Luka 4 - ALLALA KUMƐ

Yisa Magbɛrɛnkɛ-Koe

¹ Yisa sɛgira ka bɔ Yorodan bɛ fɛ, a fanɛ Allata Ni-Sɛnimɛ la. Wo kɔma, Allata Ni-Sɛnimɛ tara a la wulɛ rɔ.

² Tele bi-nani kɔrɔ, Setanɛ ya a magbɛrɛnkɛ nyɔ. Wati wo bɛɛ kɔrɔ, Yisa ma fenfen dɔn, woletɔ kɔnkɛ ya a bira bɛrɛkɛ!

³ Setanɛ ya a fɔ a ye ko, “Ni Allata dan le ile la, kuri kɛ yɛlɛma biredi la.”

⁴ Yisa ya a yabi ko, “A sɛbɛnɛ Allata kitabu rɔ ko hadama-dan ti a to dɔntɛ dɔrɔn ma.”

⁵ Setanɛ tara a la ka duninya-mansayɛ bɛɛ yira a la nya-kun-kelen.

⁶ Setanɛ ya a fɔ a ye ko, “N si i sigi kɛ bɛɛ kun na ka nyɔ-gbiliyɛ bɛɛ di i ma bawo wo bɛɛ dinɛ nde le ma. Mɔgɛ min ba diya n ye, n si a bɛɛ di wo ma.

⁷ Ni i ya i nyɛnkin n kɔrɔ, kɛ bɛɛ si ma itɛ la.”

⁸ Yisa ya a yabi ko, “A sɛbɛnɛ Allata kitabu rɔ ko, ‘I ni ita Mari Alla kelen pe le bato ka ale kelen peta wɔlɛ kɛ!’ ”

⁹ Setanɛ tara Yisa la Yerusalɛm soe burɔ ka a sigi Alla-Bato-Bɔn kun-tɛma-sore kuma. A ya a fɔ a ye ko, “Ni Allala dan le ile la, i gban ka yigi dugi ma

¹⁰ bawo a sɛbɛnɛ Allata kitabu rɔ ko Alla si ala melika sɔ i lakanan tinɛ.

¹¹ A sɛbɛnɛ fanan ko anu si anu bole sigi i kɔrɔ alako i kana i kian gbesi kurinu na.”

¹² Yisa ya a yabi ko, “A sɛbɛnɛ Allata kitabu rɔ ko i kana ita Mari Alla kɔrɔbɔ.”

¹³ Setanɛ banta Yisa magbɛrɛnkɛna koe bɛɛ rɔ tumɛ min, a bɔra a fɛ wati-kundu-ni kɔrɔ.

Yisata Wɔlɛ Dabira-Koe Kalili Sigisɔn Rɔ

¹⁴ Wo kɔma, Yisa sɛgira Kalili sigisɔn rɔ. Allata Ni-Sɛnimɛ ye a fɛ. A mankan nyɛnsɛnta nyamanɛ wo bɛɛ rɔ.

¹⁵ A ya nyɔ-mɔgɛnu karan Yahudiya-dina-bɔnnu na, ado anu dama ya a wɔlɔbɔ.

Nasarɛti Kɛnu Ban-Koe Yisa La

¹⁶ Wo kɔma, Yisa tara Nasarɛti soe burɔ, a makolota kan min. Sulen-Tele ma, a wulita ka ta Yahudiya-dina-bɔn la iko a duruta a mala nya min. A ya a lasɔ alako a ni Allata kitabu karan anu ye.

¹⁷ Anu ya Nɛbi Aiseyala kitabu don a bolo. A ya kan tinɛ wo laka a sɛbɛnɛ kan min ko,

¹⁸ “Marita Sɛnbɛ ye n tɔ. A ara n yabɔ alako n ni kibara-nyimɛ lake bolo-kolɔnnu ma. Minnu bi biralɛ rɔ, a ya n sɔ ka wonu boloka-koe fɔ anu ye anubɛ ka fiyɔnnu yɛ laka. Nɔɛ sanɛ minnu kuma, n si wonu hɔrɔya.

¹⁹ Mɔgɛnu bi hɔrɔyala san min ma, Mari ya n sɔ ka wo wara-koe fɔ anu ye.”

²⁰ Yisa ya kitabu wo dɛ latogon ka a don a maralɛ bolo. A ya a mayigi. Min bɛɛ ye Yahudiya-dina-bɔn wo la, wonu ya anu yɛ sɔ a la.

²¹ A wulita kumala anu ye ko, “Allata kitabu kan tinɛ kɛ, wo ara bɔ-a-la bi iko n bara a karan wo ye nya min.”

²² Anu dama ya a tɔgɔ-nyimɛ fɔ ka kawa ala kuma-nyimɛnu ma. Anu ko, “Yusufula dan ma kɛ la, wa? Kɛ mara kama?”

²³ Yisa ya a fɔ anu ye ko, “N lanɛ a la serr, ko wo si na tili kɛ tɛgɛ n ye ko, ‘Bɛsi-bɔlɛ, i nyɛrɛ lakɛndɛya.’ Wo si a fɔ n ye fanan ko, ‘Ma ya koe minnu namɔɛn i wara-koe rɔ Kapereniyam soe burɔ, i ni wonu ma i nyɛrɛta soe burɔ yan fanan.’

