Luka 14 - ALLALA KUMƐ

Kirayatoe Dandan-Koe Yisa Bolo

¹ Sulen-Tele do ma tun, Yisa tara fen dɔn tinɛ Farisi-malɔnnɛ do warɛ. Nba, mɔgɔ siyaman yɛ sɔnɛ Yisa la.

² Kei min kiannu anubɛ a bolenu yirinɛ, wo nara Yisa wara.

³ Yisa ya tɔn-karan-mɔgɛnu anubɛ Farisinu manyinika ko, “Mala tɔn si sɔn mɔgɔ-dandan-koe ma Sulen-Tele ma, ka, a ti sɔn?”

⁴ Kɔnɔ anu ma a yabi hali! Yisa ya kei wo dandan ka a lasɛgi a warɛ.

⁵ Wo kɔma, a ya a fɔ mɔgɛnu ye ko, “Ni dan taranta wo bolo, ni wo ma, turɛ, ni a buira denkɛ rɔ Sulen-Tele ma, wo ti a layɛlɛ ka a bɔ denkɛ rɔ Sulen-Tele ma?”

⁶ Kɔnɔ anu ma ke a yabila kɛ ma.

Sundan Rabira-Koe anubɛ Famayigi-Koe

⁷ Sundan donu bi kan-tina-nyimɛnu yabɔla nya min ladiyɛ rɔ, Yisa ya wo yen min kɛ, a ya tili kɛ tɛgɛ anu dama ye. A ko,

⁸ “Ni mɔgɛ do ya i kele kɔnyɔ-masɔ-ladiyɛ rɔ, i kana sigi-tina-nyimɛ yabɔ i nyɛrɛ ye bawo tumado, mɔgɛ do kelenɛ ladiyɛ rɔ min kolo ile ko.

⁹ Nba, min ya wo filɛ bɛɛ kele, wo si na a fɔ i ye ko, ‘Kan tinɛ kɛ di doi kɛ ma.’ I si miliya wo rɔ ka ta i sigi kan-tina-mayiginɛ rɔ.

¹⁰ Kɔnɔ anu ba i kele tumɛ min, ta sigi-tina-mayiginɛ nyini i nyɛrɛ ye. Woletɔ min ya wo kele, wo si na i wara ka a fɔ ko, ‘N bɔ, na i mayɛlɛ yan kan-tina-nyimɛ rɔ.’ I si gbiliya sɔrɔn worɔ sundan bɛɛ yala,

¹¹ ado min bɛɛ si a nyɛrɛ kɔrɔbi, wo ma si yigi. Min ba a nyɛrɛ famayigi, wo la si yɛlɛ.”

¹² Yisa ya a fɔ ladiya-tigi ye ko, “Ni i ye tele-kɔndɔn, ni wo ma, kimanɛ dila mɔgɛnu ma, i ta-nyɔgɔ wo, i na-kelen-nyɔgɔ wo, i kebila-nyɔgɔ wo, i sigi-nyɔgɔ min bananyanɛ wo, i kana wonu fenfen kele. Ni i ya wo ma, anu fanan si ile kele ka ila yili sara.

¹³ Min fisa, i wa ladiyɛ ladan tumɛ min, bolo-kolɔnnu wo, tonkannɛnu wo, namarɛnu wo, fiyɔnnu wo, i ni wonu denu kele.

¹⁴ Ni i ya wonu kele, i si duwɛ sɔrɔn bawo wonu ti ke a yili sarala i la. Mɔgɔ-telennɛnu nawuli tumɛ ka bɔ sayɛ rɔ, Alla si i sara wulɔn-tele.”

Ladiya-Belebele Tili

¹⁵ Mɔgɔ kelen siginɛ Yisa fɛ tebulu ma, wo ya kɛ lamɔɛn tumɛ min, a ya a fɔ a ye ko, “Minnu si kele ladiyɛ rɔ Allala mansayɛ rɔ, mɔgɔ-sewanɛ le wonu na!”

¹⁶ Yisa ya a fɔ a ye ko, “Kei do ye nyɔ nun min ya ladiya-belebele ladan ka mɔgɔ siyaman kele.

¹⁷ Ala ladiyɛ kenɛ, a ya ala wɔli-kɛlɛ sɔ ka a fɔ ala sundannu ye ko, ‘Wo na, fan bɛɛ ra ara bɛn!’

