Saraka-Masɔlɛnuta Tɔnnu 23 - ALLALA KUMƐ

Ladɛn-Sɛnimɛnu Bira-Nya

^1-2 Mari ya tɔn kɛnu di Musa ma ka a fɔ Isirɛla mɔgɛnu ye ka a tɛgɛ ladɛn-koenu ma anu nyɔgɔn fɛ anu tenbi Alla batola tumɛ min.

³ Mari ko a ya tele wɔrɔ di ma ma ka mala wɔlɛnu kɛ kɔnɔ a tele wɔrɔnfila nyɔgɛ, a ko ma ni ma sulen wo rɔ. Mari ko a tele wɔrɔnfila nyɔgɛ wo ma, ma kana wɔlɛ kɛ kɔnɔ ma si ma ladɛn ka Mari Alla bato. Ma tara kan-bo-kan, a tele wɔrɔnfila nyɔgɛ wo, Maritɛ le wo la.

⁴ Ma si na ladɛn donu kɛ wati do kɔnɔ ma ye wonu mala wati min, wo le kɛnu na.

Kanan-Ko-Ladiyɛ anubɛ Biredi-Yɛlɛbɛlɛ-Dɔn-Ladɛn

⁵ Kanan-Ko-Ladiyɛ kɛ da si bira mata san karɛ fɔlɛ, tele tan-ni-nanɛ, fitiri magben ma. Wati wo nyɛrɛ si ma Mari gbiliya wati la.

⁶ Karɛ wo tele tan-ni-loli nyɔgɛ ma, ma si Biredi-Yɛlɛbɛlɛ-Dɔn-Ladɛn fanan kɛ. Tele wɔrɔnfila kɔrɔ, ma ye biredi-yɛlɛbɛlɛ kɛ dɔnna isiti sa a rɔ.

⁷ Tele wɔrɔnfilɛ kɛ tele fɔlɔtɛ ma, ma si ma kundɛn ka Alla bato. Tele wo nyɛrɛ rɔ fanan, ma ti wɔlɛ kɛ wulɔn iko ma duruta ma halala-wɔlɛnu kɛla nya min.

⁸ Mari ko ma ni mala dɔn-fen-sarakɛnu di ale nyɛrɛ ma tele wɔrɔnfilɛ wo kɔrɔ. A tele wɔrɔnfila nyɔgɛ wo fanan ma, ma si ma ladɛn ka Mari bato tun, ado ma kana ma halala-wɔlɛ fanan kɛ.

Dɔn-Fan Kun Fɔlɛnu Di-Koe Mari Ma

^9-10 Ma wa ke Kenan nyamanɛ rɔ ka mala dɔn-fen kun-fɔlɛnu tɛgɛ wati min, Mari ko ma ni anu kiri fɔlɔtɛnu bi ka a don saraka-masɔlɛ bolo.

¹¹ Saraka-masɔlɛ si wonu bi. Sulen-Tele banda kɛ ma, a si wonu dantɛgɛ Mari ma a kilɛ fɛ alako Mari si sɔn ma la nya min.

¹² Mari ko saraka-masɔlɛ tenbi dɔn-fen kun-fɔlɛ kiri fɔlɔtɛ dantɛgɛla Mari ma tele min nyɛrɛ rɔ, ma si na kolo-fen-saraka-mintantɛ la Mari ye, san-kelen-saga-dan fɛɛ sa min na,

¹³ anubɛ pani-kunbɛ-nya fila dɛgɛ la min tamaganɛ tuli la. Dɔn-fen-sarakɛ kɛ mintan-sumɛ si a diya don Mari rɔ. Wo kɔma, Mari ko ma ni na nɔnbɔ-gbɔ-yi kilasi-nya nani la ka a kofu sarakɛ kɛnu ma.

¹⁴ Mari ko ni ma ma atɛ fɔlɔn bɔ mala dɔn-fannu kun-fɔlɛ la, ma kana a bila ma dɛ rɔ, hali doni. A kuran le wo, a mintan de wo, a manɛ biredi la wo, a tenɛ de wo, ma kana a dɔn fɔ Maritɛ fɔlɔn ba bɔ a la. Mari ko habadan-tɔn le kɛ la min siginɛ ma kuma.

¹⁵ Ka a dabira Sulen-Tele banda kɛ ma, ma nara mala dɔn-fen kun-fɔlɛnu na Mari ye lunyɛ min, Mari ko ma ni lɔgɔkun wɔrɔnfila dan ka a fɔlɔ wulɔn tele ma.

¹⁶ Lɔgɔkun wɔrɔnfilɛ kɛ banda kɛ nyɔgɛ wo ma, Mari ko ma ni na mala dɔn-fen kun-fɔlɛ do la ale ye wulɔn.

¹⁷ Tele wo nyɛrɛ ma, denbaya-tigi bɛɛsi ni na biredi-lɔngbɔn fila la min nadannɛ isiti la dɔn-fen kun-fɔlɛ dɛgɛ-munke pani-kunbɛ-nya fila la ka wonu ma kɔ-fan la Mari ye.

¹⁸ Wo kɔma, Isirɛla mɔgɛ bɛɛsi ni na san-kelen-saga-den wɔrɔnfila la anubɛ tura kelen anubɛ saga-yigi, fɛɛ sa minnu na ka kɛnu sa biredi-lɔngbɔn filɛ kɛnu kuma. Kolo-fan kɛnu si ma saraka-mintantɛ la Mari ye anubɛ wo nyɔgɔn dɛgɛ-munke anubɛ wo fanan nyɔgɔn nɔnbɔ-gbɔ-yi. Sarakɛ kɛnu mintan-sumɛ si a diya don Mari rɔ.

