Saraka-Masɔlɛnuta Tɔnnu 21 - ALLALA KUMƐ

Saraka-Masɔlɛnu Karan-Koe Mari Bolo

^1-4 Musa ya Mari kuman-kan latenbi Aruna anubɛ ala den-keminɛnu ma ko, “Mari ko wole saraka-masɔlɛnu kana ta mɔgɔ-gbɛrɛkɛ san-koe kuma, fɔ wola bonna-mɔgɛnu dɔrɔn. Ni a taranta, i fa le fagara, ni wo ma, i na, ni wo ma, i halala dannu, ni wo ma, i na-kelen-nyɔgɔ-musi minna dunɛ siginɛ i kuma, ado a ma ta wɛ kei-wara-sigi rɔ, ni wo ma, i na-kelen-nyɔgɔ-keimɛ wobɛ min bi fa warɛ, wo si kɛnu denu dɔrɔn saya-koe kɛ. Ni saraka-masɔlɛ min tara a kebila-mɔgɔ-gbɛrɛkɛ san-koe kuma, saraka-masɔlɛ wo sɛninyabɛlɛ si to iko tɔn ya a fɔ nya min. Hali furu-koe ye anubɛ minnu tɛma, ni wo do fagara, a kana ta wo san-koe kuma.”

⁵ Mari ya a fɔ tun ko, “Ni min bi saraka-masɔ-wɔlɛ kɛla, wo kana a kunyɛ masii, ni wo ma, ka a buyɛ matɛgɛ, ni wo ma, ka a fɛrɛ matɛgɛ ko i ye san-di-kɛ le la.”

⁶ Mari ko saraka-masɔlɛnu sɛninyanɛ ni to. Anu kana ko-wo-ko ma min si Mari tɔgɔ lafɛya bawo anu bi sarakɛnu dila Mari ma. Fɔ wo sɛninyanɛ ni to.

⁷ Mari ko saraka-masɔla wo saraka-masɔla kana musi-yɛlan furu, ni wo ma, musi min bara kei-koe lɔn, anubɛ yili-bɔ-musi bawo wole saraka-masɔlɛnu sɛninyanɛ de!

⁸ Fɔ mɔgɛnu ni anu miri saraka-masɔlɛnu ma ko anu sɛninyanɛ de bawo anu bi dɔn-fen sarakɛnu dantɛgɛla Mari ma. Ale le mata Mari Alla la. Mari Alla sɛnima, woletɔ a si ata mɔgɛnu fanan sɛninya.

⁹ Ni saraka-masɔlɛla dunmusi mara yɛlan la, wo si ma a fala miliya-koe la. Mari ko fɔ ka dan wo lakɛ tɛ rɔ.

¹⁰ Kɔnɔ saraka-masɔlɛ, tuli ara kɛ min kunyɛ rɔ nun, kɔni, anubɛ saraka-masɔ-duruku-ba-wɛ ara don ale min kan na nun, Mari ko saraka-masɔla-kun-tigi-wɛ le wo la. Wo tɔn-maserengbanɛ le kɛ la saraka-masɔla-kun-tigi-wɛ kɛla ko la. Ni kɛ sufa ye dila saya-koe kuma, a kana a kunyɛ ratogo-togonɛ to a kuma anubɛ ka ala duruki rafarafara a kan na iko mɔgɛ doinu bi a mala nya min di-kɛ-tinɛ.

^11-12 Mari ko ni saraka-masɔla-kun-tigi-wɛ min bi ata wɔlɛ kɛla Marita Fani-Bɔn la, ni wo ya saya-koe lamɔɛn, hali a mara a fa ani fila a na le la, Mari ko a kana ta. Bawo ale dantɛgɛnɛ Mari ma, a kana a nyɛrɛ anubɛ Marita Fani-Bɔn latinya Mari yala. Ale le mata Mari Alla la min ya wo fɔ.

^13-14 Mari ko tun, saraka-masɔlɛ kana musi-yɛlan furu, anubɛ yili-bɔ-musi, anubɛ kɛɛ-nyaganɛ, fɔ a bɔnsɔn-dunmusi do min ma kei-ko lɔn bɛ, a si wo le furu.

¹⁵ Kɔnɔ ni a ya musi sufa kɛnu furu, anu bi dan min sɔrɔnna, wonu ti sɛninya Mari yala. A bɛnta, anu ni ma mɔgɔ-sɛnimɛnu na Mari yala. Mari le ya ale yabɔ ka a sɛninya a nyɛrɛ ye ka ma saraka-masɔla-kun-tigi-wɛ la.

^16-17 Musa ya Mari kuman-kan latenbi Aruna ma iko a ya a fɔ a ye nya min ko, “Ni fɛɛ ye mɔgɛ minnu na Aruna bɔnsɔn rɔ, wonu ti saraka-masɔ-wɔlɛ kɛ. Habadan-tɔn le kɛ la.

¹⁸ Kɔnɔ fiyɔn wo, namarɛ wo, fɛɛ sanɛ min yakɔrɔ denkɛ la wo, anubɛ min fɛrɛ lasɔlɔni ma iko mɔgɛ doinu bi nya min, Mari ko wonu kana saraka-masɔ-wɔlɛ kɛ.

¹⁹ Min bole, ni wo ma, a kian lɔpɔrɔ-lɔpɔrɛ,

²⁰ mɔgɛ min kɔɛ kunkuruntɔn wo, kei-kundi wo, fɛɛ sanɛ min yɛ la wo, kiraya-dandanbɛlɛ ye min fɛrɛ ma wo, anubɛ kei-tɛgan, Mari ko kɛnu kana ata saraka-masɔ-wɔlɛ kɛ.

²¹ Fɛɛ ye mɔgɛ minnu na Aruna bɔnsɔn rɔ, Mari ko wonu kana saraka-masɔ-wɔlɛ kɛ.

²² Kɔnɔ Mari ko mɔgɔ sufa kɛnu si ke le ka yisi-kima-sarakɛ dɔn anubɛ min dantɛgɛnɛ saraka-masɔlɛnu ma.

²³ Mari ko bawo fɛɛ ye mɔgɔ sufa kɛnu na, woletɔ anu kana anu gbɛrɛn yorolan ma Marita Fani-Bɔn burɔ anubɛ ka anu gbɛrɛn saraka-mintan-tinɛ ma wɔli-kɛ-koe la nyɔ rɔ. Ni anu ya wo ma, anu bara ata miran-sɛnimɛnu latinya. Mari ko ale le mata Mari Alla la min ya miran wonu sɛninya ma ye.”

²⁴ Mari ya kɛ le fɔ nde, Musa ye ka a fɔ ile, Aruna anubɛ ila dannu ye anubɛ Isirɛla mɔgɔ damasi.