Luka 23 - ALLALA KUMƐ

Yisa ye Pailɛti Yakɔrɔ Tumɛ Min

¹ Kun-tiginu ya anu nasɔ. Anu tara Yisa la Pailɛti wara.

² Anu ya a maburɛ dabira. Anu ko, “Ma ya kei kɛ bira bawo a ye mala mɔgɛnu nasamala. A ye a fɔla anu ye ko anu kana duti di Romu kun-tigi-wɛ ma. A ko ale nyɛrɛ le Allata-Mɔgɔ-Yabɔnɛ la, mansɛ, kɔni.”

³ Pailɛti ya a manyinika ko, “Yahudiyanuna mansɛ le ile la, wa?” Yisa ya a yabi ko, “Ɔn, a ye iko i wara a fɔ nya min.”

⁴ Wo kɔma, Pailɛti ya a fɔ saraka-masɔla-wɛnu anubɛ nyama ye ko, “N ma kei kɛ yiliki-nya yen hali!”

⁵ Anu ya anu taya bɛrɛkɛ! Anu ko, “A wulita mɔgɛnu namurutiyala ala karan fɛ Yudiya nyamanɛ bɛɛ rɔ. A ya wo dabira Kalili, ado a ara na yan de gbɛ!”

Yisa ye Mansa Hɛrodi Yakɔrɔ Tumɛ Min

⁶ Pailɛti ya kɛ lamɔɛn tumɛ min, a ya nyinikali kɛ ko, “Kalili kɛ le kei kɛ la worɔ?”

⁷ A ya a lamɔɛn tumɛ min ko Yisa bɔra Mansa Hɛrodila nyamanɛ le tɔ, a ya a lata nyɔ-kun-tigi, Hɛrodi ma. Wo wati ya a taran, ale fanan ye Yerusalɛm soe burɔ.

⁸ Mansa Hɛrodi ya Yisa yen tumɛ min, wo ya a hɛnɛ bɛrɛkɛ, bawo a ara Yisa wara-koe lamɔɛn nun. Wati-yan-kɔrɔ, a yen-sɔgɛ ye a la nun. A sɔgɛ ye a la ka Yisa yen kabana-koe do kɛla.

⁹ Woletɔ Hɛrodi ya Yisa manyinika siyaman-kɛ. Kɔnɔ hali dafa, Yisa ma a tɛgɛ.

¹⁰ Saraka-masɔla-wɛnu anubɛ tɔn-karan-mɔgɛnu ya anu nasɔ ka Yisa maburi a nya ma!

¹¹ Mansa Hɛrodi anubɛ ala kandannɛnu ya Yisa mayɛlɛn ka a manyini kati! Anu ya duruku-nyimɛ bila a kan na ka a lasɛgi Pailɛti ma.

¹² Mansa Hɛrodi anubɛ Pailɛti mara diyana-mɔgɛnu na wo wati le tɔ, ado anu ma di anu nyɔgɛ ye nun mumɛ!

Yisa Faga-Koe Latɛgɛ-Koe

¹³ Pailɛti ya saraka-masɔla-wɛnu anubɛ kun-tiginu anubɛ a mɔgɔ-toenu nadɛn anu nyɔgɔn fɛ

¹⁴ ka a fɔ anu ye ko, “Wo nara kei kɛ la n bara bawo wo ko a ye mɔgɛnu nasamala nun. Nba, n bara a fɛsɛfɛsɛ wo yala yan. Wo ya a maburi ko-yogomɛ minnu na, n ma a sɔn yen hali!

¹⁵ Mansa Hɛrodi fanan ma a sɔn yen bawo a ara a lasɛgi ma ma. Kei kɛ ma ko-wo-ko ma a si faga minna ko la.

¹⁶ Nba, n si a gbesi worɔ ka a boloka.” [

¹⁷ Kanan-Ko-Ladiya-wo-Kanan-Ko-Ladiya, Pailɛti duruta mɔgɔ kelen bolokala ka bɔ yele la anu ye.]

