Luka 9 - ALLALA KUMƐ

Karan-Den Tan-ni-Filɛ Sɔ-Koe

¹ Yisa ya ala karan-den tan-ni-filɛ kele anu nyɔgɔn fɛ ka nyina-gben-sɛnbɛ anubɛ kirayato-dandan-fanka di anu ma.

² A ya anu sɔ Allala mansaya-wara-ko-kawandili bɔ tinɛ anubɛ ka kiriyatoenu nakɛndɛya.

³ A ya a fɔ anu ye ko, “Wo kana ta fenfen na wo bolo wola tagama rɔ. Sewuri wo, tagama-bɔrɔ wo, dɔn-fen wo, wodi wo, hali duruku-gbɛrɛ, wo kana ta wo fenfen na wo bolo.

⁴ Wo ni to wo yiya fɔlɔtɛ la, ha wo bɔ-tumɛ ni ke soe wo burɔ.

⁵ Ni anu ma wo rabira soe min tɔ, wo tenbi soe wo bolokala, wo ni wo kian ragbɔngbɔn nyɔ. Wo si ma sereyɛ la anu kan ma.”

⁶ Karan-dannu tagamanta so-mɛsɛ bɛɛ rɔ ka kibara-nyimɛ-kawandili bɔ anubɛ ka mɔgɛnu dandan kan tinɛ wo bɛɛ rɔ.

Mansa Hɛrodi Kɔndɔfili-Koe

⁷ Mansa Hɛrodi min siginɛ Kalili sigisɔn kun na, wo ya koe kɛ bɛɛ lamɔɛn tumɛ min, a kɔndɔfilita wola ko la bawo mɔgɛ donu ko Yɔni-Batasi-Kɛlɛ ara sɛgi a niyi la tun!

⁸ Donu ko Ilaya ara bɔ gbɛ rɔ kɔnɔ donu fanan ko nɛbi-kɔrɔmɛ do ara wuli tun.

⁹ Mansa Hɛrodi ko, “N bara Yɔni kunyɛ tɛgɛ a la nun. N bara ko-sufa min namɔɛn ka a bɛn mɔgɛ kɛ ma, yon bi wo la.” A ya a raya Yisa yen-koe ma!

Mɔgɔ Waga Loli De-Nyini-Koe

¹⁰ Yisala kilayɛnu sɛgira. Min bɛɛ mara, anu ya wo dantɛgɛlɛ sa Yisa ye. A tara anu na anu dan na soe do rɔ min tɔgɛ Bɛti-Sayida.

¹¹ Nyama ya wo lamɔɛn tumɛ min, anu bilara a fɛ. A ya anu kɔndɔn ka kuma anu ye Allala mansayɛla ko la. Minnu makoe ye kɛndɛyɛ la, a ya wonu dandan.

¹² Tele-yigi-tumɛ, ala karan-den tan-ni-filɛ nara a wara. Anu ko, “Karan-mɔgɔ, wula-da-rakolɔn le yan na. I ni mɔgɛnu nata so-mɛsɛnu tɔ anubɛ yan-dafɛ-sɛnɛnu alako anu ni dɔn-fan san anu nyɛrɛ ye ka anu yiyɛ sɔrɔn.”

¹³ Kɔnɔ Yisa ya a fɔ anu ye ko, “Wole nyɛrɛ ni dɔn-fan di anu ma.” Anu ya a yabi ko, “Biredi loli anubɛ yɛgɛ fila pe le ma bolo yan. I ye a fɛ, ma ni ta dɔn-fen san nyama kɛ bɛɛ ye?”

¹⁴ (Ado nfan, kei min bi nyɔ nun, wo si waga loli nyɔgɔn (5,000) bɔ le.) Yisa ya a fɔ ala karan-dannu ye ko, “Wo ni mɔgɛnu nasigi, bi-loli bi-lolinyɛ ma.”

