kɔrɔ-sɔ-sewuri la.”

Lanyiri Kiri-Koe Kun-Tigi-Sɔrɔn-Koe Rɔ

² Mari ko Bɛtalehɛm soe min bi Ɛfarati sigisɔn rɔ, wo dɔgɔ ka tenbi Yuda nyamanɛ soe bɛɛ la. Hali wo, Mari si kun-tigi-belebele do labɔ Bɛtalehɛm so-dɔgɔmanɛ wo rɔ min si kun-tigiyɛ kɛ Isirɛla mɔgɛnu kuma Mari ye. Kun-tigi kɛ kebila-mɔgɛnu, mɔgɔ-malɔnnɛ le anu na kebi fɔlɔfɔlɔ.

³ Mari si ata mɔgɛnu gbala anu yogenu bolo ha a na ni a sɔrɔn tumɛ min. Kɛ wa ma tumɛ min, kun-tigi kɛ na-kelen-nyɔgɛ Isirɛla mɔgɛ minnu tanyɛnsɛnnɛ, wonu si sɛgi ka kofu anu na-kelen-nyɔgɛnu ma Isirɛla nyamanɛ rɔ.

⁴ A si ata mɔgɛ kɛnu fɛ-bira iko saga-fɛ-biralɛ si ala sagɛnu fɛ-bira nya min. Mari nyɛrɛ si wo fanka-makawanɛ anubɛ gbiliyɛ di a ma ka wonu fɛ-bira. Ata mɔgɛ kɛnu si sigi lafɛrɛ rɔ ka taran anu diya bawo duninya-mɔgɛ bɛɛ si a lɔn ko mansa-makawanɛ le ale la.

⁵ Ata mansayɛ si yisi-kimɛ lana Isirɛla mɔgɛnu tɛma. Asiriya kɛnu ba na bui mala nyamanɛ kɛ ma tumɛ min ka mala soenu tarɛ-dɛ keri, ma si mala kɛlɛ-kurugbɛnu nata anu kɛlɛ tinɛ.

Isirɛla Mɔgɛnu Dɛnbɛn-Koe Kɛlɛ Rɔ

⁶ Nimirɔdi ya Asiriya nyamanɛ min dabira, ma si nyɔ-mɔgɛnu nɔ mala kɛlɛ-kɛ-fannu na. Asiriya mɔgɛnu ba na bui ma ma tumɛ min, mala kun-tigi-wɛ wonu si ma kisi anu masibɛ ma.

⁷ Isirɛla mɔgɛ toe minnu bi tola, wonu si bui ma yogenu ma tiriya iko bandɛ si bui dugi ma nya min bawo wo tungu sigini ma mɔgɛ la fɔ Mari.

⁸ Isirɛla mɔgɛ toe minnu tonɛ, wonu makilannɛ si to iko yara-kɔnkɔtoe. Ni a tara saga-wɔrɛnu tɛma, a si gban ka kɛ do ma ka wo rafarafara. Sagɛ wo kisi-fɛrɛ ti sɔrɔn ale yarɛ bolo.

⁹ Isirɛla mɔgɛnu si anu yogenu nɔ ka anu nato dogbe!

Ko-Yogoma-Kɛlɛnu Tɔrɔ-Koe Mari Bolo

¹⁰ Mari ko wo wati wa na tumɛ min, a si wole, Isirɛla mɔgɛnuna soeenu anubɛ wola kirindinu tinya wo tɛma.

¹¹ Wo hɛnkili latɛgɛnɛ wola soe minnu ma anubɛ wola kan-tinɛnu ko wo si kanan nyɔ, Mari si wonu tinya pɔ!

¹² Wo lanɛ wola duruyɛ anubɛ wola suwagayɛ minnu na, a si wonu fanan tinya.

¹³ Wo ye bɛsɛ minnu kɔla, a si wonu kasara. Woletɔ wo si fan minnu nadan wo nyɛrɛ bole la, wo ti wonu kɔ tun!

¹⁴ Mari ko a si wola soenu tinya. Wo kɔma, a si wola bɛsɛnu tinya minnu tɔgɛ Asura, wo ya minnu nadan wo bole la musila muninyɛ rɔ, kɔni.

¹⁵ Sibolo-mɔgɛ bɛɛ minnu ti sɔn ata kumɛ birala duninya rɔ, Mari fonde si bɔ wonu kuma ka wonu tɔrɔ bɛrɛkɛ.