Luka 2 - ALLALA KUMƐ

Yisa Sɔrɔn-Koe

¹ Kun-tigi-ba Ɔgasita min bi Romu nyamanɛ kun na, wo wati rɔ, a ya tɔn sigi ko ala nyamanita-mɔgɛ bɛɛ tɔgɛ ni sɛbɛ.

² Mɔgɛnu tɔgɔ sɛbɛ fɔlɔtɛ kɛ ya a taran, Mansa Kuriniya siginɛ kun-tigiyɛ la Siriya nyamanɛ rɔ.

³ Mɔgɛ bɛɛ tara anu nyɛrɛta soe burɔ anu tɔgɔ sɛbɛ tinɛ.

⁴ Nba, Yusufu fanan bɔra Nasarɛti soe burɔ Kalili sigisɔn rɔ ka ta Yudiya soe do burɔ min tɔgɛ Bɛtalehɛm, Mansa Dawuda sɔrɔnta kan min. A tara nyɔ bawo Mansa Dawuda bɔnsɔn le ale fanan na.

⁵ A tara a nyɛrɛ tɔgɔ-sɛbɛ-koe la anubɛ ala musu-mabiranɛ, Mariyama, min kolomɛ.

⁶ Anu bi Bɛtalehɛm soe burɔ tumɛ min, Mariyama mui-wati kera.

⁷ A ya ala den-kei fɔlɔtɛ sɔrɔn kolo-fannu namara tinɛ burɔ bawo anu ma yiya tinɛ sɔrɔn sundan-yiya-bɔn la. A ya kurɛ minimini dan wo ma ka a sa kolo-fannu de-nyini tinɛ.

Saga-Fɛ-Biralɛnu anubɛ Melikanu Wara-Koe

⁸ Dan wo sɔrɔn suyi rɔ, saga-fɛ-biralɛ donu bi nyamanɛ wo rɔ minnu bi kila binyɛ rɔ anuna sagɛnu kandan tinɛ.

⁹ Marita melika bɔra gbɛ rɔ anu ye. Marita waan malanta anu kuma. Anu kilanta kati!

¹⁰ Melika ya a fɔ anu ye ko, “Wo kana kilan! N bara na kibara-nyimɛ la wo ye, min si ma sewa-belebele la mɔgɛ bɛɛ ye.

¹¹ Wo kisilɛ ara sɔrɔn suyi kɛ nyɛrɛ rɔ Mansa Dawuda halala-soe burɔ. Allata-Mɔgɔ-Yabɔnɛ le wo la, Mari, kɔni!

¹² Wo si den-pulan sanɛ taran kolo-fannu de-nyini tinɛ, kurɛ minimininɛ a ma. Tamasere le kɛ la wo ye.”

¹³ Wati-kundunɛ wo kɔrɔ, Arinyɛnitɔ-melika siyaman bɔra gbɛ rɔ ka anu sɔ melika doi wo fɛ. Anu bi Alla tantola ko,

¹⁴ “Gbiliyɛ ni ke Alla ye san-kole rɔ pon! Minnu ya Alla hɛnɛ, yisi-kimɛ ni to wonu fɛ!”

¹⁵ Melikanu bɔra anu fɛ tumɛ min ka sɛgi Arinyɛni tɔ, saga-fɛ-biralɛnu ya a fɔ anu nyɔgɔn ye ko, “Mari Alla ara min fɔ ma ye kɛ la, ma ta wona Bɛtalehɛm ka koe kɛ ragbɛ ma yɛ la.”

¹⁶ Nba, anu tara tiriya! Anu ya Mariyama anubɛ Yusufu taran, den-pulan sanɛ kolo-fannu de-nyini tinɛ.

¹⁷ Melika ya min bɛɛ fɔ saga-fɛ-biralɛnu ye ka a bɛn dennɛ wo ma, wo yen anu bolo, anu ya wo rakaran a sɔrɔnnɛnu ye.

