Luka 20 - ALLALA KUMƐ

Nyinikalɛ ka A Bɛn Yisala Sɛnbɛ Ma

¹ Lunyɛ do, Yisa ye mɔgɛnu karanna Alla-Bato-Bɔn la. A ye kibara-nyimɛ kawandilɛ bɔla tumɛ min, saraka-masɔla-wɛnu anubɛ tɔn-karan-mɔgɛnu anubɛ kɛmɔgɛnu nara a wara.

² Anu ya a manyinika ko, “I ye koe kɛnu kɛla sɛnbɛ min na, wo fɔ ma ye! Yon ya sɛnbɛ kɛ di i ma?”

³ Yisa ya anu yabi ko, “Nba, n ni wo manyinika ko kelen na. Wo ni wo fɔ n ye.

⁴ Yɔnila batasi-sɛnbɛ, wo bɔra Alla le bolo, ka, mɔgɛnu?”

⁵ Anu wulita anu nyɔgɔn sɔsɔla. Anu ko, “Ma si nfen fɔ? Ni ma ko, ‘A bɔra Alla le bolo,’ a si a fɔ ko, ‘Nfenna wo ma la Yɔni la?’

⁶ Kɔnɔ ni ma ko, ‘A bɔra mɔgɛ le bolo,’ nyama kɛ si ma mabon kuri la bawo anu lara a la ko nɛbi le ale Yɔni la nun.”

⁷ Woletɔ anu ya Yisa yabi ko anu ma sɛnbɛ wo bɔ tinɛ lɔn.

⁸ Yisa ya a fɔ anu ye ko, “Nba, nde fanan bi koe kɛnu kɛla sɛnbɛ min na, n ti wo fɔ wo ye.”

Ki-Fen Fɛ-Biralɛnuta Tili

⁹ Wo kɔma, Yisa ya tili kɛ tɛgɛ mɔgɛnu ye. A ko, “Mɔgɛ do ya ki-fannu ki ka mɔgɛ donu sinka a la. A tara wati-yan bɔ nyamani-gbɛrɛkɛ rɔ.

¹⁰ Anu gbɔɛ-keri-tumɛ kera tumɛ min, a ya ala wɔli-kɛlɛ do sɔ anu ma ko anu ni atɛ di a ma. Kɔnɔ anu ya wɔli-kɛlɛ wo gbesi ka a bolo lakolɔn lasɛgi.

¹¹ Wo kɔma, a ya wɔli-kɛla-gbɛrɛ sɔ. Anu ya wo fanan gbesi ka a lamiliya bɛrɛkɛ, ka a bolo-lakolɔn lasɛgi.

¹² A ya wɔli-kɛla sawa nyɔgɔn sɔ anu bara. Anu ya wo madumɛ fanan ka a gben nyɔ rɔ.

¹³ Wo kɔma, ki-fen-tigi ko, ‘N si nfen ma gbɛ? N si n diyana-dan sɔ anu bara. N lanɛ a la ko anu si wo gbiliya serr!’

¹⁴ Kɔnɔ anu ya wo yen tumɛ min, anu ya a fɔ anu nyɔgɛnu ye ko, ‘Ki-fen-tigila dan le kɛ la. Wo na, ma ni a faga. Ma si a bolo-fannu sɔrɔn worɔ!’

¹⁵ Woletɔ anu ya a gben ka bɔ ki-fannu tɛma ka a faga.” Yisa ya nyinikalɛ kɛ. A ko, “Ki-fen-tigi wo si nfen ma anu na worɔ?

¹⁶ A si na ka anu faga ka ki-fannu sinka mɔgɔ-gbɛrɛnu ma.” Mɔgɛnu ya kɛ lamɔɛn tumɛ min, anu ko, “Alamɛ ma kisira wo ma!”

¹⁷ Yisa ya anu mafɛlɛn sin, ka nyinikalɛ kɛ ko, “Allata kitabu kɛ kɔrɛ ye kama min ko, ‘Bon-sɔlɛnu ya anu ban kuri min na, wo le ara ma sɛbɛna-kuru-tɔnɔnamɛ la?’

¹⁸ Min ba bui kuri kɛ kuma, wo kolenu si kerikeri, ado ni kuri kɛ buira min ma fanan, a si wo ramɔsɔkɔn.”

Duti Sara-Ko-Nyinikalɛ

¹⁹ Tɔn-karan-mɔgɛnu anubɛ saraka-masɔla-wɛnu ya anu taya wo wati rɔ ko anu ni Yisa bira bawo anu ya a lɔn ko a ya tili kɛ tɛgɛ anu denu denuna ko la. Kɔnɔ anu kilanta mɔgɛnu na.

²⁰ Woletɔ anu ya dɛdɛ rasa a ma. Anu ya mɔgɛ donu sɔ minnu si anu nyɛrɛ ma iko mɔgɔ-nyimɛnu. Anu ya wonu sɔ alako ka Yisa bira nyinikalɛnu fɛ. Woletɔ anu si ke ka a ladon Romu kun-tigila fanka anubɛ sɛnbɛ kɔrɔ.

²¹ Mɔgɛ kɛnu ya a fɔ a ye ko, “Karan-mɔgɔ, ma ya a lɔn ko i ye min fɔla anubɛ i ye mɔgɛnu karanna min na, wo telenta. Ma ya a lɔn ko i sa lafisayalɛ kɛla, ado Alla ye a fɛ, mɔgɛ ni min ma, i ye mɔgɛnu karanna wo la a kilɛ fɛ.