¹⁸ Kɔnɔ bɛɛ sɔnkɔra a ma. Anu ko, “Ale faga! I ni Barabasi boloka ma ye!” (

¹⁹ Anu ya Barabasi min sa yele la, a ya mɔgɛnu namurutiya Yerusalɛm kun-tiginu kan ma, ado mɔgɔ-fagalɛ le ale la.)

²⁰ Hali wo, a sɔgɛ ye Pailɛti la ka Yisa boloka, woletɔ a ya nyama kele tun.

²¹ Kɔnɔ anu ya sɔnkɛ layɛlɛ tun ko, “A gbangban kɔlɔma ma, a gbangban kɔlɔma ma!”

²² Pailɛti ya a fɔ anu ye a kinyama sawa nyɔgɛ ko, “A ya ko-yogomɛ-nyamintan kɛ n si a faga minna ko la? N bi a gbesila ka a boloka.”

²³ Kɔnɔ anu tora wɔyɔ layɛlɛla ko, “Yisa ni gbangban kɔlɔma ma.” Tɔ-a-la, anuna kumɛ ya sɛnbɛ sɔrɔn.

²⁴ Wo le ya ma, Pailɛti ya Yisala kiti tɛgɛ iko anu ya a fɔ a ye nya min.

²⁵ Anu ya kei min sa yele la murutiyɛ anubɛ mɔgɔ-fagɛla ko la, min boloka-sɔgɛ ye anu na, kɔni, Pailɛti ya wo boloka. Kɔnɔ a ya Yisa don anu bolo alako anu ni anu diyana-koe ma a la.

Yisa Gbangban-Koe Kɔlɔma Ma

²⁶ Anu tara Yisa la anu bolo. Anu bi tala tumɛ min, anu bɛnta kei do la min tɔgɛ Saimon, Sairini kɛ le. A bɔmatoe sɛnɛ rɔ ka ta soe. Kɛlɛ-dannu ya a bira fɔrɔsɛ la ka Yisa faga-kɔlɔma sa a kuma ko a ni bila Yisa fɛ.

²⁷ Nyama-belebele bilara a fɛ. Musi donu bi anu tɛma nun, wonu bi wɔrɔndɔla ka di ala ko la.

²⁸ Yisa ya a yɛ lamunun anu na ka a fɔ anu ye ko, “Wole Yerusalɛm musinu! Wo kana di ndela ko la. Wo ni di wo nyɛrɛ anubɛ wola dannuna ko la,

²⁹ ado wati do ye nala, mɔgɛnu si a fɔ ko, ‘Musi minnu ma den sɔrɔn, minnu ma den susun, hɛrɛ ye wonu fɛ!’

³⁰ Mɔgɛnu si a fɔ kɔnkɛnu ye wulɔn ko, ‘Wo ni bui ma kuma!’ Anu si a fɔ gburukulinu ye ko, ‘Wo ni ma yamatogon,’

³¹ ado kɛ ko-sufa, ni a mara, kɔlɔmanu ma gbala wɛ, anu ba gbala tumɛ min, wo si ma kama?”

³² Anu ya ko-yogoma-kɛla fila fanan bi ko anu ni Yisa anubɛ anu denu faga anu nyɔgɔn fɛ.

³³ Kan tinɛ min tɔgɛ “Kun-kole,” anu kera nyɔ ma tumɛ min, anu ya Yisa gbangban kɔlɔma ma nyɔ anubɛ ko-yogoma-kɛla filɛ wonu, kelen a bolo-nyimɛ rɔ, kelen a bolo-maran rɔ.

³⁴ Yisa ko, “N Fa, nyama kɛ makoto bawo anu bi min mala, anu ma a lɔn!” Kɛlɛ-dannu ya ala kurɛnu fara anu nyɔgɔn tɛma koron-nakɛ fɛ.

³⁵ Mɔgɛnu sɔra a mafɛlɛn tinɛ. Yahudiyanuna kun-tiginu bi a mayɛlɛnna, anu ko, “A ya donu kisi kɔnɔ ni Allata-Mɔgɔ-Yabɔnɛ le ale la, alamɛ a ya a nyɛrɛ kisi!”