¹⁸ Min bɛɛ ya saga-fɛ-biralɛnu dantɛgɛ-kan lamɔɛn, wonu kawara wo ma.

¹⁹ Mariyama ya a hɛnkili to koe wo bɛɛ ko ka a miri anu ma bɛrɛkɛ!

²⁰ Saga-fɛ-biralɛnu sɛgira sewɛ la. Ka a tɛgɛ anu bara min namɔɛn anubɛ ka min yen, anu bi Alla tantola ka a gbiliya wo bɛɛla ko la. Iko melika ya a fɔ anu ye nya min, wo bɛɛ mara wo nya na le, yɔ!

Yisa Tɔgɔ-Sa-Koe

²¹ A tele segin nyɔgɛ, dennɛ lakemininya tumɛ kera. Anu ya a tɔgɔ sa Yisa iko melika ya a fɔ a na ye nya min yanni a ni a buyi bi.

Yisa Dantɛgɛ-Koe Alla Ma

²² Alla ya tɔn minnu di Nɛbi Musa ma sɛninya-koe ma, a wati kera ko Yusufu anubɛ Mariyama ni wo kɛ. Woletɔ anu tara dennɛ la Yerusalɛm ka a dantɛgɛ Mari Alla ma.

²³ Kɛ le sɛbɛnɛ Mari Allala tɔn rɔ ko, “Den-kei-sarɛ bɛɛ ni dantɛgɛ Mari Alla ma alako anu ni ma Allatɛ la.”

²⁴ Mari Allala tɔn ya a fɔ ko anu ni purulan fila bɔ, ni wo ma, kangbo-den fila. Woletɔ a sɔrɔnnɛnu ya sarakɛ wo bɔ iko a sɛbɛnɛ Marita tɔn rɔ nya min.

Simiyɔnta Wɔlɔyiya-Kumɛ

²⁵ Mɔgɛ do ye Yerusalɛm soe burɔ nun min tɔgɛ Simiyɔn. Mɔgɔ-nyimɛ le, a telennɛ. A ye Isirɛlata kisi-koe makɔnɔna nun, ado Allata Ni-Sɛnimɛ ye a fɛ.

²⁶ A ara a lɔn Allata Ni-Sɛnimɛ baraka rɔ nun ko a ti faga fɔ a wa Mari Allata-Mɔgɔ-Yabɔnɛ yen.

²⁷ Yisa sɔrɔnnɛnu nara Yisa la Alla-Bato-Bɔn la. Anu ya wo ma a ye iko a sɛbɛnɛ Allata tɔn rɔ nya min. Wo wati, Allata Ni-Sɛnimɛ ya Simiyɔn ladon Alla-Bato-Bɔn la.

²⁸ Simiyɔn ya den-pulan bi ka a sigi a kɔnkɔn rɔ ka baraka bira Alla ye ko,

²⁹ “N tigi Mari, i wara ila lanyiri latɔnbagaya bi. I wara sɔn ko nde, ila yɔɔn-nɛ ni faga yisi-kimɛ rɔ.

^30-31 I wara kisi-koe min tabɛn mɔgɛ bɛɛ ye, n bara wo yen n yɛ la.

³² I wara ila waan raka min si a ma, sibolo-gbɛrɛnu ni ila kilɛ yen anubɛ ka gbiliyɛ di ita Isirɛla mɔgɛnu ma!”

³³ Simiyɔn ya min fɔ Yisa wara-koe rɔ, a na anubɛ a fa kawara wo koenu ma.

³⁴ Simiyɔn duwara anu ye ka a fɔ a na Mariyama ye ko, “Alla ara dennɛ kɛ yabɔ ka a ma tamasere la min si a ma, Isirɛla mɔgɔ siyaman si bui. Kɔnɔ a si ma kisi-koe la fanan mɔgɔ siyaman ye. Isirɛla mɔgɔ siyaman si anu ban a la.

