Saraka-Masɔlɛnuta Tɔnnu 17 - ALLALA KUMƐ

Yele Sɛninyɛ Lɔn-Koe

¹ Musa ya Mari kuman-kan kɛ latenbi Aruna

² anubɛ ala den-keminɛnu ma anubɛ Isirɛla mɔgɛ damasi.

^3-4 Ni Isirɛla mɔgɔ-wo-mɔgɔ ya kolo-fen-sarakɛ faga kan-tina-gbɛrɛkɛ, a ma na a la Marita tenbi-bolɔn dafɛ, wo tigi ara bila Mari la. A ara yele tinya min kɛ, hali wo ma wo miri tun ko Allatɛ le ale mɔgɛ wo la.

⁵ Fɔlɔ nun, Isirɛla mɔgɛnu si kolo-fannu faga anuna dagɛ kɔma kilɛ la. Woletɔ wo ni na wola sarakɛnu na Marita Fani-Bɔn tenbi-bolɔn dafɛ. Wo si anu don saraka-masɔlɛ bolo ka anu ma yisi-kima-sarakɛnu na.

⁶ Saraka-masɔlɛ si a yele pusen saraka-mintan-tinɛ tɔnkɔn rɔ ka anu kɛɛnnu mintan. Wo sumɛ si a diya don Mari rɔ.

⁷ Mɔgɛnu kana anuna kolo-fannu faga dagɛ kɔma bawo dina-do-mɔgɛnu bi anuna baanuna muninyɛ kɔla nyɔ. Ni min ya wo ma, wo tigi ara a nyɛrɛ purukulu Mari bolo. Tɔn kɛ siginɛ Isirɛla mɔgɛnu ma ka a fɔlɔ bi ma ha duninya si ban.

^8-9 Ni mɔgɛ ye kolo-fan mala saraka-wo-saraka la Mari ye, fɔ a ni na a la Marita Fani-Bɔn tenbi-bolɔn dafɛ, a mara Isirɛla mɔgɛ la wo, a mara sundan la wo. Kɔnɔ ni min ma sɔn wo mala, wo kana a miri tun ko Allata mɔgɛ le ale la.

Yisi-Kima-Sarakɛnu Faga Tinɛ Lɔn-Koe

¹⁰ Isirɛla mɔgɛ wo, sundan wo, ni a ya soge anubɛ a yele dɔn, Mari si diminya wo tigi ma. Mari ti a miri wo mɔgɛ ma ko atɛ le wo mɔgɔ sufa la

¹¹ bawo nima-fan bɛɛ niyi ye a yele rɔ. Woletɔ Mari nyɛrɛ ya a fɔ ko anu ni kolo-fannu yele bi ka a kɛ saraka-mintan-tinɛ ma. Wo si anu hakɛ bɔ anu ma. Niyi ye yele wo min tɔ, wo si mɔgɛnu hakɛ bɔ anu ma.

¹² Woletɔ Mari ya a fɔ Isirɛla mɔgɛnu anubɛ sundannu ye ko, “Wo kana soge anubɛ a yele dɔn.”

¹³ Isirɛla mɔgɛ wo, sundan wo, ni a tara donsoya-kɛ-tinɛ binyɛ rɔ, a ni sogo do faga, ni wo ma, kona do min sɛninyanɛ, a wa a kan natɛgɛ tumɛ min, a si bɔnkɛ do bi ka a yele yamatogon

¹⁴ bawo nima-fan bɛɛ niyi ye a yele rɔ. Mari ya a fɔ Isirɛla mɔgɛnu anubɛ sundannu ye ko anu kana soge anubɛ a yele dɔn. Ni min ya wo ma, anu kana anu miri tun ko Allatɛ le mɔgɛ wo la.

¹⁵ Isirɛla mɔgɛ wo, sundan wo, ni wo do ya sogo-suyi do dɔn min fagara a nyɛrɛ ma, a dɔnnɛ sɛninyani ma. Ni min ya sogo-suyi do dɔn sogo-feremɛ ya min faga, ni min ya wo dɔn, a sɛninyani ma. Mɔgɔ su min bi kɛ sufa mala, wonu si anuna kurɛnu anubɛ anu fɛrɛ-bɔnkɛnu ku. Hali a ya a ku fanan, a sɛninyani ma ha wurɛ la.

¹⁶ Ni a ma a ku a kilɛ fɛ, a si a hakɛ-tɔrɔyɛ sɔrɔn.