¹⁹ Wo kɔma, Mari ko ma ni na baa-kɔrɔn kelen na ka wo ma ma hakɛ-sarakɛ la anubɛ san-kelen-saga-yigi fila ka wonu ma yisi-kima-sarakɛ la Mari ye.

²⁰ Saraka-masɔlɛ si biredi anubɛ saga-den filɛ dantɛgɛ Mari ma a kilɛ fɛ kɔnɔ sarakɛ wonu daganɛ saraka-masɔlɛnu denu ye. Saraka-sɛnimɛnu denu bi.

²¹ Tele wo nyɛrɛ rɔ, ma kana wɔlɛ mumɛ kɛ kɔnɔ ma ni ma ladɛn ka Mari bato wulɔn. Mari ko ladɛn-kɛ-tɔn siginɛ ma kuma ma tara kan-bo-kan ka a dabira bi ma ha wo tumɛ min di ale Mari ye. Ma kana a boloka.

²² Mari ko ni mɔgɛ min bi ala dɔn-fan tɛgɛla ala sɛnɛ rɔ, a kana a tɛgɛ ha a konko dɛ ma anubɛ a mabunsannu. Mari ko ka wonu to fugarɛnu anubɛ sundannu ye bawo ale le ma Mari Alla la min ya kɛ fɔ.

Buri-Fɛ-Ladɛn

^23-24 Mata san karɛ wɔrɔnfila tele fɔlɛ ma, Mari ko ma ni mala wɔlɛnu boloka. Ni ma ya buru-fɛ-kan lamɔɛn, ma si ta ka ma kundɛn ka ale Mari bato.

²⁵ Ma tenbi tala ladɛn wo rɔ, ma si na mala sarakɛnu na ma bolo.

Hakɛ-Yamatogon-Ladiyɛ

^26-27 Mala san karɛ wɔrɔnfilɛ tele tan ma, Mari ko ma si ma ladɛn wo rɔ ka sunyɛ don ka ta mata hakɛ-yamatogon-sarakɛnu na ale ye.

²⁸ A ko ma kana wɔlɛ mumɛ kɛ wulɔn kamasɔrɔn ma Hakɛ-Yamatogon-Tele le wulɔn tele la.

²⁹ Kɔnɔ Mari ko ni min ya fan dɔn wulɔn tele rɔ, wo mɔgɛ kana a miri tun ko Maritɛ le mɔgɛ wo la.

³⁰ Ni min wɔlita wulɔn tele rɔ, Mari nyɛrɛ si wo faga.

³¹ Mari ko tɔn kɛ siginɛ ma kuma ma tara kan-bo-kan ka a dabira bi ma ha tumɛ min di ale ye.

³² Ka a fɔlɔ ma karɛ wɔrɔnfilɛ, a tele kɔnɔntɛ fitiri-magben ma ha a tele tan fanan fitiri-magben ma, ma si wo le ma mata Sulen-Tele do la. Ma kana fenfen dɔn.

Lele-Sɔɛ-Ladɛn

^33-34 Mari ko ma wa ban mala dɔn-fannu tɛgɛla wati min, ma ni Lele-Sɔɛ-Ladɛn dabira mata karɛ wɔrɔnfilɛ a tele tan-ni-loli ma ka ladɛn wo kɛ tele wɔrɔnfila kɔrɔ.

³⁵ Ma kana wɔli-wo-wɔli kɛ a tele fɔlɔtɛ ma fɔ ka ma ladɛn wulɔn ka Mari bato.

⁴⁰ Tele wo nyɛrɛ rɔ, ma si mala kɔn-gbɔ-hakikɛ donu keri. Ma si na tin-yanbɛnu firifirila san ma anubɛ kɔlɔma minnu yanba-kun siyaman bi a la. Ma ye ladɛn kɛ kɛla wo nya ka mata Mari Alla gbiliya.

³⁶ Mari ko ma ni mata dɔn-fan kɔ-fan di a ma tele wɔrɔnfilɛ kɛ tele kelen-kelan bɛɛsi ma.

^42-43 Mari ko ma si mala bɔnnu boloka ka ta ma sigi lele wonu na tele wɔrɔnfila kɔrɔ. Mari ko ma si kɛnu ma woletɔ mala kegeyɛnu si anu miri mala bɔ-wati ma Iyipiti nyamanɛ rɔ anubɛ mala fani-bɔn kɛnu ma wulɛ rɔ yan bawo ale le mata Mari Alla la min ya ma labɔ yɔɔnyɛ rɔ Iyipiti nyamanɛ rɔ. A tele segin nyɔgɛ ma, ma si ma ladɛn wulɔn fanani ka mata dɔn-fen kɔ-fan di Alla ma tun ka ale bato. Ma kana wɔli-wo-wɔli kɛ.

⁴¹ Ka a dabira bi ma, tɔn kɛ ye mabɛ ma kegeyɛnu kuma.

³⁷ Ma ara ladɛn min bɛɛsi wara-koe fɔ kɛ la, Mari ko ma si ata gbiliyɛ yira a la saraka-bɔ-nya kɛnu fɛ, dɛgɛ-saraka-bɔ-nya wo, saraka-mintantɛ bɔ-nya wo, nɔnbɔ-gbɔ-yi saraka-bɔ-nya wo, anubɛ saraka-dɔntɛnu bɔ nya.

³⁸ Mala ladɛn-tele kɛnu denu sanɛ Sulen-Telenu kuma. Mari ko a ara sarakɛ minnuna ko fɔ kɛnu na, wonu denu sanɛ tele-wo-tele-sarakɛ anubɛ yisi-sewani-sarakɛ anubɛ lanyiri-kanbali-sarakɛnu kuma.

⁴⁴ Musa ya Isirɛla mɔgɛnu nabila Mari-bato-nya ladɛn tɔn kɛnu na.