Luka 7 - ALLALA KUMƐ

Romu Kɛlɛ-Den-Kun-Tigila Wɔli-Kɛlɛ Lakɛndɛya-Koe

¹ Yisa banta kɛ bɛɛ fɔla mɔgɛnu ye tumɛ min, a tara Kapereniyam soe burɔ.

² Romu kɛlɛ-den-kun-tigi do ye nyɔ, wola wɔli-kɛlɛ kirɛ, ado wɔli-kɛlɛ wo di a ye kati! A tora doni, ko a si faga.

³ Kun-tigi wo ya Yisa wara-koe lamɔɛn tumɛ min, a ya Yahudiyanuna kun-tigi donu nata Yisa wara ka a madiya ko a ni na ala wɔli-kɛlɛ dandan.

⁴ Anu nara Yisa madiya bɛrɛkɛ, anu ko, “A bɛnnɛ i ni kei kɛ dɛnbɛ

⁵ bawo mala mɔgɛnu di a ye kati! A kelen pe le ya mala dina-bɔn sɔ ma ye.”

⁶ Yisa bilara anu fɛ. A gbɛrɛnta bɔn ma tumɛ min, kun-tigi wo ya a diyana-mɔgɛ donu nata a wara ka a fɔ a ye ko, “N fa, ma diyana-mɔgɛ ko i kana i nyɛrɛ tɔrɔ. A ko a ma bɛn, ile ni i salɛ ladon ale sufala bɔn la.

⁷ A ko ale ma sɛninya ka na ke i ma. Hali i kumara le dɔrɔn, ala wɔli-kɛlɛ si kɛndɛya!

⁸ Ale fanan bi kun-tigi donuna sɛnbɛ kɔrɔ. Kɛlɛ-dan donu bi ale kɔrɔ. A ko a wa a fɔ do ye ko, ‘Ta!’ A si ta. A wa a fɔ do ye ko, ‘Na!’ A si na. A wa a fɔ ala yɔɔn do ye ko, ‘Kɛ ma!’ A si wo ma.”

⁹ Yisa ya kɛ lamɔɛn tumɛ min, a kawara. A ya a yɛ lamunun a gba-fɛ-bilalɛnu na ko, “Wo ni wo hɛnkili to kɛ ko! N ma kɛ-nyɔgɔ-dɛnkɛninyɛ yen mɔgɔ-wo-mɔgɔ bolo Isirɛla mɔgɛnu tɛma.”

¹⁰ Kilayɛnu sɛgira kun-tigi wola bɔn la. Anu ya a taran, ala wɔli-kɛlɛ ara kɛndɛya.

Kɛɛ-Musila Dan Lawuli-Koe

¹¹ Wo banda kɛ, Yisa tara soe do rɔ min tɔgɔ Nen. Ala karan-dannu anubɛ nyama-ba bilara a fɛ.

¹² Anu kera so-tarɛ-don-dɛ la tumɛ min, anu ya a taran, mɔgɛnu bi tala furi do la a togon tinɛ, ado kɛɛ-musila den-kei kelen pe, wo le fagara. Nyɔ-mɔgɔ siyaman bilanɛ musi wo fɛ.

¹³ Mari ya musi wo yen tumɛ min, a kinikinita a ma bɛrɛkɛ! A ya a fɔ musi wo ye ko, “I kana di.”

¹⁴ A tara ka a bole tugu sangbagɛ la. Furu-dununɛ wonu ya anu sɔ. Yisa ko, “Keminɛ! N bi ile le ma, i lasɔ!”

¹⁵ Furi wo ya a lasɔ ka wuli kumala. Yisa ya a don a na bolo tun.

¹⁶ Mɔgɛ bɛɛ kilanta bɛrɛkɛ! Anu ya Alla tanto ko, “Nɛbi-ba ara bɔ gbɛ rɔ ma tɛma! Alla ara na ala mɔgɛnu kisi tinɛ!”

¹⁷ A mankan nyɛnsɛnta Yudiya tonke bɛɛ rɔ anubɛ nyɔla foolɛ bɛɛ.

