Maika 3 - ALLALA KUMƐ

Yerusalɛm Kun-Tiginu Makuma-Koe

¹ Nde, Nɛbi Maika ko, “Wole Isirɛla kun-tiginu, wo ni wo tole masɔ! A bɛnta, ko-latelenni-hɔnya ni sigi wo la.

² Ni koe min kin, wo ma di wo ye kɔnɔ ni koe min yogo, wo le di wo ye.

³ Wo ye Marita mɔgɛnu birala boloko-yogomɛ-kɛ iko donso-keminɛ tenbi sogo-gbole bɔla a ma. Wo ye Marita mɔgɛnu birala iko donso-keminɛ wa sogo-ratɛgɛtɛgɛnɛ sa dagɛ rɔ ka a dɔn sa!

⁴ Kɔnɔ wo wati si na, wo si di Mari dala kɔnɔ a ti a wɔlɔ matɔlɔ wola madiyalɛnu na. A si a kolonkɛ dogon wo ma bawo wo ara ko-yogomɛnu dan-natenbi.

⁵ “Nɛbi donu bi nyɔ minnu bi Allata mɔgɛnu yanfala. Minnu bi wonu sarala, anu bi yisi-kima-koe fɔla wonu ye. Minnu sa anu sarala, anu bi kɛlɛ-koe fɔla wonu ye wɔlɔyiya-kumɛ rɔ. Mari ye a fɔla mɔgɔ-mayuwaya-nɛbi wonu ye ko

⁶ a ara to doni, wole nɛbi-su kɛnuna wati ni ban. Bawo wo le ye ata mɔgɛnu nabilala ko-yogomɛ la min kɛ, woletɔ a ti ko-rayirɛ kɛ wo ye tun. Wo ti ke wɔlɔyiya-kumɛnu fɔla tun.

⁷ Hali wo, wole nɛbinu kuman-kan ti bɔ-a-la. Wo si miliya worɔ bawo Alla sa wo fɛ tun iko fɔlɔ.

⁸ “Kɔnɔ nde, Maika sa iko nɛbi doinu bawo Mari ya ata niyi anubɛ ata sɛnbɛ di nde ma fanan. A ya latelen-hɛnkili di n ma. A ara n yisi gbɛlɛya ka wole, Isirɛla mɔgɛnuna hakɛ yira wo la.

⁹ Kɔnɔ wole Isirɛla mɔgɔ-banu, wo ni wo tole masɔ de! Ko-latelennɛ ma di wo ye mumɛ! Wo si tonyɛ yɛlɛma foninyɛ la.

¹⁰ Wo ye mɔgɔ-fagɛ anubɛ telenbɛlitayɛ mala Yerusalɛm soe bon-kurun-fan la, ado Allata so-sɛnimɛ le Yerusalɛm wo la.

¹¹ Anu bi dogonta-fannu dila wole kun-tiginu ma kiti-tɛgɛ-tinɛ. Tɔn-karan-mɔgɛnu bi wodi makelela mɔgɛnu bolo tɔn-karan-koe la. Wola nɛbinu bi kuntɔ-kumɛnu fɔla tɔnɔ-nyini-koe la mɔgɛnu bolo. Nɛbi-su kɛnu bi tɔgɛ sala Mari la ko Mari ye anu fɛ. N ba a fɔ ko, ‘tɔrɔyɛ ye nala,’ anu ni n sɔsɔ ko, ‘wo ti ma.’ Anu ko Mari ye anu fɛ.

¹² “Woletɔ mɔgɛ kɛnu bara-koe le ye a mala, sibolo-gbɛrɛkɛ-mɔgɛnu ni Yerusalɛm ma tonbɔn la. Anu si so-karantan kɛ rasin ka a ma sɛnɛ la. Wo kɔma, hali Marita Bon-Sɛnimɛ sɔnɛ kɔnkɛ min kuma, wo fanan si ma anuna sangban la.”