Saraka-Masɔlɛnuta Tɔnnu 19 - ALLALA KUMƐ

Ko-Ladan-Nya-Bɛrɛ si Alla Hɛnɛ Nya-Min

^1-2 Mari ya a fɔ Musa ye ko, “Wo ni ma mɔgɔ-sɛnimɛnu na bawo nde, Mari Alla sɛnima.

³ Wo ni wo fanu anubɛ wo nanu gbiliya iko n ya a fɔ nya min wati tenbinɛ rɔ. Wo ni Sulen-Tele ma tele-latankanɛ la fanan. Nde, wota Mari Alla ya kɛ le fɔ wo ye.

⁴ “Wo kana nde, Mari Alla boloka ka bɛsɛnu kɔ. Wo tigi le nde, Mari Alla la, woletɔ wo kana nɛgɛ-fenfen ma bɛsɛ la wo nyɛrɛ ye ka a kɔ.

⁵ “Wo tenbi yisi-kima-sarakɛ bɔla, wo si a tɔnnu bira iko n ya a fɔ wo ye nya min nun. Ni wo ya a bɔ a kilɛ fɛ, n si sarakɛ wo bira.

⁶ Ni wo ya yisi-kima-sarakɛ kɛ bɔ tele min nyɛrɛ rɔ, wo ni a dɔn wo wulɔn kɔnɔ ni a toe tora, wo si a dɔn tele wo banda kɛ ma. Ni do tora fanan ha a tele sawa nyɔgɛ ma, fɔ ni wo ya wo mintan gburr,

⁷ bawo a sɛninyani ma tun. Ni mɔgɔ-wo-mɔgɔ ya soge wo dɔn a tele sawɛ ma, nde, Mari ti sɔn wo sarakɛ la tun.

⁸ Ni min ya wo dɔn, wo tigi si nanparan sɔrɔn nde, Mari bolo bawo fan min dantɛgɛnɛ nde ma, a ara wo bi iko saraka-sogo ma. Wo kana wo miri mɔgɔ sufa kɛ ma tun ko nde, Maritɛ le ale la.

⁹ “Wo tenbi wola fui-fannu tɛgɛla sɛnɛ rɔ, wo kana a tonke-tonkerɔtɛnu wo, a konko-dafɛtɛnu wo, anubɛ a mabunsannu tɛgɛ.

¹⁰ Wo foora ki-fan minnu na wo, min buira kilɛ la wo, wo si wonu to fugarɛnu anubɛ sundannu ye. Nde, wota Mari Alla ya kɛ le fɔ wo ye.

¹¹ “Wo kana foninyɛ fɔ. Wo kana kankanyɛ anubɛ kensunyɛ kɛ.

¹² Wo kana wo gboro n tɔgɔ rɔ foninyɛ kuma bawo minnu bi wo mala, wonu si n tɔgɔ lafɛya. Nde, wota Mari Alla ya kɛ le fɔ wo ye.

¹³ “Wo kana tɔnɔ-wɛ labɔ wo ta-nyɔgɛnu kuma. Ni wo ya wɔli-kɛlɛ bi ka ta wola wɔli-kɛ-tinɛ, yanni i ni a boloka, wo ni a sarɛ don a bolo. Wo kana a sarɛ bira ha wo banda kɛ sɔgɔma.

¹⁴ Mɔgɔ kana tolo-gbere lafɛya wa ka fen sa fiyɔn yarɔ min si a ma, a ni bui. Wo ni nde, wota Alla gbiliya. Nde, wota Mari Alla ya kɛ le fɔ wo ye.

¹⁵ “Wo ni ma mɔgɔ-telennɛnu na kiti tɛgɛ tinɛ ka kitinu tɛgɛ a kilɛ fɛ. Wo kana lafisalayɛ kɛ kiti tɛgɛ tinɛ ka bolo-kolɔnnu yoe ma anu yiliki la. Wo kana fen-tiginu fanan yoe ma anu yiliki la bawo fen bi anu bolo.

¹⁶ Wo kana belenna wo nyɔgɔn tɔgɔ tinyana foninyɛ kuma. Ni mɔgɛ do ye a niyi kumafunfanna mɔgɔ-banu barɛ, ni mɔgɛ do ya a lɔn ko ala sereya-bɔɛ si a ta-nyɔgɛ wo bɔ le nanparan wo rɔ, a ni ta ala sereyɛ bɔ a ye worɔ. Nde, wota Mari Alla ya kɛ le fɔ wo ye.

