Saraka-Masɔlɛnuta Tɔnnu 22 - ALLALA KUMƐ

Ko-Yogoma-Kɛlɛ Tɔrɔ-Nya

^1-2 Mari ya a fɔ Musa ye ko, “A fɔ Aruna anubɛ ala den-keminɛnu ye ko Isirɛla mɔgɛnu bi sarakɛ minnu dila n ma, wo ni wonu fɛ-bira gbiliyɛ rɔ a kilɛ fɛ. Ni wo ma a ma wo nya, wo si n tɔgɛ lafɛya bawo wo Mari le nde la min ya kɛ fɔ.

³ Aruna kegeyɛ saraka-masɔlɛ min sɛninyani ma iko tɔn ya a fɔ nya min, wo ni ta saraka-masɔ-wɔli-kɛ-tinɛ. Ni min bi wo mala, ale ti ke tun ka saraka-masɔ-wɔlɛ kɛ. Tɔn le kɛ la Aruna anubɛ a kegeyɛnu kuma ha duninya si ban. Wo Mari le nde la min bara kɛ fɔ.

⁴ “Ni kiraya-yogomɛ ye Aruna kegeya-mɔgɛ min fɛrɛ ma, ka, ni kiraya-yogomɛ ye bɔla min yatelenmɛ ma, mɔgɔ su wonu ti ke sarakɛnu dɔnna minnu dantɛgɛnɛ nde, Mari ma fɔ anu ba kɛndɛya tumɛ min ka sɛninya a kilɛ fɛ iko tɔn ya a fɔ nya min. Ni saraka-masɔlɛ tugura fan do la min bara tugu furi la nun, a ara a nyɛrɛ latinya wo rɔ. Ni saraka-masɔlɛ keiya-yi bɔra,

⁵ ka, ni a ya a bole tugu sogo-sɛninyabɛlɛ la, anubɛ mɔgɔ-sɛninyabɛlɛ, a ara a nyɛrɛ latinya worɔ.

⁶ Saraka-masɔlɛ min bara a nyɛrɛ latinya iko kɛ sufa, wo tigi sɛninyabɛlɛ si to ha wurɛ la. Fɔ a wa ta a ku wurɛ la, a ni na to a bole bilala sarakɛ rɔ ka a dɔn.

⁷ Fɔ fitiri magben ma, a ni to sɛninyala. Wo kɔma gbɛ, a si ke le ka saraka-sɛnimɛnu dɔn worɔ.

⁸ Saraka-masɔla fenfen kana soge dɔn min bara faga a nyɛrɛ ma anubɛ sogo-feremɛnu bara min faga. Ni min ya wo dɔn, wo sɛninyabɛlɛ si to. Nde le wota Mari Alla la min ya wo fɔ.

⁹ “Saraka-masɔlɛ bɛɛsi ni nna tɔn kɛnu bira iko n ya a fɔ wo ye nya min. Ni min ya nna tɔn kɛnu tinya, wo si yiliki sɔrɔn n bolo ka faga. Nde le wota Mari Alla la min ya wole sɛninya.

¹⁰ “Fɔ minnu bi saraka-masɔlɛnu bɔnsɔnnu tɔ yɛ, wonu denu dɔrɔn si ke sarakɛnu dɔnna. Sundan minnu bi saraka-masɔlɛ warɛ anubɛ wɔli-kɛlɛ minnu bi saraka-masɔlɛ bolo, wonu do-wo-do ti sarakɛ wo dɔn.

¹¹ Kɔnɔ yɔɔn minnu bi saraka-masɔlɛ bolo, ni a ya a san de, ka, ni a sɔrɔnta ata bɔn la, wonu si ke le ka sarakɛ kɛnu dɔn.

¹² Saraka-masɔlɛla den-sunkurɔn min furunɛ kei-gbɛrɛkɛ bolo, hali dunmusi wo ti sarakɛ kɛ do dɔn.

¹³ Kɔnɔ ni ala den-sunkurɔn wola kei ara a ban a la, ka, ni a mara kɛɛ-nyaganɛ la, a ni a taran fanan, a ma den sɔrɔn, ala dunɛ sa kei-gbɛrɛkɛ kuma fɔ a fa, a si ke le worɔ ka sarakɛ wo do dɔn. Fɔ saraka-masɔlɛnuta denbayɛnu yɛ, wonu denu dɔrɔn si ke sarakɛnu dɔnna.