³⁵ Kɛ si a ma, anuna gbundu-koe si bɔ gbɛ rɔ, ado ile, Mariyama si tɔrɔyɛ sɔrɔn iko anu ba i yisi sɔgɔ faan-da-diyamɛ la.”

Nɛbi-Musi Annata Wɔlɔyiya-Kumɛ

^36-37 Nɛbi-musi do ye nyɔ nun, a tɔgɛ Anna. Fanuwɛlila dan le wo la ka bɔ Asɛra bɔnsɔn rɔ. Musu-kɔrɔ-ba le min bara san bi-segin ani san nani bɔ. A ya san wɔrɔnfila dɔrɔn kɛ kei-wara-sigi rɔ, yanni a ni ma kɛɛ-musi la. A ye Alla-Bato-Bɔn la tolon ka to Alla batola su-ni-tele madiyalɛ anubɛ sunyɛ rɔ.

³⁸ Wo wati, a nara ka baraka bira Alla ye. Min bɛɛ ye Alla makɔnɔna ko a ni na Yerusalɛm kunka tinɛ, a ya dennɛla ko fɔ wonu denu ye.

Anu Sɛgi-Koe Nasarɛti Soe Burɔ

³⁹ Mari Allala tɔn ya min bɛɛ fɔ, anu banta wo dama mala tumɛ min, anu sɛgira anu barɛ Kalili sigisɔn rɔ, Nasarɛti soe, kɔni.

⁴⁰ Yisa koloyara ka sɛnbɛ sɔrɔn. A hɛnkili diyara, ado Allata duwɛ ye a fɛ.

Yisala Tɛ Alla-Bato-Bɔn la Denniyɛ Rɔ

⁴¹ Yisa sɔrɔnnɛnu duruta tala Yerusalɛm san-bo-san Kanan-Ko-Ladiyɛ rɔ.

⁴² Yisa ya san tan-ni-fila bɔ tumɛ min, anu tara ladiyɛ rɔ iko anu duruta a mala nya min.

⁴³ Ladiyɛ banta tumɛ min, anu bara wuli tala anu barɛ kɔnɔ Yisa tora Yerusalɛm. Kɔnɔ a sɔrɔnnɛnu ma wo lɔn.

⁴⁴ Anu miriya ko a ye ala mɔgɛnu tɛma, woletɔ anu tagamanta telen gben! Wo kɔma, anu burunta Yisa nyinina anu na-kelen-nyɔgɛnu anubɛ anu diyana-mɔgɛnu tɛma.

⁴⁵ Anu ma a yen min kɛ, anu sɛgira fɔɔ Yerusalɛm a nyini tinɛ.

⁴⁶ A tele sawa nyɔgɛ ma, anu ya a taran Alla-Bato-Bɔn la. A siginɛ Yahudiya karan-mɔgɛnu fɛ. A ye a tole masɔla anu na ka anu manyinika ko siyaman na.

⁴⁷ Min bɛɛ ya ala kirabɔ-kan lamɔɛn, wonu kawara ala hɛnkilimayɛ anubɛ ala yabilɛnu ma.

⁴⁸ A sɔrɔnnɛnu ya a yen tumɛ min, anu fanan kawara. A na ya a fɔ a ye ko, “Nna dan, nfenna i ya kɛ ma ma la? Mabɛ i fa tɔrɔta i nyini tinɛ kati!”

⁴⁹ A ya anu yabi ko, “Wo ye n nyinina nfenna? Wo ma a lɔn, ba, ko fɔ n ni to n Fala bɔn la?”

⁵⁰ Kɔnɔ a ya min fɔ anu ye, anu ma ban wo nya-yenna.

⁵¹ Wo kɔma, Yisa sɛgira anu fɛ Nasarɛti soe burɔ. A tora nyɔ ka anuna kumɛ bira. A na ya koe kɛ bɛɛ lamara a yisi rɔ.

⁵² Yisa koloyara. Ala hɛnkilimayɛ kuma-sara ka duwɛ sɔrɔn Alla anubɛ mɔgɛnu bolo.