Luka 5 - ALLALA KUMƐ

Karan-Den Fɔlɔtɛnu Kele-Koe Yisa Bolo

¹ Wati do rɔ, Yisa sɔnɛ Kɛnɛsarɛti dalɛ dala. Mɔgɛnu ya anu gbɛrɛn a ma alako anu ni Allala kumɛ lamɔɛn.

² A ya kulun fila yen gbele ma. Yɛgɛ-biralɛnu bara bɔ anu tɔ ka ta anuna yalɛnu ku tinɛ.

³ Yisa donta kulɔn wo kelen tɔ, Saimontɛ, kɔni, ka a tigi madiya ko a ni a latuntun a ye doni yi kuma. Yisa sigira kulɔn rɔ. A wulita mɔgɛnu karanna.

⁴ A banta kumala tumɛ min, a ya a fɔ Saimon ye ko, “Kulɔn lata tungban tɛma. Wobɛ i ta-nyɔgɛnu ni wola yalɛnu nakɛ nyɔ ka yɛgɛ bira.”

⁵ Saimon ya a yabi ko, “Karan-mɔgɔ, ma kira wɔlila yan kɔnɔ ma ma fenfen bira. Hali wo, ni i wara a fɔ wo nya, n si yalɛnu nakɛ.”

⁶ Anu ya yalɛnu nakɛ ka yɛgɛ siyaman bira, ha yalɛnu wulita farala.

⁷ Anu ta-nyɔgɛ minnu bi kulɔn doi rɔ, anu ya wonu kele ko anu ni na anu dɛnbɛ. Anu nɛ, anu ya kulun filɛ bɛɛ lafa yɛgɛ la ha a tora doni, kulɔnnu ni yigi yi kɔrɔ.

⁸ Koe min mara, Saimon Pita ya wo yen tumɛ min, a ya a nyɛnkin Yisa kɔrɔ. A ko, “N fa, i yandi, i masɛgi n na bawo hakɛ-tigi le nde la!”

⁹ Ale anubɛ a ta-nyɔgɛ bɛɛ kawara yɛgɛ wonu ma.

¹⁰ Saimon ta-nyɔgɛnu, Sɛbɛdila dannu fanan kawara, Yemesi anubɛ Yɔni, kɔni. Yisa ya a fɔ Saimon ye ko, “I kana kilan. Ka a dabira bi ma, i si mɔgɛnu bira, yɛgɛ ma tun.”

¹¹ Anu nara kulɔn la gbele ma tun. Anu ya anuna miran bɛɛ bolokanɛ to ka bila Yisa fɛ.

Fɛrɛma-Kirayatoe Lakɛndɛya-Koe Yisa Bolo

¹² Yisa ye soe do burɔ tumɛ min, fɛrɛma-kirayatoe do ye nyɔ nun, ado fɛrɛma-kirayɛ ye a fɛrɛ bɛɛ ma. A ya Yisa yen tumɛ min, a ya a sa dugi ma Yisa kɔrɔ ka a madiya. A ko, “N fa, ni i sɔnta, i si ke n nakɛndɛyala.”

¹³ Yisa ya a bole sa a kuma. A ko, “N bara sɔn i lakɛndɛya-koe ma!” Kirayɛ wo ya a boloka kelenna!

¹⁴ Yisa ya a fɔ a ye ko, “I kana kɛ fɔ mɔgɔ-wo-mɔgɔ ye kɔnɔ ta saraka-masɔlɛ wara, a ni i mafɛlɛn. Wo kɔma, i ni sarakɛ wo bɔ iko Nɛbi Musa ya a fɔ nya min ka a yira mɔgɛ bɛɛ la ko i wara kɛndɛya.”

¹⁵ Hali wo, Yisa mankan nyɛnsɛnta kan tinɛ wo bɛɛ rɔ. Mɔgɔ siyaman nara ala kumɛ lamɔɛn tinɛ. Anu nara fanan alako anu si kɛndɛya nya min.

¹⁶ Kɔnɔ Yisa si to tala a dan na madiyali-kɛ-tinɛ tuma-wo-tuma.

Fɛrɛ Faganitoe Lakɛndɛya-Koe

¹⁷ Lunyɛ do, Yisa tenbi mɔgɛnu karanna, Farisi donubɛ tɔn-karan-mɔgɛnu siginɛ nyɔ minnu bɔra Kalili anubɛ Yudiya soe tɔnkɔn bɛɛ rɔ anubɛ Yerusalɛm. Marita sɛnbɛ ye Yisa rɔ ka kirayatoenu nakɛndɛya.

¹⁸ Mɔgɛ donu nara kei fɛrɛ-faganɛ la Yisa wara a sanɛ sanyili rɔ. Anu ya anu taya a ladon koe la bɔn la ka a sa Yisa kɔrɔ.