¹⁷ “Mɔgɔ ta-nyɔgɛla koe kana to siginɛ i burɔ, fɔ i ni fɛrɛ nyini ka bɛnsɛnkɔninyɛ bɔ wo tɛma alako i kana yiliki sɔrɔn nde, Mari bolo i ta-nyɔgɔn wola ko la.

¹⁸ Ni mɔgɛ do ya ko-yogomɛ ma i la, i kana i tayili sara a la. I kana ala ko sigi i burɔ. Kɔnɔ yanni mɔgɛ ni wo sufa ma, a ni a ta-nyɔgɛ keni iko a nyɛrɛ. Nde, wota Mari Alla ya kɛ le fɔ wo ye.

¹⁹ “Wo ni nta tɔnnu bira. Wo kana kolo-fen subolo filɛ lamara kan tinɛ kelen. Anu kana anu nyɔgɔn yɛlɛ. Wo kana fen subolo filɛ ki sɛnɛ kelan rɔ. Wo kana kurɛ don wo kan na min nadannɛ yesekari subolo fila la.

²³ “Kɔnɔ ni wo kera Kenan nyamanɛ rɔ tumɛ min, wo ye ki-fan minnu kila, wonu ba gbɔɛ dabira, wo kana anu gbɔɛ dɔn san sawa kɔrɔ.

²⁴ A san nani nyɔgɛ ma, wo ni anu gbɔɛ dantɛgɛ nde, Mari ma.

²⁵ A san loli nyɔgɛ ma, a gbɔ siyaman si taran a la wo si min dɔn. Nde, wota Mari Alla ya kɛ le fɔ wo ye.

²⁶ “Wo kana sogo-suyi anubɛ a yele dɔn. “Wo kana wo nyɛrɛ don duruya-koenu tɔ.

²⁷ “Wo ye tala kan min, wo kana mɔgɛ wonuna di-kɛ-nya bi bawo mɔgɛ wonu bi anu kunyɛ da lasiila anubɛ ka anu buyɛ matɛgɛ.

²⁸ Anu bi anu fɛrɛ masɛbɛla ka anu fɛrɛ matɛgɛtɛgɛ di-kɛ-tinɛ. Nde, wota Mari Alla ya kɛ le fɔ wo ye.

²⁹ “Wo kana sɔn, wola dunmusinu ni ta bɛsi-bɔn la yɛlɛnya-kɛ-tinɛ. Ni min ya wo ma, wo si nde, Alla boloka ka don bɛsi-kɔ-koe rɔ. Wo si a ma, ko sufa wonu si wara nyamanɛ wo rɔ.

³⁰ “Wo ni Sulen-Tele gbiliya. Wo ni n bato tinɛ fanan gbiliya. Nde, wota Mari Alla ya kɛ le fɔ wo ye.

³¹ “Ni a sɔgɛ ye mɔgɛ do la ka a nyɛrɛ fɛ-koe lɔn, a kana ta ke yi-kɔrɔ-fɛlɛnnɛnu ma wa bolo-tafɛlɛnnɛnu. Ni min ya wo ma, wo tigi-sɛninyabɛlɛ si to. Nde, wota Mari Alla ya kɛ le fɔ wo ye.

³² “Wo ni wola kinanu gbiliya ka wo famayigi anu ye. Wo ni kilan nde la bawo nde, wota Mari Alla ya kɛ le fɔ wo ye.

³³ “Wo kana sundannu kɔndɔfili minnu basannɛ wo la bawo fanka ye wole la ka tenbi anu na.

³⁴ Wo ni anu bira iko wo ye wo nyɔgɔn birala nya min. Wo ni anu keni iko wo nyɛrɛ. Wo ni a lɔn yati, ko wole fanan bi sundanyɛ la Iyipiti nyamanɛ rɔ nun. Nde, wota Mari Alla ya kɛ le fɔ wo ye.

^35-36 “Mɔgɔ kana a ta-nyɔgɛ kensunya fen suman tinɛ, fen dan tinɛ rɔ wo, ala yanyɛ rɔ wo, anubɛ ala gbiliyɛ rɔ. “Nde le wota Mari Alla la min ya wo labɔ Iyipiti nyamanɛ rɔ woletɔ

³⁷ wo ni n kuman-kan anubɛ nna tɔnnu bira gben, bawo wo tigi le nde la.”