^14-15 “Saraka-masɔlɛnu ni sarakɛnu fɛ-bira. Anu kana sɔn, mɔgɔ-gbɛrɛkɛ ni a dɔn. Saraka-masɔlɛnu na-kelen-nyɔgɛ ma mɔgɛ min na, ni a ya sarakɛ wo do dɔn, a ma a lɔn kɔnɔ tɔ-a-la, ni a ya a lɔn, a si a sara ka tenbi a ya min nyɔgɔn dɔn. Ni a ya loli-loli dɔn, a si kelen-kelen sa wo kuma, a si ta wɔrɔ-wɔrɔ. Ni saraka-masɔlɛ min sɔnta ko a ni a dɔn, wo ara sarakɛ lafɛya.

¹⁶ Mɔgɛ wo ara nanparan sɔrɔn saraka-masɔlɛ wo bolo bawo a ya min dɔn fɔ a wa wo nyɔgɔ sara ka do sa a kuma. Nde le wota Mari Alla la min ya sarakɛ kɛnu sɛninya wole ye.”

^17-18 Musa ya Marita tɔn kɛ latenbi Aruna anubɛ ala den-keminɛnu anubɛ Isirɛla mɔgɛ bɛɛsi ma ko, “Isirɛla mɔgɛnu anubɛ sundan minnu bi saraka-mintantɛ dila Mari ma, fɛɛ mumɛ kana taran a la. Ni a ye a dila a ma alako ka lanyiri kanbali, ka, ni a ye a dila a yisi-sewanɛ la, fɛɛ mumɛ kana taran a la.

¹⁹ Kɔnɔ ni a keimɛ ma, Mari ti sɔn a saraka-mintantɛ kɛ sufa la.

²⁰ Ni min ya kolo-fan wo do di Mari ma fɛɛ ye a la, Mari ti sɔn wo la.

²¹ “Ni a ye yisi-kima-sarakɛ dila Mari ma ka ata lanyiri kanbali, ka, ni a ye a dila a ma a yisi-sewanɛ la, fɔ ni a mara kolo-fan la fɛɛ sa min na, a mara a keimɛ la wo, a mara a musumɛ la wo, Mari ni na to sɔnna a la.

²² Mari ko ma kana kolo-fan di a ma min fiyɔn, anubɛ min bi a tonkanna, anubɛ fɛɛ sanɛ min fɛrɛ kan-tinɛ do la. Fɛɛ kɛ sufa ye kolo-fan minnu na, wo kana wonu ma saraka-dɔntɛ la mɔgɛnu ye.

²³ “Ni min bi sarakɛ dila bawo a yisi-sewanɛ ye a burɔ, ni sarakɛ wo gbɛndɛnkɛlan le, wo ma yogo. Mari si sɔn de wo la. Ni a sɔgɛ ye min na, a ni ata lanyiri-kanbali-sarakɛ bɔ, a kana kɛ sufa kolo-fan di Mari ma.

²⁴ Mari ko wo kana kolo-fen-tɛgan di a ma, ni mɔgɛ le ya a tɛgɛn, ka, ni ko-dogbɛrɛ ni a ma, a ni tɛgɛn. Mari ko a ti sɔn wo la.

²⁵ “Kolo-fan min bɔra sibolo-gbɛrɛnu bolo, Mari ko ma kana wonu ma sarakɛ la Mari ye. Fɛɛ ye wonu na bawo anu bara anu tɛgɛn, ado Mari ti sɔn wonu na.

^26-27 “Ninki-dan wo, saga-dan wo, baa-dan wo, ni a sɔgɛ ye mɔgɛ la ka wo do ma sarakɛ la Mari ye, fɔ ni a ya a to a na fɛ ha tele wɔrɔnfila kɔrɔ. Wati wo wa tenbi, ka a dabira a tele segin nyɔgɛ ma, a si ke le worɔ ka a ma sarakɛ la Mari ye.

²⁸ Kɔnɔ Mari ko wo kana kolo-fen-dan ani fila a na ma sarakɛ la tele kelen kɔrɔ.

²⁹ Mari ko ni a sɔgɛ ye mɔgɛ la ka sarakɛ bɔ ka Alla tanto wo la, fɔ ni wo tigi ya tɔn kɛnu bira woletɔ Mari si sɔn sarakɛ kɛ la a bolo.

³⁰ Ni min ye a dɔnna le, fɔ anu ni a dɔn tele wo nyɛrɛ rɔ kɔnɔ a toe kana ki ha wo banda kɛ sɔgɔma.

³¹ “Mari ko wo ni ata tɔnnu bira bawo ale le wota Mari Alla la.

³² Mɔgɔ kana Mari tɔgɔ lafɛya. Mari ko Isirɛla mɔgɛ mumɛ bɛɛsi ni a lɔn ko ale sɛnima. Ale le wota Mari Alla la min si wo sɛninya.

³³ Ale le nara wole la ka bɔ Iyipiti nyamanɛ rɔ alako a ni ma wota Alla-bɛrɛbɛrɛ la bawo wo tigi le ale Mari la.”