Saraka-Masɔlɛnuta Tɔnnu 24 - ALLALA KUMƐLɛnpu Lamalan-Nya Marita Fani-Bɔn La ( Bɔ-Koe-Iyipiti 27.20-21 ) 1 Mari ya a fɔ Musa ye ko, 2 “I ni Isirɛla mɔgɛnu nabila tɔn kɛnu na. A fɔ anu ye ko anu ni na ɔlifi-tulu-hakikɛ la min bi kɛla ta-bara-gbagalamɛ rɔ min bi ndeta Fani-Bɔn la. Su-wo-su, fɔ tɛ ni taran a rɔ. 3 Fɔ Aruna ni ta lɛnpu wo lamalan tinɛ wura-wo-wura. Anu ni ki malanna ha banda ni ka. A si malan kan-tina-sɛnimɛ rɔ yorolan dunnɛ wo ya-telenma bonda-dɛ wara la. Yorolan dunnɛ wo le sansannɛ tɔn-kenkirɛ ya ma. 4 Aruna si lɛnpu wonu mafɛlɛn min bi lɛnpu sigi tinɛ. A si a ma, lɛnpu wonu si to malanna su-wo-su. 5 “Wo ni dɛgɛ-munku-hakikɛ pani-kunbɛ-nya fila bi ka wo ladan biredi-lɔngbɔn tan-ni-fila la. 6 Wo ni biredi wo ladɛn sigi tina fila la wɔrɔ-wɔrɔnyɛ ma sɛnɛ-tebulu kuma min bi nta Fani-Bɔn la. 7 Wo si isɛnti fanan sigi biredi-ladɛnnɛ wonu tɔnkɔn rɔ. Sulen-Tele wo Sulen-Tele, wo si biredi kɛnu kunka isɛnti kɛ la nde, Mari ye ka isɛnti mintan tɛ rɔ. A si ma worɔ iko wo ara biredi kɛnu denu mintan nde, Mari ye. 8 Ado Sulen-Tele wo Sulen-Tele fanani, wo si biredi kɛnu nyɔgɛ sɛgi biredi-gbɛrɛkɛ la. Wo si to kɛ le mala Isirɛla mɔgɛnu ye ha tumɛ min di nde, Mari ye. 9 Kɔnɔ biredi kɛnu, Aruna anubɛ ala denbayɛnu denutan kɛ la yɛ! Anu si to a dɔnna kan-tina-sɛnimɛ rɔ bawo saraka-masɔlɛnuta dɔnta-sɛnimɛ le min bɔra nde, Marila saraka-sɛnimɛnu tɔ.” 10-11 Isirɛla musi do ye nyɔ nun min tɔgɛ Sɛlomiti. A fa tɔgɛ le Dibiri min bɔra Dan bɔnsɔn rɔ. Sɛlomiti wo ya den-kei do sɔrɔn Iyipiti kei do ma. Anuna den-keminɛ wonubɛ Isirɛla kei do sɔnkɔ-sɔnkɔra. Anu bi sɔnkɛ kɛ kun na, kei wo min sɔrɔnta Iyipiti kei ma, wo ya Alla tɔgɔ lafɛya dankali-kɛ-tinɛ. Mɔgɛnu ya anu nadɛn ka a bira ka ta a la Musa warɛ. 12 Anu ya a makandan nyɔ ka a makɔni Mari si na min fɔ Musa ye kei wola ko la. 13 Mari ya a fɔ Musa ye ko, 14 “Wo ni kei wo bi ka ta a la dagɛ kɔma. Mɔgɛ min bɛɛsi ya kei kɛ dankali-kɛ-kuli lamɔɛn n tɔgɔ rɔ, wo damasi ni a bole sa kei kɛ kunyɛ kuma ka hakɛ latuntun ale kuma ka a yira a la ko a yilikinɛ. Wo kɔma gbɛ, Isirɛla mɔgɛ bɛɛsi ni a mabon kuri la ka a faga. 15 A fɔ Isirɛla mɔgɛnu ye tun ko ni mɔgɔ-wo-mɔgɔ si dankalɛ kɛ n tɔgɔ rɔ, wo tigi fanan bi tɔrɔyɛ sɔrɔnna ka le. 16 Wota hakɛ dunɛ si ma sayɛ la a bolo. Mɔgɔ-wo-mɔgɔ min siginɛ Isirɛla nyamanɛ rɔ, ni wo ya dankalɛ kɛ nde, Mari tɔgɔ rɔ fufafu, Isirɛla mɔgɔ damasi si wo mabon kuri la. 17 “Min sanɛ wo kuma fanani, ni min ya mɔgɔ faga, wo ni wo fanan faga. 18 Ni min ya a ta-nyɔgɛla kolo-fan faga, a ni a nyɔgɔ lasɛgi. Kɛ si ma wo kɛ-nya la gbɛ, niyi si sara niyi la. 19 “Ni min ya a ta-nyɔgɛ kan-tinɛ do magba, anu si wo tayili sara a la ka ale fanan magba. 20 Ni min ya a ta-nyɔgɛ kole rakeri, anu si ale fanan kole keri. Ni min ya a ta-nyɔgɛ yɛ tii, anu si wo fanan tayili sara ka ale fanan yɛ tii. Ni min ya a ta-nyɔgɛ nyin do keri, anu si wo fanan tayili sara a la ka atɛ keri. Ni min ya a ta-nyɔgɛ tanban nya min, wo ni ale fanan tanban wo nya na le. 21 Ni min ya a ta-nyɔgɛla kolo-fan faga, a ni a nyɔgɔ lasɛgi kolo-fan la. Ni min ya a lawuli a ma ka a ta-nyɔgɛ hadama-dan faga, wo ni ale fanan faga. 22 Tɔn kɛ siginɛ Isirɛla mɔgɛnu kuma anubɛ sundannu bawo nde le wota Mari Alla la min ya kɛ fɔ.” 23 Mari ban kɛnu fɔla Musa ye, a ya kuman-kan kɛnu natenbi mɔgɛnu ma. A ban, anu ya a ma iko Mari ya a fɔ Musa ye nya min. Anu ya Selemetila den-keminɛ wo bi ka bɔ a la dagɛ kɔma ka a mabon kuri la ha a fagara. |
Kuranko Common Language Bible © The Bible Society in Sierra Leone, 2006.
Bible Society in Sierra Leone