¹⁹ Kɔnɔ anu ma ke kilɛ sɔrɔnna nyama bolo ka a ladon. Woletɔ anu yɛlɛta a la bɔn kuma ka woe sɔgɔ alako anu si a layigi nya min sanyili rɔ mɔgɛnu tɛma Yisa yakɔrɔ.

²⁰ Yisa ya anuna dɛnkɛninya-wɛ yen tumɛ min, a ya a fɔ kirayatoe wo ye ko, “N bɔ, i hakɛnu ma ara koto.”

²¹ Tɔn-karan-mɔgɛnu anubɛ Farisinu wulita anu nyɔgɔn sɔsɔla ko, “Yon bi kei kɛ la min bi Alla lafɛyala? Mɔgɔ-wo-mɔgɔ ti ke hakɛ makotola fɔ Alla kelen pe!”

²² Yisa ya anu miriya ragbɛ. A ya a fɔ anu ye ko, “Wo ye wo mirila ko-sufa kɛnu ma kama?

²³ Ka a fɔ ko, ‘I hakɛnu ma ara koto,’ anubɛ ka a fɔ ko, ‘I lasɔ ka tagama,’ nyamintan fɔɛ gbɛlɛ?

²⁴ N bi a yirala wo la worɔ ko sɛnbɛ ye nde, Hadama-dan bolo duninya rɔ ka hakɛnu makoto.” Woletɔ a ya a fɔ kei-fɛrɛ-faganɛ ye ko, “N bi a fɔla i ye, i lasɔ ka ila sanyili bi ka ta i warɛ.”

²⁵ Kei wo ya a lasɔ anu dama yala kelenna ka sanyili wo bi a sanɛ min tɔ nun. A sɛgira a warɛ Alla tantola.

²⁶ Anu dama kawara dɔgɔma-ma-de! Anu kilanta kati! Anu ya Alla tanto ko, “Ma ara nfen kabana-koe yen bi?”

Lifayi Kele-Koe

²⁷ Wo kɔma, Yisa bɔra luyi ma. A ya duti-makelelɛ do yen siginɛ ala wɔli-kɛ-tinɛ. A tɔgɛ Lifayi. Yisa ya a fɔ a ye ko, “Bila n fɛ.”

²⁸ Lifayi ya a lasɔ. A ya fan bɛɛ to nyɔ ka bila Yisa fɛ.

²⁹ Wo kɔma, Lifayi ya ladiya-wɛ ladan ala bɔn la Yisa ye. Duti-makelela siyaman anubɛ mɔgɔ-gbɛrɛ siyaman fanan sigira anu fɛ.

³⁰ Farisi anubɛ tɔn-karan-mɔgɛ minnu bi anu tɛma, wonu gbunyara Yisala karan-dannu ma ka anu manyinika ko, “Nfenna wo ye fan dɔnna duti-makelelɛnu anubɛ hakɛ-tiginu fɛ?”

³¹ Yisa ya anu yabi ko, “Minnu kɛndɛ, wonu mako sa bɛsi-bɔlɛ la fɔ minnu kirɛ.

³² N ma na mɔgɔ-telennɛnu kele tinɛ tubi-koe ma fɔ hakɛ-tiginu.”

Sun-Don-Koe Nyinikalɛ

³³ Mɔgɛ donu ya a fɔ Yisa ye ko, “Yɔni-Batasi-Kɛlɛla gba-fɛ-bilalɛnu bi sunyɛ donna tuma-wo-tuma ka madiyali kɛ. Farisinuna karan-dannu fanan bi wo mala. Kɔnɔ ilela karan-dannu bi fen-dɔn-kɛla ka anu min.”

³⁴ Yisa ya a fɔ anu ye ko, “A ye wo burɔ ko mɔgɛ minnu bi kɔnyɔ-masɔɛ rɔ, fananta kɔnyɔ-tigi ye anu fɛ, wonu si kɔnkɔ, wa? Wo ti ke mala ni!

³⁵ Kɔnɔ wati ye nala, kɔnyɔ-kura-tigi wa bɔ anu fɛ, sun-don-sɔgɛ si anu bira worɔ.”

³⁶ Yisa ya tili kɛ fanan tɛgɛ anu ye ko, “Mɔgɔ ti kura-kundu-kurɛ bi ka duruku-kɔrɛ labɛtɛrɛ wo la bawo a kurɛ wo ra si don ka duruku-kɔrɛ wo rafara, ado a kurɛ ti ma iko a kɔrɔmɛ.

³⁷ Mɔgɔ ti baan mara gbolo-bɔrɔ-kɔrɛ rɔ. Ni a ya wo ma, a wa kanfa, a si gbolo-bɔrɛ wo rafara. Baan wo si bɔn. Gbolo-bɔrɛ si tinya.

³⁸ Kɔnɔ baan la ni mara gbolo-bɔrɔ-kurɛ rɔ!

³⁹ Mɔgɔ wa baan-kɔrɛ min tumɛ min, a ti a kurɛ mafɛlɛn defan! Anu si a fɔ ko, ‘A kɔrɔmɛ le kin.’ ”