Maika 1 - ALLALA KUMƐ

¹ Mansa Yɔtam wo, Mansa Ehasi wo, anubɛ Mansa Hɛsakaya wo, Mari ya sarakanɛ don Nɛbi Maika bolo wonuta wati rɔ. Nɛbi Maika wo bɔra Mɔrɔsɛti soe rɔ min bi Yuda nyamanɛ rɔ, mansa sawɛ kɛnu bi kan min nun. Mari ya ko-siyaman yira Nɛbi Maika la Samariya anubɛ Yerusalɛm so-karantan wonuna ko la.

Allata Mɔgɛnu Makuma-Koe Nɛbi Maika Bolo

² Maika ya Mari kuman-kan latenbi ata mɔgɛnu ma ko, “Sibolo-mɔgɛ bɛɛsi ni anu tole masɔ a kin na! Duninya-tigi Mari si ma sereyɛ la wo kan ma. Wo ni wo tole masɔ. A ye nala kumala ata Arinyɛnɛ-bon-sɛnimɛ la.

³ Mari si bɔ ata kan-tina-sɛnimɛ wo rɔ ka yigi dugi ma ka tagama kɔnkɛnu kuma.

⁴ Kɔnkɛnu si lee a tontɛ kɔrɔ iko mɔgɔ wa kɛɛn sa tɛ rɔ. Kɔnkɔ-leenɛ wonu si to yigila folo-wɛnu tɔ iko gboron-gboronna-yi.”

⁵ “Min bi a tola, kɛ dama ye nala mala bawo Isirɛla mɔgɛnu anubɛ Yuda mɔgɛnu bara hakɛ kɛ. Nfen sufa hakɛ le wonu na? Bawo anu bara bɛsi-kɔ-koe anubɛ karagbɛlɛyɛ dan-natenbi, hali anuna mansa-soenu tɔ, Yerusalɛm anubɛ Samariya.

⁶ Maika ya Mari kuman-kan latenbi mɔgɛnu ma ko a si Samariya soe ma tonbon-kole la. Nyɔ si ma fen-ki-tinɛnu na. Mari ko a si bon-kerinɛ wonu mirannu nakɛ a rɔ fole la, fɔ bon-gbɛnu, wonu denu bi tola.

⁷ Wola bɛsi-da-gbɛlɛmɛ wonu ta si bunden. Wo ye wola kɔlɔma-malɛsɛnɛ anubɛ wola kuru-malɛsɛnɛ minnu kɔla, wonu bolokanɛ si belenna sundu-kunyɛnu ma. Wole Samariya mɔgɛnu ya fan minnu di wola yɛlannu ma minnu bi wola bɛsi-bɔnnu na, fan wo donu si mintan gburr! Ni wo bolo-fan minnu ma mintan, wo yogenu si na wonu bi ka ta anu na anuna yɛlannu ye anuna bɛsi-kɔ-tinɛnu tɔ.”

⁸ Maika nyɛrɛ ya a fɔ ko, “Min bi a tola, n bi wɔrɔndɔla di-kɛ-tinɛ bawo Samariya ye nala tinyana. Min si a to, mɔgɛnu ni a lɔn ko kinikinɛ ara don n tɔ, n si n gbu-makolonya, n kin-takolɔn si tagama. N si n kuli mayɛlɛ di-kɛ-tinɛ iko gbingbinnyagan tenbi kumala.

⁹ Samariya si na tinya feu, ado mɔgɔ ti ke a ladanna tun. Yuda nyamanɛ fanan si tinya wo nya na le, hali anuna Yerusalɛm so-karantan fanan.”

So-Mɛsɛnuna Koe Minnu Bi Yerusalɛmna Foolɛ Rɔ

¹⁰ “Kati soe wo tɔgɔ-kɔrɛ mani de iko ‘a fɔ.’ Wo kana wola soe wo tinya-koe fɔ ma yogenu ye minnu bi nyɔ kaka. Wo kana sɔn, anu ni wo di-kɛ-dɛ yen. Bɛti-Ɔrapa soe wo tɔgɔ-kɔrɛ mani de iko ‘gbangbanta bɔn.’ Nyɔ-mɔgɛnu si nyandan-kundi lamini gbangban rɔ di-kɛ-tinɛ.

¹¹ “Sefira soe wo tɔgɔ-kɔrɛ mani de iko ‘nyagalen.’ Anu tenbi tala nyɔ-mɔgɛnu na, anu si ta anu mɛlannu na. Anu kɔgɔrɔyɔlɛ si ta miliyɛ bolo. Seyanan soe wo tɔgɔ-kɔrɛ mani de iko ‘bɔ yan.’ Nyɔ-mɔgɛnu ti sisi bɔla soe kɔma kilan bolo. Bɛti-Isili soe wo tɔgɔ-kɔrɛ mani de iko ‘kan-tina-latankanɛ.’ Wo wa soe wo mɔgɛnu wɔrɔndɔ-kan lamɔɛn tumɛ min, wo ni la a la ko mɔgɔ ti ta nyɔ-kisi-koe la worɔ.

¹² “Maroti soe wo tɔgɔ-kɔrɛ mani de iko ‘a kuna.’ Soe wo mɔgɛnu bi kun-nadiya-tele makɔnɔna bawo Mari ara nyankankantan gbɛrɛn Yerusalɛm soe ma.

¹³ “Lesi soe wo tɔgɔ-kɔrɛ mani de iko ‘so-kurɔn min si kirindi sagan.’ Wole Lesi mɔgɛnu, wo ni wola soeenu kiri wola kirindinu na alako wo buri-koela ko la. Wo ya wo sanka Isirɛla nyamanita-mɔgɛnu ma hakɛ-kɛ-koe rɔ ka na wo la Yuda nyamanɛ rɔ. Wo ara a ma, Yerusalɛm mɔgɛnu bara anu sanka wole fanan ma hakɛ-kɛ-koe rɔ.

¹⁴ “Wole Yuda nyamanita-mɔgɛnu, wo ni bolo-fan to Mɔrɔsɛti-Kati soe-mɔgɛnu bolo. Soe wo tɔgɔ-kɔrɛ mani de iko ‘musu-nɛla fandɛ.’ Akisibu soe wo tɔgɔ-kɔrɛ mani de iko ‘baya.’ Mansɛ minnu bi Isirɛla nyamanɛ rɔ, wonu ti dɛnbɛnɛ sɔrɔn Akisibu mɔgɛnu bolo.

¹⁵ “Marasa soe wo tɔgɔ-kɔrɛ mani de iko ‘nɔlɛ.’ Wole Marasa soe-mɔgɛnu, Mari si wo yogenu nana wo kuma ka wo nɔ. Kun-tigi minnu bi Isirɛla nyamanɛ rɔ, faran minnu bi Adulam soe da kɔrɔ, wonu si ta anu dogon wo donu na.

¹⁶ “Wole Yerusalɛm so-burɔ-mɔgɛnu, wo ni wo kunyɛ gbana di-kɛ-tinɛ iko dogɛ ka a tɛgɛ wola dannuna ko ma, kɛlɛ ye tala minnu na.”