Luka 17 - ALLALA KUMƐ

Hakɛ

¹ Yisa ya a fɔ ala karan-dannu ye ko, “Koe minnu si mɔgɛnu nabui hakɛ rɔ, fɔ wonu ni ma. Kɔnɔ min si a ma, a ni bui, gbalo ye wo tigi kuma!

² Yanni a ni denni nɛ kɛ kelen nabui hakɛ rɔ, a fisa wo mɔgɛ ye, kuru-belebele-wɛ ni kiri a kan la ka a lakɛ kɔgɔ-yi dumɛ rɔ.

³ Wo ni a ma wo fɛrɛma! “Ni i na-kelen-nyɔgɛ ya hakɛ kɛ i la, ta a makuma. A wa i madiya, a makoto.

⁴ Ni a ya hakɛ kɛ i la kinyama wɔrɔnfila tele kelan kɔrɔ, a ni na i wara wo bɛɛ rɔ ko, ‘I yandi, n makoto,’ nba, i ni a makoto.”

Dɛnkɛninyɛ Wara-Koe

⁵ Yisala kilayɛnu ya a fɔ Mari ye ko, “Mala dɛnkɛninyɛ kuma sa.”

⁶ Mari ya anu yabi ko, “Ni wola dɛnkɛninyɛ koloyara ka ke foni-kole rɔ, wo si a fɔ toro-kuri kɛ ye ko, ‘I nyɛrɛ wurun dugi rɔ ka ta i sɔ tungban tɛma!’ A si ila kumɛ bira.

Wɔli-Kɛlɛ si min Ma

⁷ “Ni wɔli-kɛlɛ ye wole do bolo min bi sɛnɛ sala, ni wo ma, a ye sagɛnu fɛ-birala, a wa na tumɛ min ka bɔ sɛnɛ rɔ, i ti a fɔ a ye ko a ni a mayigi fen dɔn tinɛ.

⁸ I si a fɔ a ye ko, ‘Ta, nta kima rabɛn fɔlɔn ka wo sigi n kɔrɔ. Wo kɔma, a ni na to a dɔnna.’

⁹ Mɔgɔ ti baraka bira wɔli-kɛlɛ wo ye bawo i ya a sɔ min na, a ara wo le ma.

¹⁰ A ye wo nya na le wole fanan bolo. Min fɔra wo ye, wo wa wo bɛɛ ma tumɛ min, wo si a fɔ ko, ‘Wɔli-kɛlɛ le male la dɔrɔn. Ma ara mala wɔlɛ le dɔrɔn kɛ.’ ”

Kunato Tan Dandan-Koe

¹¹ Yisa ye tala Yerusalɛm tumɛ min, a tenbira Samariya anubɛ Kalili sigisɔnnu tɔ.

¹² A ye donna so-nɛ do rɔ tumɛ min, kunato mɔgɔ tan ya a labɛn kilɛ la. Anu ya anu mata a la

¹³ ka gbele-gbelen ko, “Ma tigi Yisa! Kinikini ma ma!”

¹⁴ Yisa ya anu yen tumɛ min, a ya a fɔ anu ye ko, “Wo ta saraka-masɔlɛnu bara, anu ni wo lakɔrɔsi.” Anu bi tala tumɛ min, anu dama kɛndɛyara.

¹⁵ Mɔgɔ kelen de anu tɔ, wo ya a yen tumɛ min ko a ara kɛndɛya, a sɛgira Yisa wara. A ye Alla tantola a kulu-mayɛlɛnɛ la.

¹⁶ A ya a sa dugi ma Yisa kin kɔrɔ ka baraka bira a ye, ado Samariya kɛ le kei wo la.

¹⁷ Yisa ya nyinikalɛ kɛ, a ko, “Wo mɔgɔ tan de ma kɛndɛya nun, ba? Mɔgɔ kɔnɔntɔ toe doi don?

¹⁸ Nfenna anu dama ma sɛgi ka baraka bira Alla ye? Fɔ sundan kɛ dɔrɔn, wo le nara?”

