Saraka-Masɔlɛnuta Tɔnnu 6 - ALLALA KUMƐ

¹ Musa ya Mari kuman-kan kɛ latenbi ko,

² “Ni mɔgɛ do ya tulumɛ sigi a ta-nyɔgɛ do ma, ni a nara tulumɛ wo kunka tinɛ kɔnɔ wo ma sɔn ka fan wo don a bolo, hakɛ le wo la. Ni mɔgɛ do ya a ta-nyɔgɛ kankan, ni wo ma, ni a ya a kensunya, a ara hakɛ kɛ.

³ Ni mɔgɛ do ya foninyɛ fɔ ka a dɛ ragbɛlɛya, a ko fan wo ara tunu kɔnɔ wo ye a bolo, a ara hakɛ kɛ.

^4-5 Ni mɔgɛ ya hakɛ kɛ sufanu kɛ, wo bɔɛ gbɛ rɔ, a tenbi kensunya-fan wo lasɛgila a tigi ma tumɛ min, a si do sa wo kuma. Ni a ya a mɔlɔn lɔn, a bɛnta a ni loli-loli lasɛgi minna ko la, a si wo ma wɔrɔ-wɔrɔ la.

⁶ A si na saga-yigi la a bolo saraka-masɔlɛ wara, fɛɛ sa min na ka wo ma a nyɛrɛ yiliki-sarakɛ la. Anu si kolo-fan wo mɔlɔn tɛgɛ iko Marita Fani-Bɔnna wodi ye nya min.

⁷ Saraka-masɔlɛ si kolo-fan wo bi ka a di Mari ma saraka-bɔlɛ hakɛla ko la. Sarakɛ kɛ si a hakɛ yamatogon. Mari si a makoto worɔ.” (1) Saraka-Mintantɛnu

Saraka-Masɔlɛnuta Tɔn Donu

(1) Saraka-Mintantɛnu

⁸ Musa ya Mari kuman-kan kɛ latenbi

⁹ Aruna anubɛ a kebila-mɔgɛ donu ma ko, “Wo si saraka-mintantɛnu sa tɛ rɔ. Anu ni ki mintanna ha banda-ka-dɛ ma. Tɛ wo kana dufen mumɛ!

¹⁰ Saraka-masɔlɛ si ala gbama-duruki don a kan na anubɛ ala gbama-kurusi. A si ta-gbangban bɔ saraka-mintan-tinɛ kɔrɔ ka a ladɛn a tɔnkɔn rɔ.

¹¹ Saraka-masɔlɛ si a mayɛlɛma ka duruki-gbɛrɛkɛ don a kan na. A ni ta-gbangban wo bi ka ta a la ha dagɛ kɔma kan-tina-sɛnimɛ do rɔ min sɛninyanɛ iko tɔn ya a fɔ nya min.

¹² Tɛ min bi saraka-mintan-tinɛ kuma, wo ni to birala su-ke banda-ka. Sɔgɔma-wo-sɔgɔma, a si to sɔgɔ-kundi sɔla tɛ la. Wo wa ban wo mala, wo si sɔgɔma-saraka-mintantɛ sa tɛ rɔ anubɛ anu bi kɛɛn minnu bɔla yisi-kima-sarakayɛ rɔ.

¹³ Kɔnɔ tɛ wo kana dufen hali doni bɛrɛni! (2) Dɛgɛ-Munku-Sarakɛnu

(2) Dɛgɛ-Munku-Sarakɛnu

¹⁴ “Dɛgɛ-munke si bɔ nya min, wo tɔn le kɛnu na. Aruna kebila saraka-masɔlɛnu si dɛgɛ-sarakɛ dantɛgɛ Mari ma saraka-mintan-tinɛ da kɔrɔ.

¹⁵ Dɛgɛ min tamaganɛ tuli la, a si wo bolo-nya kelen bi wo rɔ ka wo sa saraka-mintan-tinɛ kuma anubɛ isɛnti. Bolo-nya kelan wo si a ma iko a ya a damasi mintan Mari ye. Wo sumɛ si diya Mari ye.

¹⁶ A toe si to saraka-masɔlɛnu ye. Anu tenbi a toe mala biredi la tumɛ min, anu kana isiti kɛ a rɔ de! Anu ni a dɔn kan-tina-sɛnimɛ rɔ Marita Fani-Bon-kata burɔ.