Yɔni-Batasi-Kɛlɛla Kilayɛnu

¹⁸ Yɔnila karan-dannu ya koe kɛ bɛɛ rakaran a ye. Yɔni ya mɔgɔ fila kele anu tɔ

¹⁹ ko anu ni ta Mari manyinika ni a ya minna na-koe fɔ, ni ale le wo la, ka, ma ni dogbɛrɛ makɔni?

²⁰ Anu nara Yisa wara tumɛ min, anu ko, “Yɔni-Batasi-Kɛlɛ le ya ma sɔ ko ma ni i manyinika ko a ya minna na-koe fɔ, ni ile le wo la, ka, ma ni dogbɛrɛ makɔni?”

²¹ Wo wati, Yisa ye mɔgɔ siyaman dandanna ka kirayatoenu anubɛ nyina-yogoma-tiginu nakɛndɛya. A ya fiyɔn siyaman yɛ laka.

²² A ya Yɔnila kilayɛnu yabi ko, “Wo ye min namɔɛnna ka min tayen wo nyɛrɛ yɛ la, wo sɛgi ka wo dantɛgɛ Yɔni ye. Fiyɔnnu bi fen yenna. Namarɛnu bi tagamana. Fɛrɛma-kirayatoenu bara kɛndɛya. Tolo-gberenu bi ko lamɔɛnna. Furinu na ara wuli. Kibara-nyimɛ ara bɔ bolo-kolɔnnu ye.

²³ Sika sa min tɔ ndela ko la, duwa-dan le wo tigi la!”

²⁴ Kilayɛnu sɛgira tumɛ min, Yisa wulita Yɔnila koe fɔla nyama ye. A ko, “Wo tara Yɔni wara wulɛ rɔ tumɛ min, wo miriya ye nfen yen-koe ma nun? Fɔnyɔ ye kalɛ min namagala nun, ba? Wo dɔrɔn?

²⁵ Wo tara nfen yen-koe la worɔ? Kei min fɛrɛya bɔnɛ kura-nyimɛ la, wa? Ade, mɔgɔ fɛrɛya bɔnɛ sufa wonu bi mansɛla bolɔnnu na!

²⁶ Wo ni a fɔ n ye, wo miriya ye nfen yen-koe ma nun? Nɛbi, wa? Ɔnde kɔnɔ n bi a fɔla wo ye, wo ara min yen, wo tenbira nɛbi la,

²⁷ ado a sɛbɛnɛ Allata kitabu rɔ Yɔni lela ko la nun ko ala kilayɛ le Yɔni kɛ la. A ko, ‘N bi nna kilayɛ latala i yarɔ ka kilɛ laka i ye.’ ”

²⁸ Yisa ya a fɔ tun ko, “N ni kɛ fɔ wo ye. Yɔni makawanɛ ka tenbi mɔgɛ bɛɛ la nun. Kɔnɔ min dɔgɔ Allala mansayɛ rɔ, wo makawara Yɔni ko.”

²⁹ Mɔgɛ bɛɛ ya kɛ lamɔɛn hali duti-makelelɛnu. Wonu ya Yisala kumɛ lamɔɛn tumɛ min, anu ya a lɔn ko Allala kilɛ telenta bawo anu bara sɔn nun ko Yɔni ni anu batasi.

³⁰ Kɔnɔ Farisinu anubɛ tɔn-karan-mɔgɛnu ya anu ban Allala ko-latɛgɛnɛ ma min tabɛnnɛ anu ye bawo anu denu ma sɔn nun ko Yɔni ni anu batasi.

³¹ Yisa ko, “N si bi-tele-kɛ-mɔgɛnu sanka nfen ma, wa? Anu bi kama?

³² Anu mani de iko dennɛ minnu bi tolonna barɛ rɔ. Dennɛnu bi anu kan nabɔla anu ta-nyɔgɛnu ma. Anu bi a fɔla ko, ‘Ma ara kɔnyɔ-masɔ-sigi sa wo ye kɔnɔ wo ma wo dɔn! Ma ara saya-sigi sa wo ye kɔnɔ wo ma di!’

³³ Yɔni-Batasi-Kɛlɛ nara tumɛ min, a ya sunyɛ don, a ma gbɛɛ min. Wo ko, ‘Nyinatoe le!’

