Saraka-Masɔlɛnuta Tɔnnu 20 - ALLALA KUMƐ

Tɔn Birabɛlɛnu si Tɔrɔ Nya-Min

^1-2 Musa ya Mari kuman-kan kɛ latenbi Isirɛla mɔgɛnu ma ko, “Mari ko wo kana wola dannu ma sarakɛnu na Molɛki bɛsɛ ye. Ni min ya wo ma, Mari ko wo damasi ni wo mabon kuri la, a mara Isirɛla mɔgɛ la wo, a mara sundan na wo.

³ Ni min ya ala dan di bɛsɛ wo ma, wo tigi ara a ma, Marita Fani-Bɔn ara kɔsɔ anuta fisiriwɔlitayɛla ko la. Wo tigi ara Mari tɔgɔ-sɛnimɛ lafɛya fanan. Mari ko a si a kan-kɔ sɔ wo tigi la, ado ata ma wo mɔgɛ la tun!

⁴ Ni mɔgɛnu ya anu tui ko a ya min ma, anu ti sɔn a faga-koe ma wola ko la,

⁵ Mari si a kan-kɔ sɔ wo ko-yogoma-kɛlɛ anubɛ ala denbayɛnu na anubɛ a fɛ-sɔlɛnu. Min ya a to, a ye kɛnu fagala bawo wo mani de iko anu bara anu kan-kɔ sɔ Mari la ka anuna dannu ma sarakɛnu na Molɛki ye. Allata ma mɔgɔ sufa wonu na tun.

⁶ “Mari ko wo kana ta ke yi-kɔrɔ-fɛlɛnnɛnu ma ka hɛnkili sɔrɔn anu bolo. A ko ni min ya wo ma, a si a kan-kɔ sɔ wo tigi la. Mari ti a miri ko atɛ le wo mɔgɔ sufa la tun.

²⁷ Kei wo, musi wo, ni min ya a nyɛrɛ don yi-kɔrɔ-fɛlɛn-koe rɔ, Mari ko wo ni wo tigi mabon kuri la. Wo tigi tɔgɛ si to a nyɛrɛ la.

⁷ Wo sɛninyanɛ ni to bawo ale le wota Mari Alla la min ya kɛ fɔ wo ye.

⁸ A ko wo ni ata tɔnnu bira bawo ale le wota Mari Alla la min si wo sɛninya.

⁹ “Ni min tora a fa anubɛ a na lafɛyala, Mari ko wo ni wo tigi faga. A tigi tɔgɛ si to a nyɛrɛ la, yɔ!

¹⁰ “Ni kei do ya a sa a ta-nyɔgɛla musi fɛ, Mari ko wo ni anubɛ musi wo faga.

¹¹ Ni kei do ya a sa a fala musi do fɛ, a ara a fa layarabi worɔ. Wo si keminɛ wonubɛ musi wo faga. Anu tɔgɛ si to anu nyɛrɛ la.

¹² Ni kei do ya a sa ala den-keminɛla musi fɛ, fɔ ka wonu faga. Ni minnu ya wo ma, wonu bara kisimiriya-koe ladan, ado wonu tɔgɛ si to anu nyɛrɛ la, yɔ!

¹³ “Ni min ya a sa mɔgɔla yɔɔn-musi fɛ min mabiranɛ kei do bolo kɔnɔ a ma kunka wɛ, anu ti ale yɔɔn-tigi wo faga bawo a ya a sa ala yɔɔn-musi fɛ kɔnɔ a si yiliki-sarakɛ bɔ dɔrɔn.

¹⁴ Ale kei wo si na saga-yigi kelen na a bolo Marita Fani-Bɔn tenbi-bolɔn dafɛ

¹⁵ ka a don saraka-masɔlɛ bolo. Wo si a dantɛgɛ Mari ma alako ka a hakɛ kɔrɛ wo bɔ a ma. Wo si ma a hakɛ-yamatogon-fan la. Mari si a makoto worɔ.