³⁶ Kɛlɛ-dannu fanan ya a mayɛlɛn. Anu nara a dafɛ ka gbɛɛ-kunayanɛ yira a la.

³⁷ Anu ko, “Ni Yahudiyanuna mansɛ le ile la, nba, i nyɛrɛ kisi gbɛ!”

³⁸ Anu ya kumɛ kɛ sɛbɛ a kuma ko, “Yahudiyanuna Mansɛ le kɛ la.”

³⁹ Ko-yogoma-kɛlɛ minnu dunnɛ nyɔ, wo kelen ya a manyini. A ko, “Allata-Mɔgɔ-Yabɔnɛ ma ile la, wa? I nyɛrɛ kisi anubɛ male fanan!”

⁴⁰ Kɔnɔ doi ya a makuma, a ko, “Ile ti kilan Alla la, wa? Ma dama ye yiliki kelan kɔrɔ yan.

⁴¹ Anu bi male tɔrɔla mala ko-yogomɛla ko la kɔnɔ ale ma fenfen ma!”

⁴² A ya a fɔ Yisa ye ko, “Yisa, i wa mansaya tumɛ min, i ni i fonde to n ko!”

⁴³ Yisa ya a fɔ a ye ko, “Wo ni wo hɛnkili to kɛ ko! Bi, i si ke kan-tina-ladiyanɛ rɔ nde fɛ.”

Yisa Niyi Bɔ-Koe

⁴⁴ Tele-latelan, tele ma sɔn bɔla. Pinpi burunta nyamanɛ kan tinɛ bɛɛ ha wurɛla-tumɛ la, hawa sawa kɔrɔ.

⁴⁵ Yorolan min dunnɛ Alla-Bato-Bɔn tɛma, wo farata fila la.

⁴⁶ Yisa ya a kan labɔ bɛrɛkɛ! A ko, “N Fa! N bara n niyi latenbi i ma!” A ban kɛ fɔla, a ya a niyi-laban lafɛ.

⁴⁷ Kɛlɛ-dannuna kun-tigi ya wo yen nkɛkuna, wo ya Alla tanto, a ko, “Mɔgɔ-latelennɛ le kei kɛ la serr!”

⁴⁸ Minnu nadɛnnɛ nyɔ ka koe kɛ ragbɛ, wonu ya wo yen tumɛ min, anu dama sɛgira anu barɛ. Anu bi anu kɔgɔ-dɛ matugula yisi-tinyɛ bolo.

⁴⁹ Min bɛɛ ya Yisa lɔn bɛrɛkɛ, ka a sa musinu kuma minnu bilara a fɛ ka bɔ Kalili, wonu sɔra wula-yan la doni koe kɛnu tagbɛ tinɛ.

Yisa Togon-Koe

^50-51 Kei do ye nyɔ min tɔgɛ Yusufu ka bɔ Yahudiyanuna soe do rɔ min tɔgɛ Arimatiya. Mɔgɔ-nyimɛ le kei wo la, ado Yahudiya mɔgɔ-ba do le. A ye Allala mansaya-na-koe makɔnɔna. Hali mɔgɔ-ba le ale la, a ma sɔn anuna ko-latɛgɛnɛ anubɛ anuna kɛwɔlɛnu ma.

⁵² A tara Pailɛti wara ko anu ni Yisa furi don a bolo.

⁵³ A ya Yisa furi layigi ka a kasankɛ linɛn-kurɛ la. Anu ya kanbɛ min sin kuru-faganɛ rɔ, furu ma sa wɛ min tɔ, a ya a sa nyɔ burɔ.

⁵⁴ Nyima le ma nun, anu tabɛn-wati Sulen-Telela ko la.

⁵⁵ Musi minnu bilara Yisa fɛ ka bɔ Kalili, wonu tara Yusufu fɛ Yisa kanba mafɛlɛn tinɛ ka a furi sa-bole yen a rɔ.

⁵⁶ Anu sɛgira anu barɛ ka sɛnti anubɛ mun-kɛ-tuli rabɛn a furi ye. Sulen-Tele ma, anu ya anu sulen iko tɔn ya a fɔ nya min.