³⁴ Nde, Hadama-dan nara tumɛ min, n ya fen-dɔn-kɛ ka n min. Wo ko, ‘Kei kɛ mafɛlɛn! Nugulamɛ anubɛ gbɛɛ-minnɛ le. Duti-makelelɛnu anubɛ hakɛ-tiginu diyana-mɔgɛ le!’

³⁵ Hali wo, Allata hɛnkilimayɛ si lɔn tonyɛ la ka a tɛgɛ a gba-fɛ-bilalɛnu kɛ-nyanu fɛ.”

Yisa Ta-Koe Saimon Farisi Warɛ

³⁶ Farisi do ya Yisa kele fen dɔn tinɛ a warɛ. Yisa tara kɛ wola bɔn la. A ya a mayigi fen dɔn tinɛ.

³⁷ Musi do ye nyɔ nun, hakɛ-tigi-wɛ le wo la. A ya a lamɔɛn ko Yisa ye fen dɔnla Farisila bɔn la. Nba, kuru-dagɛ min tɔgɛ alabasita, a nara sɛnti-sɔnkɔ-da-gbɛlɛ la wo rɔ.

³⁸ A sɔra Yisa kɔma a kian tɔgɔfɛ. A dira. A ya-yi yigira biribiri, ka Yisa kian kimɛ. Wo kɔma, a ya a kian mafiran a kun-sigi la. A ya a kian sunbu ka sɛnti kɛ anu ma.

³⁹ Ale Farisi kei min ya Yisa kele, wo ya kɛ yen tumɛ min, a miriya tara ko, “Ni nɛbi-bɛrɛ le kei kɛ la nun, musi kɛ min tugura a la, a si musi kɛ wara-koe lɔn nun. A si musi kɛ su lɔn nun bawo hakɛ-tigi le wo la!”

⁴⁰ Yisa ya a fɔ a ye ko, “Saimon, a sɔgɛ ye n na ka kumɛ do fɔ i ye.” A ko, “Karan-mɔgɔ, awa, a fɔ n ye.”

⁴¹ Yisa ya a fɔ a ye ko, “Kei do ye nyɔ nun min ya mɔgɔ fila dɔndɔ wodi la. Kelen ya wodi-gbɛ kɛmɛ loli bi a bolo, doi ya wodi-gbɛ bi-loli bi.

⁴² Anu filɛ fenfen ma ke a sarala, woletɔ a ya anu filɛ bɛɛ to nyɔ. Filɛ wonu tɔ, yon si yili-makelelɛ keni ka tenbi a ta-nyɔgɛ la?”

⁴³ Saimon ya a yabi ko, “N lanɛ a la ko minta yili kolo a bɔtɛ ko.” Yisa ko, “I wara n yabi a kilɛ fɛ.”

⁴⁴ Wo kɔma, Yisa ya a yɛ lamunun musi wo la ka a fɔ Saimon ye ko, “I ma musi kɛ yen? N bara na ila bɔn la, i ma n kin-maku-yi di n ma kɔnɔ ale ara n kian maku a ya-yi la ka a mafiran a kun-sigi la.

⁴⁵ N nara tumɛ min, i ma n sunbu kɔnɔ kebi n nara, ale ma n kin-sunbɛ boloka.

⁴⁶ I ma tuli di n ma n si n kunyɛ mamun min na kɔnɔ ale ara n kian mamun sɛnti la.

⁴⁷ N bi a fɔla i ye ko musi kɛ ara keninteyɛ min yira, wo ara bɔ gbɛ rɔ ko ala hakɛ siyamɛnu ma ara koto. Kɔnɔ minna hakɛ-nɛ makotora, wo si keninteyɛ dɔgɔmanɛ yira.”

⁴⁸ Wo kɔma, Yisa ya a fɔ musi ye ko, “Ila hakɛnu ma ara koto.”

⁴⁹ Doi minnu siginɛ tebulu fɛ, wonu wulita a fɔla anu nyɔgɔn ye ko, “Nfen mɔgɛ sifa kɛ la min bi mɔgɛnu hakɛnu makotola?”

⁵⁰ Kɔnɔ Yisa ya a fɔ musi wo ye ko, “Ila dɛnkɛninyɛ ara i kisi. Ta yisi-kimɛ rɔ.”