¹⁵ Karan-dannu ya anu dama lasigi.

¹⁶ Yisa ya biredi loli anubɛ yɛgɛ filɛ wonu bi ka a yɛ layɛlɛ san ma. A ya baraka bira Alla ye anuna ko la ka anu takeri ka anu don ala karan-dannu bolo alako anu ni a ratala mɔgɛnu tɛma.

¹⁷ Anu dama ya wo dɔn ka fa pen! Mɔgɛnu datoe, ala karan-dannu ya gbengberan tan-ni-fila lafa wo la.

Yisa Lɔn-Koe Pita Bolo

¹⁸ Yisa kelen pe ye Alla madiyala tumɛ min a dan na, ala karan-dannu nara a wara. A ya anu manyinika ko, “Mɔgɛnu ko kama nna ko la? Yon bi nde la?”

¹⁹ Anu ya a yabi ko, “Donu ko Yɔni-Batasi-Kɛlɛ le ile la. Donu ko Nɛbi Ilaya le ile la. Donu fanan ko nɛbi-kɔrɔmɛ do ara wuli tun.”

²⁰ A ya anu manyinika ko, “Wole don? Wole ko kama? Yon bi nde la?” Pita ya a yabi ko, “Allata-Mɔgɔ-Yabɔnɛ le ile la!”

²¹ Yisa ya anu makawandi ko anu kana kɛ fɔ mɔgɔ-wo-mɔgɔ ye.

Yisata Tɔrɔyɛ anubɛ Ala Sayɛ Fɔ-Koe

²² Yisa ko, “Anu si nde, Hadama-dan tɔrɔ kati! Kɛmɔgɛnu anubɛ saraka-masɔlɛnu anubɛ tɔn-karan-mɔgɛnu si anu ban n na. Anu si n faga kɔnɔ a tele sawa nyɔgɛ, n si wuli tun.”

²³ A ya a fɔ anu damasi ye ko, “Ni mɔgɔ-wo-mɔgɔ ye a fɛ ka bila nde fɛ, a ni a nyɛrɛ wara-koe bɔrɔbɔ. Tele-wo-tele, a ni a nyɛrɛ faga-kɔlɔma bi ka bila n fɛ.

²⁴ Bawo mɔgɛ min bi a fɛ ka a nyɛrɛ niyi lakisi, wo tigi si bɔnɔ a niyi la. Kɔnɔ min bi bɔnɔna a niyi la ndela ko la, wo tigi niyi la si kisi.

²⁵ Ni mɔgɛ ya duninya fan bɛɛ sɔrɔn kɔnɔ a ni bɔnɔ a niyi la, a si nfen tɔnɛ sɔrɔn?

²⁶ Ni mɔgɛ ya a kan-kɔ sɔ nde anubɛ nna karan la, nde, Hadama-dan wa na nta gbiliyɛ anubɛ n Fa Allata gbiliyɛ anubɛ melika-sɛnimɛnuta wati wa ke tumɛ min, nde fanan si n kan-kɔ sɔ wo tigi la.

²⁷ Wo ni wo hɛnkili to kɛ ko! Donu bi yan, wonu ti faga fɔ anu ba Allala mansayɛ yen.”

Yisala Gbiliyɛ Yira-Koe

²⁸ Yisa banta koe kɛnu fɔla tumɛ min, a lɔgɔkun kelen nyɔgɛ, a ya Pita anubɛ Yɔni anubɛ Yemesi bi ko anu ni bila a fɛ Alla madiya tinɛ kɔnkɛ kuma.

²⁹ A ye Alla madiyala tumɛ min, a yakɔrɛ yɛlɛmanta. Ala kurɛ gbɛra perr!

³⁰ Wati-kundunɛ wo kɔrɔ, mɔgɔ fila ye kumala Yisa la, Nɛbi Musa anubɛ Nɛbi Ilaya, kɔni.