¹⁶ “Ni kei gbansannu ya anu sa anu nyɔgɔn fɛ, wo si ma kisimiriya-koe la. Mari ko wo ni anu faga. Wonu kunyɛ si to anu nyɛrɛ kuma.

¹⁷ Ni kei do ya a sa dunmusi donubɛ a na fɛ, kisimiriya-koe le wo la. Wo si mɔgɔ sawɛ wonu nakɛ tɛ rɔ ka anu mintan gburr! Mari ti sɔn wo ko sufanu ma.

¹⁸ Ni kei ya a sa soge do fɛ, Mari ko wo ni mɔgɛ wonubɛ soge wo faga.

¹⁹ Ni musi ya soge bira ko wo ni a sa a fɛ, Mari ko wo ni musi ani fila soge wo faga. Anu tɔgɛ si to anu nyɛrɛ la.”

²⁰ “Ni kei ya a sa a tirisan-musi fɛ, wo si ma miliya-koe la anu bolo. Mari ko wo ni anu kɔn, ado a ko ata ma anu na tun. Kei minnu bi kɛ sufa mala, wo hakɛ dunɛ si to ale nyɛrɛ kuma.

²¹ Ni kei ya a tui ka a sa musi do fɛ min bi ala wati rɔ, Mari ko ata ma kei wonubɛ musi wo la tun bawo anu sɛninyani ma tun iko tɔn ya a fɔ nya min.

²² “A ko wo kana wo sa wo tɛnɛ-musinu fɛ anubɛ wo na-kelen-nyɔgɔ-musumɛnu bawo wobɛ wonu sɔrɔnni de!

²³ Ni kei ya a sa a berennuna musi fɛ, ni wo ma, a fanuna musi, a ara a berennu nayarabi anubɛ a fanu. Ni kei ya a sa a fanuna musi fɛ, ni wo ma, a berennuna musinu, wo mɔgɔ sunu ti dan sɔrɔn ha anu si faga. Wo hakɛ-dunɛ si to anu denu kuma.

²⁴ Ni kei do ya a na-kelen-nyɔgɛ dola musi bi sunburi la, wo tigi ara a na-kelen-nyɔgɛ lafɛya. Kei anubɛ musi wo gbandɛ si to ha anu si faga bawo anu bara koe min ma wo la, Mari ko wo sɛninyani ma iko tɔn ya a fɔ nya min.

^25-26 “Mari ko wo ni ata tɔnnu anubɛ a kuman-kan bira. Ni wo ma ata tɔnnu bira, wo wa ke Kenan nyamanɛ rɔ tumɛ min, Mari ko a si wo fanan gben nyamanɛ wo rɔ iko a ye nala nyɔ-mɔgɛnu gbenna nya min. Wo kana Kenan mɔgɛnuna kɛ-nyanu bi bawo anu bara ko-yogomɛ dan-natenbi. Woletɔ Mari fonde bɔnɛ anu kuma.

²⁸ Mari ya lanyiri kɛ kiri ko a si nyamani-hakikɛ wo ma wole anubɛ wo kegeyɛnutɛ la, ado tonyɛ le, a ya a fɔ nun ko a ara a di wo ma. Ado nfan, a ara a di wo ma pɛ! Mari ko wo tigi le ale la. A ara wole yabɔ ka dan-nafarɛ don wobɛ duninya-mɔgɛnu tɛma.

²⁹ Mari ko wo ni sogo-sɛninyanɛnu anubɛ sogo-sɛninyabɛlɛnu dan-nafarɛ lɔn. Konanu fanan bi wo nya na. Ni min ya wo do dɔn minnu sɛninyani ma, wo tigi sɛninyabɛlɛ si to.

³⁰ A ko wo ni ma mɔgɔ-sɛninyanɛ la bawo Mari Alla sɛnima. Maritɛ le wole la bawo a ara dan-nafarɛ to wole anubɛ duninya-mɔgɛnu tɛma.”