Saraka-Masɔlɛnuta Tɔnnu 26 - ALLALA KUMƐ

Kuma-Birɛ anubɛ Duwɛ

¹ Mari ya a fɔ Musa ye ko, “Wo kana kuri malɛsɛ ka a kɔ bawo nde nyɛrɛ-nyɛrɛ le wota Mari Alla la.

² Wo ni ladɛn-telenu gbiliya, wo ye n batola minnu ma, kɔni. Wo ni nta Fani-Bɔn fanan gbiliya. Nde le wota Mari Alla la.

³ “Ni wo ya nna tɔn damasi bira a kila-bɛrɛbɛrɛ fɛ, n ti bandan ko-nyimɛ kɛla wo ye.

⁴ N si bandɛ lana a tumɛ rɔ woletɔ wola ki-fannu si nanfa dugi rɔ a kilɛ fɛ. Wola kɔlɔmanu fanan si gbɔ-siyaman kɛ.

⁵ Wola dɔn-fannu ti dasa wo ma. Wo si to wola ki-fannu tɛgɛla ha kɔn-gbɔɛnu keri-wati. Wo si to kɔn-gbɔɛnu fanan kerila ha wola ki-fen-kurɛnu ki-wati. Wo si to sigini nyɔ rɔ lafɛrɛ anubɛ yisi-kimɛ rɔ.

⁶ “Wo si kinɔgɔ wo fanbolo. Mɔgɔ-wo-mɔgɔ ti ke wo makilanna. N si sogo-yogomɛnu nabɔ wola nyamanɛ rɔ. Wo ti kɛlɛ sɔrɔn tun wola nyamanɛ rɔ.

⁷ Wo si nɔ-ko sɔrɔn wo yoge damasi kuma.

⁸ Wole mɔgɔ loli si ke le mɔgɔ kɛmɛ gbesila. Wo mɔgɔ kɛmɛ si ke le mɔgɔ waga tan forondola.

⁹ N si to duwala wo ye alako wo ni yiri bui! Ma ara lanyiri min kiri ma nyɔgɔn tɛma wona, nde si n baralɛ latɔnbagaya.

¹⁰ Wo tenbi wola dɔn-fen-kurɛnu tɛgɛla, wo si a kɔrɔmɛnu nabɔ bɔn la ka a kurɛnu nadon.

¹¹ N si to wo fɛ nta Fani-Bon-sɛnimɛ burɔ. N ti wo boloka mumɛ!

¹² N si ma wota Alla la, wole si ma nta mɔgɛnu na.

¹³ N nara wo la ka bɔ Iyipiti alako wo kana ma yɔɔnnu na tun. N bara wo kunyɛ bɔ gbaran rɔ ka wo hɔrɔya. Wo ye tagamana iko dunu-gbilimɛ wa bɔ mɔgɛ min kuma.”

Kuma-Birabɛliyɛ anubɛ Tɔrɔyɛ

¹⁴ Mari ya a fɔ anu ye tun ko, “Ni wo ma nna tɔnnu bira, wo si tɔrɔyɛ sɔrɔn.

¹⁵ Ni wo ma sɔn ka nta sereya kɛnu bira, ni wo ya wota sarama-kan tinya min bi ma tɛma wona,

¹⁶ n si wo tɔrɔya. N si yakɔrɔ-mamɔɛ lana wo kuma iko kiraya-yogomɛ sufa min ti dandan, anubɛ fɛrɛma-kaliyɛ min si wo fiyonya ka wo bara wao! Wo si wola suginu fui kɔnɔ wo ti fenfen sɔrɔn bawo wo yogenu si bui wo ma ka wola dɔn-fen-sabatinɛnu bi wo bolo ka ta anu na.

¹⁷ Nde nyɛrɛ si n kan-kɔ sɔ wo la. Wo yogenu si nɔ-ko sɔrɔn wo ma. Wo ma di mɔgɛ minnu ye, wonu si wo lamara. Wo si ma yutoenu na. Hali mɔgɔ sa wo gbenna, wo si wo buri.

¹⁸ “Hali n bi kɛ dama mala wo la, ni wo ma nna sereyanu natɔnbagaya, n si wo tɔrɔya ka tenbi a fɔlɔtɛ la.

¹⁹ Ni wo ya wo nyɛrɛ kɔrɔbi, n si na n bɔ wo kɔrɔ. N ti bandɛ lana wo ye woletɔ wola duginu si gbɛlɛya iko fara-kole.

²⁰ Wo ye wɔli-gbɛlɛmɛ minnu kɛla, fenfen ti bɔ wonu tɔ bawo wola fui-fannu anubɛ ki-fen-gbɔɛnu ti sabati dugi rɔ.

²¹ “Hali wo, ni wo ma wo kɛ-nya yɛlɛma n bara la, wo ma sɔn ka nna tɔnnu bira mumɛ, n si wota tɔrɔyɛ lagbɛlɛya ka tenbi a fila nyɔgɛ la.

²² N si sogo-feremɛnu nana wo tɛma. Wonu si to wola dannu fagala. Anu si wola kolo-fannu kasara. N si wo madɔgɔya hali wola kila-kunyɛ na si kolonya fiyon!

²³ “Ni n ya tɔrɔya su kɛ bɛɛsi lana wo kuma, hali wo, wo ma yɛlɛma ka kalabanteyɛ boloka,

²⁴ n si ma wo yoge la. N si n yɛ lamunun wo la ka kɛ wo ma taragba ka a lagbɛlɛya wo kuma gben! N si wo tɔrɔya kɛ rɔ ka tenbi a sawa nyɔgɛ la.