³¹ Anu bɔra gbɛ rɔ Arinyɛnɛta gbiliyɛ rɔ ka kuma Yisa la. Anu bi kumala ka a bɛn Yisa faga-nya ma Yerusalɛm soe burɔ iko Alla ara a latɛgɛ nya min nun.

³² Pita anubɛ a ta-nyɔgɛnu bi kinɔgɔla nun kɔnɔ anu kundenta tumɛ min, anu ya Yisala gbiliyɛ yen anubɛ mɔgɔ filɛ minnu sɔnɛ a dafɛ.

³³ Mɔgɔ filɛ wonu sɛgimatoe, Pita ya a fɔ Yisa ye ko, “N tigi, a bɛnta ma ye yan. Ma ni lele sawa sɔ yan, kelen itɛ, kelen Musatɛ, kelan Ilayatɛ.” (Pita ma a lɔn a ye min fɔla nun hali!)

³⁴ Pita ye kumala tumɛ min, banda-finyɛ ya anu dama yamatogon. Banda-finyɛ yigira anu kuma tumɛ min, ala karan-dannu kilanta kati!

³⁵ Kuman-kan bɔra banda-finyɛ wo rɔ, a ko, “Nna dan le kɛ la, n bara min yabɔ. Wo ni wo tole masɔ a la!”

³⁶ Kuman-kan latora tumɛ min, Yisa kelen pe le nyɔ nun. Anu ya min yen, a ya wati bɔ, ala karan-dannu ma a fɔ mɔgɔ-wo-mɔgɔ ye.

Nyinatoe Lakɛndɛya-Koe Yisa Bolo

³⁷ Wo banda kɛ, Yisa anubɛ ala karan-den sawɛ yigira ka bɔ kɔnkɛ kuma. Nyama-belebele ya Yisa labɛn.

³⁸ Kei do gbele-gbelenta nyama tɛma, a ko, “Karan-mɔgɔ, n bi i madiyala, i ni nna den kelen pe mafɛlɛn!

³⁹ Nyinɛ si a labui. A si a ma, a ni wɔrɔndɔ wɛ-kɛ ka yɛrɛyɛrɛn ha a da-kanfɛ ni bɔ. A ti a boloka yona fɔ a wa a tɔrɔ.

⁴⁰ N ya ila karan-dannu madiya ko anu ni a gben, a ni bɔ a fɛ kɔnɔ anu ma a nɔ.”

⁴¹ Yisa ya a fɔ anu ye ko, “Wole fanan. Dɛnkɛninyɛ sa wo bolo, ado wo ma ko-latelennɛ lɔn! N ni to wo fɛ ha tumɛ nyamintan? N si n munyu wo kɔrɔ ha tumɛ nyamintan?” A ya a fɔ kei wo ye ko, “Na ila dan la yan.”

⁴² Anu bi nala dennɛ la tumɛ min, nyinɛ ya a layɛrɛyɛrɛn ka a labui. Yisa ya a fɔ nyina-yogomɛ wo ye ko a ni bɔ a fɛ. A ya denni-lakɛndɛyanɛ don a fa bolo tun.

⁴³ Mɔgɛ bɛɛ kawara Allala sɛnbɛ ma. Yisa ye kabana-koe min bɛɛ mala, mɔgɛnu tora kawala wo bɛɛ ma. A ya a fɔ ala karan-dannu ye ko,

Yisata Sayɛ, Wo Fɔ-Koe Tun

⁴⁴ “N bi min fɔla wo ye, wo kana nyina wo ko! Anu si nde, Hadama-dan don mɔgɛnuna sɛnbɛ kɔrɔ.”

⁴⁵ Kɔnɔ ala karan-dannu ma kɛ kɔrɛ lɔn. Alla ya wo kɔrɛ dogon anu ma, woletɔ anu ma ke a nya-yenna. Anu kilanta fanan ka a manyinika wo kɔrɛ ma.