²⁴ Wo ni wo hɛnkili to kɛ ko! Nɛbi ti gbiliyɛ sɔrɔn a nyɛrɛta soe burɔ.

²⁵ “Wo ni wo tole masɔ. Tonyɛ le, Nɛbi Ilayata wati rɔ, kɛɛ-musi siyaman bi Isirɛla mɔgɛnu tɛma nun. Bandɛ ma na san sawa anubɛ a tala tumɛ min, kɔnkɔ-fitinɛ donta dugi wo bɛɛ rɔ.

²⁶ Hali wo, Alla ma Nɛbi Ilaya lata mɔgɔ-wo-mɔgɔ ma fɔ kɛɛ-musu kelen ma. Isirɛla ka ma musi wo la min siginɛ Saidon Sarɛfati soe burɔ.

²⁷ Nɛbi Ilaisata wati rɔ, fɛrɛma-kirayato siyaman bi Isirɛla mɔgɛnu tɔ. Kɔnɔ wonu fenfen ma kɛndɛya fɔ Siriya kɛ Neyaman. Isirɛla ka ma ale fanan na.”

²⁸ Minnu bi Yahudiya-dina-bɔn la, wonu ya wo lamɔɛn tumɛ min, anu diminyara.

²⁹ Anu ya anu nasɔ ka Yisa gben ko a ni bɔ soe burɔ. Anuna soe sɔnɛ kuru-gbilɔn-ba min kuma, anu tara Yisa la nyɔ alako anu ni a labui filon rɔ.

³⁰ Kɔnɔ a tununta nyama ma ka ta a ye.

Nyina-Yogomɛ ye Kei min Fɛ

³¹ Wo kɔma, Yisa tara Kalili-Kapereniyam soe burɔ. A ke nyɔ, a ya mɔgɛnu karan Sulen-Tele ma.

³² A ya anu karan nya min, anu dama kawara wo ma bawo fanka ye ala kumɛ rɔ.

³³ Lunyɛ do, kei do ye Yahudiya-dina-bɔn la nun, nyina-yogomɛ ye min fɛ. A gbele-gbelenta ko,

³⁴ “E! Ile Yisa Nasarɛti kɛ, i ye nfen fɛ ma bolo? I nara yan ma halaki-koe la, wa? N ya ile lɔn. Allata kilaya-sɛnimɛ le ile la!”

³⁵ Yisa ya nyinɛ makuma, a ko, “A sigi-a-la! Bɔ a fɛ!” Nyinɛ ya kei labui anu dama yala. A bɔra a fɛ. A ma a madumɛ hali doni!

³⁶ Mɔgɛ bɛɛ kawara ka a fɔ anu nyɔgɔn ye ko, “Nfen kuma-sufa ye kɛ la? Kei kɛ ara kuma nyina-yogomɛnu ma sɛnbɛ anubɛ fanka la. Anu bi bɔla anu fɛ.”

³⁷ Yisa mankan nyɛnsɛnta nyamanɛ wo bɛɛ rɔ.

Mɔgɛ Siyaman Nakɛndɛya-Koe Yisa Bolo

³⁸ Yisa bɔra Yahudiya-dina-bɔn la ka ta Saimon warɛ. Fɛrɛma-kaliya-kirayɛ ye Saimon biran-musi la. Anu ya musi wo wara-koe fɔ Yisa ye.

³⁹ Yisa tara a sɔ nyɔ dafɛ a sanɛ kan min. A ya fɛrɛma-kaliyɛ wo makuma. A kɛndɛyara kelenna! A wulita tiriya ka wɔlɛ kɛ anu ye.

⁴⁰ Tele yigi wati, kirayatoe ye mɔgɛ min bɛɛ bolo kiraya-su bɛɛ, anu nara wonu na Yisa wara. A ya a bole sa anu dama kuma ka anu nakɛndɛya.

⁴¹ Nyinɛnu fanan gbele-gbelenmatoe bɔra nyinatoenu fɛ, anu ko, “Allala dan le ile la!” Anu ya a lɔn Allata-Mɔgɔ-Yabɔnɛ la min kɛ, Yisa ya a fɔ anu ye ko anu kana kuma.

Kawandili Bɔ-Koe Yudiya Nyamanɛ Rɔ

⁴² Banda-ka-dɛ ma, Yisa bɔra soe burɔ ka ta a dan na kan tinɛ do rɔ. Mɔgɛnu ya a nyinɛ dabira. Anu ya a yen tumɛ min, anu ya a madiya alako a kana ta.

⁴³ Kɔnɔ a ya a fɔ anu ye ko, “A fɛrɛ sa fɔ n ni Allala mansayɛ kibara-nyimɛ lake soe donu fanan tɔ bawo Alla ya n sɔ wo lela ko la.”

⁴⁴ Nba, a ya kawandili bɔ Yahudiya-dina-bɔnnu na Yudiya nyamanɛ rɔ.