Luka 21 - ALLALA KUMƐ

Kɛɛ-Musila Kɔ-Fan

¹ Yisa ye Alla-Bato-Bɔn la tumɛ min, a ya nɔnfulu-tigi donu yen, anu bi anuna kɔ-fannu sala wodi sa tinɛ rɔ nyɔ.

² A ya kɛɛ-musi bolo-kolɔn do fanan yen. A ye wodi-mɛsɛni fila sala a rɔ.

³ Yisa ko, “N bi a fɔla wo ye ko kɛɛ-musi bolo-kolɔn kɛ ara min sa, wo kolo doinu bɛɛtɛ ko.

⁴ Bawo doinu ya min sa, anu ya wo bɔ anuna nɔnfulu-wɛ denu tɔ. Kɔnɔ iko ale bolo-kolonyanɛ ye nya min, a ara a beli-fan bɛɛ sa a rɔ.”

Alla-Bato-Bɔn Wayan-Koe Fɔ-Koe

⁵ Ala karan-dan donu bi kumala nun ka a bɛn Alla-Bato-Bɔn wara-koe ma. Kuru-nyimɛ minnu bi nyɔ, anubɛ mɔgɛnu ya kɔ-fan minnu di Alla ma Bato Bɔnla ko la, anu bi kawala wonu ma. Yisa ko,

⁶ “Wo ye min bɛɛ yenna kɛ la, tumɛ ye nala, kuri kɛnu, hali kelen bɛrɛn ti to a gbɛ rɔ. A bɛɛ ra si nyɛnsɛn.”

Kawandili ka a Bɛn Tɔrɔyɛ Ma

⁷ Anu ya Yisa manyinika ko, “Karan-mɔgɔ, kɛ si ma tumɛ nyamintan? Tamasere nyamintan si a yira ma la ko a kɛ-tumɛ ara ke?”

⁸ Yisa ya a yabi ko, “Wo ni a ma wo fɛrɛma. Wo kana sɔn, mɔgɔ-wo-mɔgɔ ni wo mayuwaya bawo mɔgɔ siyaman si na n tɔgɛ rɔ ka a fɔ ko, ‘Ale le nde la!’ Anu si a fɔ fanan ko, ‘A wati ara ke!’ Kɔnɔ wo kana bila wonu fɛ.

⁹ Wo wa kɛlɛ-koenu anubɛ murutiya-koenu namɔɛn tumɛ min, wo kana kilan. A fɛrɛ sa fɔ wonu ni ma kɔnɔ ala ban ma wonu na fɔlɔn.”

¹⁰ Wo kɔma, Yisa ko, “Sibolo-gbɛrɛnu si wuli anu nyɔgɔn kan ma. Nyamanɛnu si wuli anu nyɔgɔn kan ma.

¹¹ Dugu-yɛrɛyɛran si kɛ anubɛ kɔnkɔ-fitinɛ anubɛ kiraya-fitinɛnu kan tina siyaman tɔ. Ko-makilannɛnu anubɛ tamasere-wɛnu si kɛ san-kole rɔ fanan.

¹² Kɔnɔ yanni koe kɛ bɛɛ ni ma, anu si wo bira ka wo bɛnsɛnkɔninya. Anu si wo ladon Yahudiya-dina-bɔnnu na ka wo kiti ka wo mara. Anu si ta wo la mansɛnu anubɛ kun-tiginu bara ndela ko la.

¹³ Wo si ma lafɛrɛ la wo ye ka kibara-nyimɛ lake.

¹⁴ Yanni a wati ni ke, wo ni wo hɛnkili masɔ ko wo si wo nyɛrɛ fɛka nya min, wo kana hɔn wola ko la

¹⁵ bawo n si kumɛnu don wo da rɔ ka hɛnkili di wo ma. Wo si min fɔ, hali wo yogo kelen ti ke wo sɔsɔla ka wo nɔ.

¹⁶ Wo sɔrɔnnɛnu wo, wo na-kelen-nyɔgɛnu wo, wo kebila-nyɔgɛnu wo, wo diyana-mɔgɛnu wo, wonu dama si wo don wo yogenu bolo tɔ, ado anu si donu faga wo rɔ.

¹⁷ Bɛɛ si wo kɔn ndela ko la

¹⁸ kɔnɔ hali wo, wo kun-sigi kelen bɛrɛn ti to-a-rɔ.

¹⁹ Wo ni wo sɔ yiri bawo wo si ni-bɛrɛ sɔrɔn wo le fɛ.