Yon Kolo Bɛɛ Ko?

⁴⁶ Sɔsɔlɛ do wulita Yisala karan-dannu tɛma alako ni min si ma mɔgɔ-ba la anu tɛma.

⁴⁷ Yisa ya anu miriya lɔn. Woletɔ a ya dennɛ do bi ka a sɔ a dafɛ.

⁴⁸ A ya a fɔ anu ye ko, “Ni min ya dennɛ kɛ rabira n tɔgɛ rɔ, wo ara nde rabira, ado ni min ya nde rabira, wo ara n sɔlɛ fanan tabira. Min famayiginɛ wo dama ko wo tɛma, wo le kolo wo dama ko.”

Ni min Sa I Kan Ma, Wo ye Ila Ko La

⁴⁹ Yɔni ko, “N tigi, ma ya kei do yen nyinɛnu gbenna i tɔgɛ rɔ. Ma ya a fɔ a ye ko a ni fara wo la bawo mala mɔgɔ ma ale la.”

⁵⁰ Yisa ya a fɔ a ye ko, “Wo kana a lakala bawo min sa wo kan ma, a ye wola ko la.”

Mɔgɛnu Ban-Koe Yisa la Samariya Kɛnuna Soe Do Burɔ

⁵¹ Yisa-yɛlɛ-tumɛ Arinyɛni tɔ, wo gbɛrɛnta tumɛ min, a ya a latɛgɛ ko a ni ta Yerusalɛm.

⁵² A ya kilayɛnu sɔ a yarɔ ko anu ni ta Samariya kɛnuna soe do burɔ ka fan bɛɛ rabɛn a yarɔ.

⁵³ Kɔnɔ nyɔ-mɔgɛnu ma a rabira bawo anu ya a lɔn ko a ye tala Yerusalɛm.

⁵⁴ Ala karan-dannu, Yemesi anubɛ Yɔni ya kɛ yen tumɛ min, anu ko, “Ma tigi, i ye a fɛ, ma ni tɛ kele ka bɔ san-kole rɔ anu halaki-koe la, wa?”

⁵⁵ Yisa ya a tintan anu na ka anu makuma. [Yisa ko, “Wo ma a lɔn wo sɔndɔmɛnu bi nya min. Nde, Hadama-dan ma na ka mɔgɛnu niyi kasara kɔnɔ fɔ ka anu kisi.”]

⁵⁶ Anu tara so-gbɛrɛkɛ rɔ.

Minnu Bi A fɛ ka Bila Yisa Fɛ

⁵⁷ Anu bi kilɛ la tumɛ min, kei do ya a fɔ Yisa ye ko, “I tara kan-bo-kan, n tabɛnnɛ ka bila i fɛ nyɔ.”

⁵⁸ Yisa ya a fɔ a ye ko, “Farannu bi banbannu bolo anu si ki kan min. Kona-nyagannu bi konanu bolo fanan kɔnɔ kun sa tinɛ sa nde, Hadama-dan bolo.”

⁵⁹ Yisa ya a fɔ kei do ye ko, “Bila n fɛ.” Kɔnɔ wo ko, “N fa, sɔn, n ni ta n fa togon fɔlɔn.”

⁶⁰ Yisa ya a yabi ko, “Mɔgɔ-faganɛnu ni anuna mɔgɔ-faganɛ togon. Ile ni ta ka Allala-mansayɛ-kawandili bɔ.”

⁶¹ Kei-gbɛrɛkɛ ko, “N fa, n si ta i fɛ kɔnɔ sɔn, n ni ta fɔlɔn ka n masara nna denbayɛ la.”

⁶² Yisa ya a fɔ wo ye ko, “Mɔgɔ-wo-mɔgɔ ya sara-ninki bi dugu-wɔrɔ tinɛ, ni a tora a yɛ lasɛgila a kɔma, wo ti bɛn Allala mansayɛ ma.”