Luka 3 - ALLALA KUMƐ

Yɔni-Batasi-Kɛlɛla Kawandilɛ

¹ Mansa-Ba Taibiriyasi, Romu kun-tigi-ba, kɔni, wola mansayɛ san tan-ni-loli nyɔgɛ ma, Pontiyasi Pailɛti fanan bi kun-tigiyɛ la Yahudiya nyamanɛ rɔ, ado Mansa Hɛrodi ye mansayɛ la Kalili sigisɔn kun na. A na-kelen-nyɔgɛ Mansa Filipi ye mansayɛ la Aituriya anubɛ Tarakoniti sigisɔnnu kun na. Mansa Laiseniya ye mansayɛ la Abilin sigisɔn kun na.

² Anasi anubɛ Kaifasi, wonu fanan bi saraka-masɔlaya-kun-tigi-wayɛ la. Alla kumara Sakarayala dan Yɔni ye wulɛ rɔ wo wati le tɔ.

³ Ale Yɔni kera Yorodan bɛ tɔnkɔn bɛɛ rɔ. A ya kawandilɛ bɔ ko, “Wo ni tubi ka wo kɛ-nyanu yɛlɛma ka sɔn batasi-koe ma. Alla si wola hakɛnu makoto.”

⁴ Iko Nɛbi Aiseya ya a sɛbɛ ala kitabu rɔ nya min, a ko, “Mɔgɛ do ye gbele-gbelenna wulɛ rɔ. A ye a fɔla ko, ‘Bɛɛ ni kilɛ laka Mari ye. Bɛɛ ni kila-latelennɛ ladan a ye!

⁵ Anu ni fole bɛɛ lafa ka kɔnkɛ anubɛ gburukuli bɛɛ tii alako anu ni ma lɛɛ la. Anu ni kila-radunɛ bɛɛ latelen ka kila-gbɔgɔsa-gbagasɛ bɛɛ manunku.

⁶ Wo si a ma, mɔgɛ bɛɛ si Allala kisi-koe yen!’ ”

⁷ Sɛrɛ-belebele tora nala Yɔni wara dɛɛ, ko a ni anu batasi. A ya a fɔ anu ye ko, “Wo sɔn yogo iko duguma-fannu. Allala diminyɛ min bi nala, yon ya a fɔ wo ye ko wo si ke bɔla wo kɔrɔ?

⁸ Koe minnu si a yira ko wo ara wo kɛ-nyanu yɛlɛma, wo ni wonu kɛ. Wo kana to a fɔla wo nyɔgɔn tɛma ko Iburayima manɛ wo benba la min kɛ, wo ti tɔrɔyɛ sɔrɔn. N bi a fɔla wo ye ko hali kuri kɛnu, Alla si ke wonu mala dannu na Iburayima ye!

⁹ Yende ra ara bɛn ka kɔlɔma-kurinu tɛgɛ anu sulinu tɔ. Kɔlɔma min ti gbɔ-nyimɛ labɔ, a bɛnta, wo ni tɛgɛ ka a lakɛ tɛ rɔ.”

¹⁰ Mɔgɛnu ya a manyinika ko, “Ma ni nfen ma worɔ?”

¹¹ A ya anu yabi ko, “Duruku fila ye min bolo, fen sa min bolo, a ni kelen di wo ma. Dɔn-fan ye min bolo, a ni mɔgɛnu kɔ.”

¹² Duti-makelelɛ donu nara batasi-koe la. Anu ya Yɔni manyinika ko, “Karan-mɔgɔ, male ni nfen ma?”

¹³ A ya a fɔ anu ye ko, “Wo kana fen makele ka tenbi a dan kun na.”

¹⁴ Kɛlɛ-dan donu fanan ya a manyinika ko, “Male don? Male ni nfen ma?” A ya a fɔ wonu ye ko, “Wo kana wodi bɔ mɔgɛnu bolo fɔrɔsɛ la anubɛ foninyɛ la. Wo sarɛ ni wo wasa.”

¹⁵ Mɔgɛnu miriya tara Allata-Mɔgɔ-Yabɔnɛ ma. Anu suira Yɔni ma ko tumado ale le kɛ la.

¹⁶ Woletɔ Yɔni ya a fɔ anu dama ye ko, “N bi wo batasila yi rɔ kɔnɔ mɔgɛ do ye nala min tenbira nde la. Hali ka ala sanbarɛ fulen a kian rɔ, nde ma bɛn ka wo ma. Wo si wo batasi Allata Ni-Sɛnimɛ anubɛ tɛ la.

¹⁷ Ala fɛrɛ ye a bolo ka ala fui-fan funfan alako a si anu sa ala birɛ rɔ nya min. Kɔnɔ a si a fofenu mintan ta-dufenbɛlɛ la!”

¹⁸ Yɔni ya kawandilɛ siyaman bɔ kibara-nyimɛ lake tinɛ mɔgɛnu ma.