¹⁷ Mari ya wo toe di anu denu denu ma ka wo ma anu beli-fan la. Kɛ fanan sɛninyanɛ de iko hakɛ-sarakɛ anubɛ yiliki-sarakɛ ye nya min.

¹⁸ Ka a fɔlɔ bi ma ha wati min di Alla ye, kei minnu bi Arunata kebilɛ rɔ, wonu denu dɔrɔn si ke kɛ dɔnna. Mɔgɔ-gbɛrɛ kana a bole tugu a la. Ni min ya a tui ka wo ma, wo tigi ara a nyɛrɛ don Alla bolo.” (3) Saraka-Masɔlɛ Dantɛgɛ-Koe Mari Ma

(3) Saraka-Masɔlɛ Dantɛgɛ-Koe Mari Ma

¹⁹ Musa ya Mari kuman-kan kɛ latenbi ko,

²⁰ “Mɔgɔ-wo-mɔgɔ min bi Aruna kebilɛ rɔ, a sɔgɛ ye a la ka a nyɛrɛ di Mari ma ka ma saraka-masɔlɛ la, anu si tuli kɛ a kunyɛ rɔ ka a dantɛgɛ Mari ma. A ye a nyɛrɛ dila Mari ma tele min tɔ, a si na dɛgɛ-munke pani-kunbɛ-nya kelen na a bolo ka wo ma sarakɛ la (iko anu ya min ma tele-wo-tele dɛgɛ-sarakɛ la). A si pani-kunbɛ-nya kelan tala a tɛma. Sɔgɔma, a si a talɛ di Mari ma. Wurɛ la, a ni a toe di a ma.

²¹ A si tuli kɛ a rɔ ka a yabasan. Wo kɔma, anu si a yilan pani-tasangbɛ rɔ. A wa ban a yilanna tumɛ min, a si a rakerikeri ka a di Mari ma. Wo dama si mintan ka kerun gburr! Wo sumɛ si a diya don Mari rɔ.

²² Ka a dabira bi ma ha wati min di Mari ye, Aruna kegeyɛnu min si ma saraka-masɔla-kun-tigi-wɛ la, wo si to dɛgɛ-munku-sarakɛ kɛnu bɔla Mari ye.

²³ Ni saraka-masɔlɛ ye dɛgɛ-munku-sarakɛ bɔla a nyɛrɛ ye, ale saraka-masɔla ti wo dɔn dee! A bɛɛ si mintan gburr!” (4) Hakɛ-Sarakɛnu

(4) Hakɛ-Sarakɛnu

^24-25 Musa ya Mari kuman-kan kɛ latenbi Aruna kebilɛnu ma ko, “Hakɛ-sarakɛ tɔn le kɛnu na. Hakɛ-sarakɛ kɛnu si faga saraka-mintan-tinɛ kantɔ-wara la anu si saraka-mintantɛnu faga kan min. Hakɛ-sarakɛ kɛ, a sɛnima kosɛbɛ!

²⁶ Saraka-masɔlɛ min si a faga, wo si a dɔn kan-tina-sɛnimɛ rɔ Marita Fani-Bɔn kata burɔ.

²⁷ Kɔnɔ mɔgɔ-gbɛrɛkɛ kana tugu sarakɛ kɛ la. Ni min ya a tui ka wo ma, wo tigi ara a nyɛrɛ don Alla bolo. Ni saraka-yele donta mɔgɛ dola kurɛ ma fɔ a ni ta a ku kan-tina-sɛnimɛ rɔ.

²⁸ Ni anu ya a soge te bɔnku-dagɛ min tɔ, anu si wo ratii. Ni anu ya a te daga-gbɛrɛkɛ rɔ, anu si wo raku a kin na!

²⁹ Saraka-masɔlɛnu kebila-mɔgɔ-keimɛnu si kɛ dɔn, laa-wo-laa sa anu na. Saraka-sɛnimɛ le.

³⁰ Ni saraka-masɔlɛ tara saraka-yele do la Marita Fani-Bɔn burɔ ka ma mɔgɔ-hakɛ-yamatogon-fan la, mɔgɔ-wo-mɔgɔ kana saraka wo soge bila a dɛ rɔ, fɔ ka soge wo mintan gburr!”