²⁵ N si mɔgɛnu nana wo tɛma ka wo kɛlɛ. Wonu si wo tɔrɔya bawo wo ara sarama-kan tinya min bi ma tɛma wo na. Hali wo ya wo ladɛn wola soenu tɔ alako wo ni kisi wo yogenu ma, n si kiraya-yogomɛ lana wo tɛma min ti dandan muk! Wo ra si nama anu kɔrɔ ka wo nyɛrɛ don anu bolo.

²⁶ N si a ma, wola dɔn-fannu ni dɔgɔya. Hali denbaya kelan duruta dɔn-fan tela daga kelan min tɔ, n si a ma, denbaya tan mɔgɛnu ni dɔn-fan te daga kelan wo rɔ anu nyɔgɔn fɛ. Wo wa a tala wo nyɔgɔn tɛma, a ti a bɔ. Wo dama kɔnkɔtoe si to.

²⁷ “Ni wo ya wo mun tɔrɔyɛ kɛ dama kɔrɔ, ado wo yisi-gbɛlɛyanɛ ni to ka a dan-natenbi, wo ma nna tɔnnu bira,

²⁸ n fonde si bɔ wo kuma ka tenbi a nani nyɔgɛ wo la.

²⁹ Kɔnkɛ si wara wo kuma ha wo si wola dannu dɔn.

³⁰ Wo si wola isɛnti mintan wola bɛsɛnu bi kan min, nde si kan tinɛ wonu tinya ka wo furinu nakɛ wola bɛsi-tinyanɛ wonu kuma. Wo wara-koe si gboya n ye.

³¹ N si wola soenu bira ka anu kasara. N si wola bɛsi-kɔ-tinɛ bɛɛsi tinya fanan. Hali wo ya sarakɛnu bɔ n ye, n ti sɔn anu na. Anu mintan-sumɛ ti diya n ye muk!

³² N si wola nyamanɛ duginu tinya, hali wo yogo minnu bi nala anu sigila wo gbɛ rɔ, wola dugi wo tinya-nya si ma latɛrɛna-koe la anu fanan bolo.

³³ N si wo yogenu nana ka wo kɛlɛ ka wo bira ka ta wo la nyamanɛ siyamɛnu tɔ. Wola nyamanɛ rakolɔn si to. Wola soenu si ma iko tonbon-kɔrɛnu.

^34-35 Kɔnɔ yanni wo yogenu ni wo bira, san-wɔrɔnfila wo san-wɔrɔnfila, wo ti sɔn wola nyamanɛ ni a sulen wo bolo. Wo tumɛ wo ye wo yogenu bolo kan-tina-gbɛrɛkɛnu tɔ, wola nyamanɛ si a sulen wo kɔma.

³⁶ “Wo tumɛ wo ye nyɔ rɔ, wo si to yutoyɛ rɔ. Hali fɔnyɔ wa yanba-kunyɛnu namaga, wo si wo buri a kɔrɔ. Wo si to wo burila ka bui kilan bolo. A mani de iko wo yogenu denu bi wo kɔma kilɛ la.

³⁷ Hali mɔgɔ sa wo kɔma, wo si to wo kiannu nakɔla wo nyɔgɛ na ka bui buri-kɛ-tinɛ. Wo yoge minnu bi wo sagaranna, wo ti ke wonu kɛlɛla.

³⁸ Wo si to fagala nyamani-gbɛrɛkɛnu tɔ wo yogenu bolo. Wonu si wo ki iko bɛniki-kalɛnu.

³⁹ Wo toe minnu basannɛ wo yogenu na, wonu baranɛ si belenna tagamana wo yogenu tɛma kamasɔrɔn wo benbanu anubɛ wole fanan hakɛ sebu la.

^40-41 “Bawo wo si wo nyɛrɛ porokɔlɔ n bolo ka murutiya n ma woletɔ wo ti ma n diyana-mɔgɛnu na wo rɔ tun. Nde si ma wo yoge la gbɛ! N si wo latuntun wo yogenu ma ka ta wo la pon! Kɔnɔ n ba a yen n bara tɔrɔyɛ min nana wo kuma, wo ara koloya ha wo ara wo kegeyɛnu famayigi alako anu ni anu sɔ anu hakɛ la anubɛ anu benbanu ya min tinya.

⁴² Ni anu ya wo ma, n si n miri nta lanyiri ma n ya min kiri Iburayima, anubɛ Isiyaka anubɛ Yakoba ye. N si nta lanyiri kɛ ma a kurɛ la wo kegeyɛnu ye ka wola nyamanɛ lasɛgi anu ma tun.

⁴³ Kɔnɔ a fɔlɔfɔlɛ, fɔ wo ni nyamanɛ wo boloka, woletɔ nyamanɛ si a sulen bɛrɛbɛrɛkɛ. N bara tɔrɔyɛ min bɛɛsi lana wo kuma wola kalabanteyɛla ko la, fɔ wo kegeyɛnu ni anu munyu wo damasi kɔrɔ.

⁴⁴ Hali anu tenbi tɔrɔyɛ rɔ anu yogenu bolo, n ti anu boloka feufeu ka anu nato dogbe! Ni n ya wo ma, lanyiri min bi ma tɛma worɔ, wo ara tinya. Wo tigi le nde, Mari Alla la min si lanyiri latɔnbagaya.

⁴⁵ N ya lanyiri kɛ kiri wo ye, wole min bɔra Iyipiti ka nta fanka yira duninya la wati wo. N ya wo damasi ma alako nde ni ma wota Alla la. N si wo lanyiri kiri wo kegeyɛnu ye ka a ma a kurɛ la tun.”

⁴⁶ Tɔn kɛnu anubɛ sereya dira Musa ma Sinayi kɔnkɛ kuma Isirɛla mɔgɛnuna ko la.