Saraka-Masɔlɛnuta Tɔnnu 2 - ALLALA KUMƐ

Dɛgɛ-Munku-Sarakɛ

¹ “Fenfen min si ma dɛgɛ la, mɔgɔ tenbi wo mala sarakɛ la Mari ye, fɔ ni a mara dɛgɛ-munku-hakikɛ la. Yanni a ni a di saraka-masɔlɛ ma, a si a yabasan tuli la ka isɛnti sa a kuma.

² Dɛgɛ-munke min yabasannɛ tuli kɛ la, saraka-masɔlɛ si a bolo-nya kelen bi ka a sa tɛ rɔ anubɛ isɛnti. Wo sumɛ si diya Mari ye. Bolo-nya kelan wo si ma iko a ya a damasi mintan Mari ye.

³ A toe wo si to saraka-masɔlɛnu ye. A sɛninyanɛ si to bawo anu ya a di Mari ma.

⁴ “Min tenbi nala dɛgɛ-munke la Mari ye ka bɔ biredi mintan tinɛ, fɔ a ni ma biredi la isiti sa min tɔ. Kɔnɔ anu bi biredi min nadanna biredi mintan tinɛ, ni a diyara mɔgɛ ye, a si biredi-dɔgɔmɛ mintan ka tuli sosa a kumɛ ma. Ni a diyara a ye fanan, a si a ma biredi-kinamɛ la min yabasannɛ tuli la ka a mintan.

⁵ “Ni mɔgɛ ye biredi yilanna pani-tasangbɛ rɔ, fɔ ni a mara biredi la min tamaganɛ tuli la, isiti sa min tɔ.

⁶ A wa ban a yilanna tumɛ min, a si a rakerikeri. A si tuli bi ka a furufuru biredi kuma. Wo kɔma, a si biredi wo bi ka a di saraka-masɔlɛ ma.

⁷ “Ni mɔgɛ ye dɛgɛ-munke ladanna biredi la min mintannɛ dagɛ rɔ, fɔ biredi min tamaganɛ tuli la.

⁸ A si biredi wo bi ka ta wo di saraka-masɔlɛ ma. Wo fanan si a bi ka ta a la saraka-mintan-tinɛ kuma.

⁹ A si doni keri a la ka a sa tɛ rɔ. Wo sumɛ si diya Mari ye. Wo si ma iko a ya a damasi mintan Mari ye.

¹⁰ A toe wonu si to saraka-masɔlɛnu bolo. A si sɛninya bawo anu ya a di Mari ma.

¹¹ “Fenfen min si ma dɛgɛ-munke la, mɔgɔ tenbi wo mala sarakɛ la Mari ye, a kana isiti kɛ a rɔ. Mɔgɔ kana fenfen di Mari ma isiti ye min tɔ, ni wo ma, liyi.

¹² Kɔnɔ ni mɔgɛ ya ala dɔn-fen kun-fɔlɛ tɛgɛ san la ka wo ma kɔ-fan la Mari ye, a ni na wo don saraka-masɔlɛ bolo. Hali isiti, ni wo ma, liyi taranta a rɔ, tana ma kɔnɔ wo kana a mintan saraka-mintan-tɛ la de!

¹³ Kɔnɔ wo si kɔgɛ kɛ wola sarakɛnu tɔ Mari ye alako wo ni to wo mirila lanyiri ma min bi wobɛ Mari tɛma.

¹⁴ Ni mɔgɛ do nara dɔn-fen kun-fɔlɛ la Mari ye tumɛ min, a ni a yilan ka a bunden.

¹⁵ A si a yabasan tuli la ka isɛnti sa a kuma.

¹⁶ Dɛgɛ min yabasannɛ tuli la, saraka-masɔlɛ si a bolo-nya kelen bi ka a sa tɛ rɔ anubɛ isɛnti. Wonu sumɛ si diya Mari ye. Bolo-nya kelen wo si ma iko a ya a damasi mintan Mari ye.