Saraka-Masɔlɛnuta Tɔnnu 16 - ALLALA KUMƐ

Anu Hakɛ Yamatogon-Ko-Sarakɛnu

¹ Arunala den-kemini filɛ nara tɛ dogbɛrɛ la Marita Fani-Bɔn la lun min, Mari ya anu faga wulɔn.

² Wo kɔma, Mari ya a fɔ Musa ye ko, “A fɔ i kɔrɔ Aruna ye ko a kana ta yorolan kɔma Sɛnima-Sɛnima-Tinɛ rɔ bawo nyɔ ta-wati latɛgɛnɛ de a bolo. A kana to tala nyɔ tuma-wo-tuma. Nde, Mari si bɔ gbɛ rɔ banda-fin-gbɛ rɔ nyɔ tɔn-kenkirɛ da-latogɔn kuma. Kɔnɔ ni i kɔrɔ ma nna kumɛ kɛ bɛɛ bira, ale fanan si faga.

³ A si ke tala le Sɛnima-Sɛnima-Tinɛ rɔ kɔnɔ a tenbi tala, a ni ta tura-bulun kelen na ka wo ma a hakɛ-sarakɛ la, anubɛ saga-yigi kelen ka wo ma saraka-mintantɛ la.”

⁴ Mari ya tɔn kɛnu fanan di Musa ma ko, “Yanni Aruna ni ta Sɛnima-Sɛnima-Tinɛ rɔ, a si a ku ka ala saraka-masɔ-kurɛnu don a kan na, wo le kurusi-kundi anubɛ duruku-ba-wɛ anubɛ a butɛ-kiri-fan anubɛ duruki wo fulɛ.

^5-6 A si na tura-bulan min na, a si wo ma ale anubɛ ala denbayɛnu hakɛ-sarakɛ la. Wo si ma anu hakɛ-yamatogon-fan la. Isirɛla mɔgɛnu si baa-kɔron fila don Aruna bolo ka wonu ma anu hakɛ-sarakɛ la anubɛ saga-yigi kelen ka wo ma saraka-mintantɛ la.

⁷ A si baa-kɔron filɛ wonu bi ka ta anu na Marita Fani-Bɔn don-dɛ la.

⁸ Aruna si kuru fila bi ka tamasere sa kuru filɛ wonu ma. Kelan, Maritɛ le wo la, kelan, hakɛ-gben-sarakɛ le wo la. Aruna si baa kelen yabɔ iko kuri wo ye a yirala a la nya min.

⁹ A si baa wo bi ka a ma mɔgɛnu hakɛ-sarakɛ la.

¹⁰ A ti hakɛ-gben-baa wo faga kɔnɔ anu si wo kɛndɛ boloka ka a gben. A ni ta wulɛ rɔ. Baa wo tenbi tala, a si ta mɔgɛnuna hakɛ kɔrɔmɛ la wulɛ rɔ pon!” (Kɔnɔ anu ti baa wo kɛndɛ gben fɔlɔ, fɔ Aruna wa ban Maritɛ fagala.)

Marita Fani-Bɔn Sɛninya-Koe Sarakɛnu

¹¹ Mari ko, “Aruna tenbi tura-bulan wo mala anubɛ ala denbayɛnu hakɛ-sarakɛ la tumɛ min,

¹² a si ta-wɔlɔn do bi ka bɔ saraka-mintan-tinɛ rɔ. Wo kɔma, a si isɛnti-munke bolo-nya fila bi anubɛ ta-wɔlɔn wo ka ta anu na Sɛnima-Sɛnima-Tinɛ rɔ.

¹³ A wa ta yorolan kɔma, a si isɛnti wo sa ta-wɔlɔn wo kuma nyɔ. Wo ye ta-sisɛ min nabɔla, wo si tɔn-kenkirɛ kuma-fannu yamatogon alako Aruna kana a yen. A kana faga.

¹⁴ A si turɛ wo yele do bi a bolo-nɔlɔnɛ la ka a pusen tɔn-kenkirɛ wo da-latogɔn ma min bi a wara la. Wo kɔma, a si a pusen kenkirɛ wo tɔgɔfɛ a wara la iko wɔrɔnfila.