²² Nba, i miriya ye kama? Ka duti sara Romu nyamani-kun-tigi ma, wo telenta, ka, a sa wo nya?”

²³ Kɔnɔ Yisa ya anuna yanfɛ kɔrɛ yen. A ya a fɔ anu ye ko,

²⁴ “Wo ni wodi-mɛlan do yira n na.” Anu nara a la, a ko, “Yon yakɔrɛ anubɛ a tɔgɛ ye kɛ ma?” Anu ya a yabi ko, “Romu nyamanɛ-kun-tigi-ba.”

²⁵ Wo le ya a to, Yisa ko, “Nba, wo le. Romu nyamani-kun-tigitɛ ye min na, wo ni wo di ale ma. Allatɛ ye min na, wo ni wo di Alla ma.”

²⁶ Anu ma ke Yisa birala fenfen na mɔgɛnu yala. Ata yabilɛnu ya a ma, anu ya anu made ka kawa.

Lawuli-Ko-Nyinikalɛ

²⁷ Sadusi donu nara Yisa wara. (Wonu bi a fɔla ko mɔgɛnu ti wuli ka bɔ sayɛ rɔ.) Anu ya a manyinika ko,

²⁸ “Karan-mɔgɔ, Nɛbi Musa ya a sɛbɛ ko, ‘Ni kei fagara, a ma den to, a na-kelen-nyɔgɛ ni kɛɛ-musi wo bi alako wo ni dan sɔrɔn kei wo ye min fagara.’

²⁹ Nba, na-kelen-nyɔgɔ-kei wɔrɔnfila ye nyɔ nun. A fɔlɔtɛ ya musi furu. A fagara. A ma den to.

³⁰ A fila nyɔgɛ ya a bi. Wo fanan fagara.

³¹ A sawa nyɔgɛ fanan ya a bi. Anu mɔgɔ wɔrɔnfilɛ bɛɛ fagara wo nya na le. Anu fenfen ma den sɔrɔn.

³² Wo kɔma, musi nyɛrɛ fagara.

³³ Nba, furinu ba wuli tumɛ min, a si ma yonna musi la anu tɛma, ado a sigira le anu dama wara nun?”

³⁴ Yisa ya anu yabi ko, “Keinu bi musinu furula duninya kɛ rɔ

³⁵ kɔnɔ wati si na, lawuli-koe bɛnnɛ minnu ma, wonu ti furi kiri wulɔn.

³⁶ Anu mani de iko melikanu. Anu ti faga. Allala dannu le wonu na bawo anu bara wuli ka bɔ sayɛ rɔ.

³⁷ Nɛbi Musa ya a lagbɛ feu, ko furinu si wuli ka anu niyi lafɛ. Ta-mɛlan ye kɔlɔma-mɛsɛ min tɔ, Musa ya wo sɛbɛ kan min, a ya Mari wara-koe fɔ ko, ‘Iburayimata Alla le ale la anubɛ Isiyakata Alla anubɛ Yakobata Alla.’

³⁸ Kɛ kɔrɛ le ko mɔgɔ-nimɛnuta Alla le ale la, furinuta ma bawo atɛnu bi anu niyi la.”

³⁹ Tɔn-karan-mɔgɛ donu kumara, anu ko, “Karan-mɔgɔ, i wara yabilɛ kɛ a kilɛ fɛ,”

⁴⁰ ado anu ma sisi a manyinikala fenfen ma tun wo kɔma.

Nyinikalɛ ka Bɔ Allata-Mɔgɔ-Yabɔnɛ Ma

⁴¹ Yisa ya a fɔ anu ye ko, “Anu ko Allata-Mɔgɔ-Yabɔnɛ si bɔ Dawuda bɔnsɔn rɔ. Wo si ma kama?

⁴² Ado nfan, Yaburi kitabu rɔ, Dawuda nyɛrɛ ko, ‘Mari ya a fɔ nta Mari ye ko a ni a sigi a bolo-nyimama-kɔɛn wara la

⁴³ ha ale Mari ni a yogenu ma a kin-sɔ-tinɛ la.’

⁴⁴ Dawuda ya a kele ko, ‘Mari.’ Allata-Mɔgɔ-Yabɔnɛ si bɔ Dawuda bɔnsɔn rɔ kama worɔ?”

Kawandi ka a Bɛn Tɔn-Karan-Mɔgɛnu Ma Yisa Bolo

⁴⁵ Nyama bɛɛ ye anu tole masɔla Yisa la tumɛ min, a ya a fɔ ala karan-dannu ye ko,

⁴⁶ “Wo ni a ma wo fɛrɛma tɔn-karan-mɔgɛnuna ko la. Yigi-ni-yɛlɛ di anu ye anuna duruku-yan-bɛnu bilanɛ anu kan na. A di anu ye fanan ko mɔgɛnu ni gbiliya-kɔndɔli di anu ma fere-kɛ-tina-wɛnu tɔ. Anu bi sigi-tina-nyimɛnu yabɔla Yahudiya-dina-bɔnnu na anubɛ kan-tina-nyimɛnu ladiyɛnu tɔ.

⁴⁷ Anu bi kɛɛ-musinu kensunyala ka anuna bɔnnu bi anu bolo, wo kɔma ka anu nyɛrɛ mayira madiyali-lafasayannɛnu fɛ! Anuna tɔrɔyɛ si yogoya bɛɛtɛ ko!”