Yerusalɛm Kasara-Koe Fɔ-Koe

²⁰ “Wo wa Yerusalɛm lafoonɛ yen kɛlɛ-dannu na tumɛ min, wo si a lɔn worɔ ko a kasara-tumɛ ara gbɛrɛn.

²¹ Minnu bi Yudiya nyamanɛ rɔ, wonu ni anu buri kɔnkɛnu tɛma. Minnu bi soe burɔ, anu ni bɔ nyɔ rɔ. Minnu bi sɛnɛ rɔ, wonu kana sɛgi soe.

²² Wo bɛɛ si ma tɔrɔya-telenu na, ado Allata kitabu ya min fɔ, wo bɛɛ ni bɔ-a-la.

²³ Wo telenu tɔ, gbalo-belebele si na musu-kolomɛnu anubɛ denbɛnu kuma! Gbalo-yogoma-wɛ si na nyamanɛ kɛ rɔ. Allala diminyɛ si na mɔgɛ kɛnu kan ma.

²⁴ Donu si faga faan la. Donu si ta yɔɔnyɛ rɔ nyamanɛ bɛɛ rɔ. Sibolo-gbɛrɛnu si Yerusalɛm radɔn ha anuta wati ban tumɛ.

Hadama-Dan Na-Koe

²⁵ “Tamaserenu si sa tele anubɛ karɛ anubɛ lolenu ma. Duninya-mɔgɛ bɛɛ yigi si tɛgɛ ka kilan kɔgɔ-yi wɔyɔ-kan anubɛ a mɔrɔn-wɛla ko la.

²⁶ Min bi nala kɛla duninya bɛɛ rɔ, anu bi wo makɔnɔna. Mɔgɛnu kuma si kɔ ha anu ni kirɔn-a-la bawo san-koleta-sɛnbɛnu ta si maga ka bɔ anu gbɛ rɔ.

²⁷ Nba, nde, Hadama-dan si bɔ gbɛ rɔ wo wati rɔ. N bi nala banda-fin-gbɛ rɔ sɛnbɛ anubɛ gbiliya-ba rɔ.

²⁸ Koe kɛnu da wa bira tumɛ min, wo ni wo sɔ gben! Wo ni wo kunyɛnu nasɔ bawo wo kisi-tumɛ ara gbɛrɛn.”

Toro-Kurita Karan

²⁹ Wo kɔma, Yisa ya tili kɛ tɛgɛ anu ye. A ko, “Wo ni wo hɛnkili to toro-kuri anubɛ kɔlɔma-toe bɛɛ ko.

³⁰ Wo wa anu yen anu matiila tumɛ min, wo si a lɔn worɔ ko samɛ ara gbɛrɛn.

³¹ A ye wo nya na le, wo wa koe kɛ bɛɛ yen mala tumɛ min. Wo si a lɔn worɔ ko Allala mansayɛ na-tumɛ ara gbɛrɛn.

³² “Wo ni wo hɛnkili to kɛ ko! Minnu bi anu kɛndɛ la kɛ wati rɔ, yanni wo bɛɛ ni faga, koe kɛ bɛɛ si bɔ-a-la.

³³ San-kole anubɛ dugu-kole si tenbi kɔnɔ nna kumɛ ti tenbi mumɛ!

Ya Lakalan-Koe

³⁴ “Wo ni a ma wo fɛrɛma wo nyɛrɛla ko la! Wo kana wo nyɛrɛ ma nugulamɛ anubɛ gbɛɛ-minnɛnu na. Wo kana hɔn niyi-kɛ-koenu na. Ni wo ya wonu ma, tele wo si wo latɛrɛna.

³⁵ A si duninya-mɔgɛ bɛɛ latɛrɛna iko gbɛrɛ si soge latɛrɛna nya min.

³⁶ Wo ni wo yɛ lakalan ka madiyali kɛ tuma-wo-tuma alako wo ni sɛnbɛ sɔrɔn ka tanka koe kɛ bɛɛ ma minnu si ma. Wo ni sɛnbɛ sɔrɔn alako wo si wo sɔ nde, Hadama-dan yakɔrɔ nya min.”

³⁷ Tele-wo-tele, Yisa ye mɔgɛnu karanna Alla-Bato-Bɔn la. Suyi wa ke tumɛ min, a ni ta ki Ɔlifi kɔnkɛ kuma.

³⁸ Mɔgɛnu si suri subaga-dɛ ma ka ta Alla-Bato-Bɔn la anu tole masɔ tinɛ a la.