¹⁹ Yisa ya a fɔ a ye ko, “I lasɔ, i ni ta. Ila dɛnkɛninyɛ ara i lakɛndɛya.”

Allata Mansayɛ Na-Koe

²⁰ Farisi donu ya Yisa manyinika Allala mansayɛ na-tumɛ ma. A ya anu yabi ko, “Allala mansayɛ, fen de wo la i ti min namatoe yen.

²¹ Mɔgɔ ti a fɔ ko, ‘A mafɛlɛn, a ye yan!’—ni wo ma, ‘I ma a yen pan!’ Wo ti yen bawo Allala mansayɛ ye wo tɛma kaka.”

²² A ya a fɔ ala karan-dannu ye worɔ ko, “Tumɛ wo ye nala, nde, Hadama-dan na-wati-sɔgɛ si wo bira kɔnɔ hali tele kelen, wo ti wo yen!

²³ Donu si a fɔ wo ye ko, ‘A mafɛlɛn pan, a ye nyɔ!’—ni wo ma, ‘A mafɛlɛn yan, a ye yan!’ Kɔnɔ wo kana ta n nyini tinɛ.

²⁴ Iko bandɛ si a nyin masɔgɔ san-kolo tɔnkɔn kelan rɔ ha ka malan a tɔnkɔn doi rɔ nya min, nde, Hadama-dan si na wo nya na le.

²⁵ Kɔnɔ fɔ n ni tɔrɔyɛ sɔrɔn fɔlɔn bɛrɛkɛ, ado bi-mɔgɛnu si anu ban n na.

²⁶ Nde, Hadama-dan ta wati si ma iko koe minnu kera Nowata wati rɔ.

²⁷ Bɛɛ tora fen-dɔn-kɛla ka anu min, keinu ya musinu furu, musinu tara kei-wara-sigi rɔ. Anu tora wo bɛɛ mala ha Nowa donta kulɔn rɔ lunyɛ min. Nba, yi nara ka anu damasi kasara.

²⁸ A si ma fanan iko a mara nya min Lɔtila wati rɔ. Bɛɛ tora fen-dɔn la ka anu min. Anu bi yilayɛ kɛla ka sɛnɛ sa anubɛ ka bɔnnu sɔ.

²⁹ Lɔti bɔra Sɔdɔm soe burɔ lunyɛ min, tɛ anubɛ munku-gbɛ yigira ka bɔ san-kole rɔ ka anu dama halaki.

³⁰ A si ma wo nya na le fanan nde, Hadama-dan wa bɔ gbɛ rɔ lunyɛ min.

³¹ “Ni wo tele ya a taran, i ye bɔn kuma, i kana don bɔn la i bolo-fannu bi tinɛ. A ye wo nya na le fanan, ni wo tele ya i taran ila sɛnɛ rɔ, i kana sɛgi bɔn la tun,

³² ado min mara Lɔtila musi la, wo ni wo hɛnkili lamiri wo ma!

³³ Mɔgɔ-wo-mɔgɔ min ba a raya ka a nyɛrɛ niyi lakisi, wo si bɔnɔ a rɔ. Mɔgɔ-wo-mɔgɔ min ba bɔnɔ a niyi rɔ, wo si a sɔrɔn.

³⁴ N bi a fɔla wo ye, su kelan wo rɔ, mɔgɔ fila si taran kinɔgɔla kan-tina-kelen, kelen si bi, doi si to.

³⁵ Musu fila si taran fen tugula anu nyɔgɔn fɛ, kelen si bi, doi si to. [

³⁶ Kei fila si taran sɛnɛ rɔ, kelen si bi anu tɔ, doi si to.”]

³⁷ Karan-dannu ya Yisa manyinika ko, “Mari, kɛ si ma mintɔ?” Yisa ya anu yabi ko, “Suyi taranta kan min, dogɛnu si anu nadɛn nyɔ le.”