¹⁹ Kɔnɔ Yɔni kumara Mansa Hɛrodi ma bawo a ya a na-kelen-nyɔgɛla musi bi a bolo, Hɛrodiyasi, kɔni, ado a ara ko-yogomɛ siyaman kɛ fanan.

²⁰ Nba, tɔ-a-la, Hɛrodi ya ko-yogomɛ dan natenbi ka Yɔni sa yele la.

Yisa Batasi-Koe

²¹ Yɔni banta sɛrɛ bɛɛ batasila lunyɛ min, wo kɔma, a ya Yisa fanan batasi. Yisa ye Alla madiyala tumɛ min, Arinyɛnɛ dɛ lakara.

²² Allata Ni-Sɛnimɛ yigira Yisa kuma kangbɔɛla muninyɛ rɔ. Kuman-kan bɔra Arinyɛni tɔ ko, “N diyana-dan le ile la. I wara n hɛnɛ feu!”

Yisa Benba Bɔnsɔn

²³ Yisa ya san bi-sawa bɔ tumɛ min, a ya ala wɔlɛ dabira. Mɔgɛnu miriya ko Yusufula dan le Yisa la. Yusufu fa le Hilayi la,

²⁴ Hilayi fanan fa le Matati la, Matati fanan fa le Lifayi la, Lifayi fanan fa le Mɛlikayi la, Mɛlikayi fanan fa le Yanayi la, Yanayi fanan fa le Yusufu la,

²⁵ Yusufu fanan fa le Matataya la, Matataya fanan fa le Emɔsi la, Emɔsi fanan fa le Nehami la, Nehami fanan fa le Ɛsili la, Ɛsili fanan fa le Nagayi la,

²⁶ Nagayi fanan fa le Meyati la, Meyati fanan fa le Matataya la, Matataya fanan fa le Sɛmɛni la, Sɛmɛni fanan fa le Yosɛki la, Yosɛki fanan fa le Yoda la,

²⁷ Yoda fanan fa le Yowana la, Yowana fanan fa le Risa la, Risa fanan fa le Sarababulu la, Sarababulu fanan fa le Siyalitiyɛli la, Siyalitiyɛli fanan fa le Nirayi la,

²⁸ Nirayi fanan fa le Mɛlikayi la, Mɛlikayi fanan fa le Adayi la, Adayi fanan fa le Kosam la, Kosam fanan fa le Ɛlimodam la, Ɛlimodam fanan fa le Ɛri la,

²⁹ Ɛri fanan fa le Yasowa la, Yasowa fanan fa le Ɛliyesa la, Ɛliyesa fanan fa le Yorim la, Yorim fanan fa le Matati la, Matati fanan fa le Lifayi la,

³⁰ Lifayi fanan fa le Simiyɔn la, Simiyɔn fanan fa le Yuda la, Yuda fanan fa le Yusufu la, Yusufu fanan fa le Yonan la, Yonan fanan fa le Ilayakim la,

³¹ Ilayakim fanan fa le Mɛlɛya la, Mɛlɛya fanan fa le Minan la, Minan fanan fa le Matata la, Matata fanan fa le Netan la, Netan fanan fa le Dawuda la,

³² Dawuda fanan fa le Yɛsi la, Yɛsi fanan fa le Obɛdi la, Obɛdi fanan fa le Bohasi la, Bohasi fanan fa le Salaman la, Salaman fanan fa le Neson la,

³³ Neson fanan fa le Aminadabu la, Aminadabu fanan fa le Adimin la, Adimin fanan fa le Arani la, Arani fanan fa le Hɛsirɔm la, Hɛsirɔm fanan fa le Parɛsi la, Parɛsi fanan fa le Yuda la,

³⁴ Yuda fanan fa le Yakoba la, Yakoba fanan fa le Isiyaka la, Isiyaka fanan fa le Iburayima la, Iburayima fanan fa le Tɛra la, Tɛra fanan fa le Nehori la,

³⁵ Nehori fanan fa le Sɛrugi la, Sɛrugi fanan fa le Riyu la, Riyu fanan fa le Fara la, Fara fanan fa le Hibera la, Hibera fanan fa le Sela la,

³⁶ Sela fanan fa le Keyanan la, Keyanan fanan fa le Arafakasada la, Arafakasada fanan fa le Sɛma la, Sɛma fanan fa le Nowa la, Nowa fanan fa le Lamɛki la,

³⁷ Lamɛki fanan fa le Metusayɛli la, Metusayɛli fanan fa le Inɔki la, Inɔki fanan fa le Yɛrɛdi la, Yɛrɛdi fanan fa le Mahalalɛli la, Mahalalɛli fanan fa le Keyana la,

³⁸ Keyana fanan fa le Inɔsi la, Inɔsi fanan fa le Sɛti la, Sɛti fanan fa le Hadama la, min bi Allala dan la.