¹⁸ Kɔnɔ anu wulita kelen-kelenyɛ ma ka anu masigima-koe fɔ. A fɔlɔtɛ ya a fɔ wɔli-kɛlɛ wo ye ko, ‘N bara dugi do san, fɔ n ni ta a mafɛlɛn. I yandi, i hakɛ to n ye.’

¹⁹ Doi ko, ‘N bara sara-ninki tan san, ta-sɔgɛ ye n na ka wonu mafɛlɛn. I yandi, i hakɛ to n ye.’

²⁰ Doi ko, ‘N ban-san le furu kɛ la, wola ko la, n ti ke tala.’

²¹ “Wɔli-kɛlɛ wo sɛgira ka a dantɛgɛ ala kun-tigi ye. Bon-tigi wo diminyara ka a fɔ ala wɔli-kɛlɛ ye ko, ‘I tiriya ka ta kila-wɛnu anubɛ kila-nɛnu fɛ ka na bolo-kolɔnnu na anubɛ tonkannɛnu anubɛ fiyɔnnu anubɛ namarɛnu.’

²² A ma mɛ, wɔli-kɛlɛ wo ko, ‘N fa, i ya min fɔ, n bara wo ma kɔnɔ sigi tinɛ donu bara to.’

²³ Woletɔ kun-tigi ya a fɔ ala wɔli-kɛlɛ ye ko, ‘Ta kila-wɛnu anubɛ sɛnita-kilɛnu fɛ ka mɔgɛnu kele fɔrɔsɛ la, woletɔ nna bɔn la si fa.

²⁴ N bi a fɔla i ye, n ya minnu fɔlɔn kele, anu ma sɔn nala, n ya dɔn-fan min te, anu fenfen ti anu nagan sɔ wo la mumɛ!’ ”

Karan-Denyɛ Sɔnkɛ

²⁵ Nyama-belebele bilanɛ Yisa fɛ. A ya a yɛ lamunun anu na ka a fɔ anu ye ko,

²⁶ “Mɔgɔ-wo-mɔgɔ nara nde wara, a ti ke mala nna karan-dan la fɔ a wa a kan-kɔ sɔ a na anubɛ a fa la, ala musi anubɛ ala dannu anubɛ a na-kelen-nyɔgɛnu anubɛ a nyɛrɛ fanan.

²⁷ Mɔgɔ-wo-mɔgɔ min ti a nyɛrɛ-faga-kɔn bi ka bila n kin-gbɛ fɛ, wo ti ke mala nna karan-dan la.

²⁸ “Ni mɔgɛ do ye a fɛ ka san-bɔn sɔ, a si a sigi fɔlɔn ka a lɔn ni a si min nyɔgɔn sara a laban-koe la.

²⁹ Ni a ma wo ma, a wa ban a kurukɛla tumɛ min, a ti ke a labanna. Min bɛɛ si a yen, anu si a mayɛlɛn.

³⁰ Anu si a mayɛlɛn a fɔla ko, ‘Kei kɛ ya bon-sɔɛ dabira kɔnɔ a ma ke a labanna!’

³¹ “Ni mansɛ ye nyɔ, kɛlɛ-den waga tan (10,000) ye min bolo, ni a ko a ni ta mansɛ do kɛlɛ, kɛlɛ-den waga mogan (20,000) ye min bolo, a si a sigi fɔlɔn ka a lɔn ni sɛnbɛ ye a bolo ka mansɛ wo nɔ.

³² Ni sɛnbɛ sa a bolo, yanni a ni gbɛrɛn a ma, a si kilayɛnu sɔ mansɛ doi labɛn tinɛ ka a madiya ko a ni a fɔ a ye min sɔgɛ ye a la alako anu kana kɛlɛ.”

³³ Yisa ko, “A ye wo nya na le, wole kelen bɛrɛn ti ke mala nna karan-dan la fɔ a wa a ban a bolo-fan bɛɛ la.

Kɔgɛ min Diya Sa A La

³⁴ “Kɔgɛ kin kɔnɔ ni a diyɛ bɔra a la, a si diya kama tun? A ti fenfen nyinya tun.

³⁵ A ti dugi lamo, a ti a ma, ninki-nyɛ ni dugi lasabati, fɔ ka a lakɛ a rɔ. Ni min si ko nya-yen, a ni a tole masɔ kumɛ kɛ la!”