^15-16 “Isirɛla mɔgɛnu sɛninyani ma bawo anu bi hakɛ kɛla tuma-wo-tuma. Fɔ Aruna ni kan tinɛ kɛ sɛninya bawo Marita Fani-Bɔn ye mɔgɔ-sɛninyabɛlɛ kɛnu tɛma dagɛ rɔ. Aruna wa bɔ luyi ma tumɛ min, a si baa-kɔrɔn doi wo kan natɛgɛ ka wo ma Isirɛla mɔgɛnu hakɛ-sarakɛ la. A si a yele do bi ka ta a la Sɛnima-Sɛnima-Tinɛ rɔ iko tun ka a pusen tɔn-kenkirɛ da-latogɔn ma anubɛ a tɔgɔfɛ iko a ya tura-bulan wotɛ ma nya min. Marita Fani-Bɔn Sɛnima-Sɛnima-Tinɛ sɛninya-bole le kɛ la.

¹⁷ Kɔnɔ Aruna wa ta Marita Sɛnima-Sɛnima-Tinɛ rɔ tumɛ min ata wɔli-kɛ-tinɛ, ha a si bɔ, mɔgɔ-wo-mɔgɔ kana don a fɛ Marita Bɔn la. A wa ban a nyɛrɛ anubɛ ala denbayɛ anubɛ Isirɛla mɔgɛ bɛɛsi sɛninyala tumɛ min,

¹⁸ a si bɔ luyi ma ka saraka-mintan-tinɛ sɛninya fanan. A si turɛ anubɛ baa-yele wo do bi ka a purupuru saraka-mintan-tinɛ bolon nanɛ bɛɛsi ma.

¹⁹ A si a bolo-nɔlɔnɛ sa yele wo rɔ tun ka a pusen saraka-mintan-tinɛ tɔnkɔn ma iko wɔrɔnfila. Wo le si a ma, saraka-mintan-tinɛ wo si sɛninya Isirɛla mɔgɛnu hakɛla ko la.”

Hakɛ-Yamatogon-Saraka Gben-Koe

²⁰ Mari ko, “Aruna wa ban yele pusenna Marita Fani-Bɔn Sɛnima-Sɛnima-Tinɛ ma anubɛ saraka-mintan-tinɛ ma iko tɔn ya a fɔ nya min, a si baa-kɔrɔn wo kɛndɛ bi ka wo ma anu hakɛ-gben-sarakɛ la.

²¹ Mɔgɛnu bara wunduyogoya-hakɛ minnu kɛ, anubɛ murutiya-hakɛnu, anubɛ ko-yogo sufa bɛɛ, Aruna si wo bɛɛ latenbi baa wo ma. A si a bolo filɛ sa baa wo kunyɛ kuma. Aruna si a sɔ anu hakɛ la anu bara min ma. Mɔgɔ kelen si bila baa wo fɛ ka a kɛndɛ gben. Baa wo si ta ha wulɛ rɔ.

²² Baa wo si ta anu hakɛ-kɔrɔmɛnu na a bolo wulɛ rɔ pon!

²³ “Wo kɔma, Aruna si don Marita Fani-Bɔn la tun ka saraka-masɔ-kurɛnu bɔ a ma ka anu to nyɔ.

²⁴ Wo kɔma, a si a ku nyɔ ka a nyɛrɛta kurɛnu bi. A wa ban a mayɛlɛmana tumɛ min, a si bɔ luyi ma ka saraka-mintantɛ saga-yigi filɛ wonu kan natɛgɛ ka anu mintan gburr! A wa ban kɛnu mintanna, wo si ale anubɛ Isirɛla mɔgɛnuna hakɛ yamatogon.

²⁵ A si saraka-soge wonu kɛɛnnu mintan anu hakɛ-sarakayɛ la.

²⁶ Kei min ya baa gben ha a tara wulɛ rɔ, wo fantigi si ala kurɛnu ku anubɛ a fɛrɛ-bɔnkɛ. A wa ban a kula, a si ke le worɔ ka ta dagɛ rɔ.

²⁷ A ya turɛ anubɛ baa minnu ma anu hakɛ-sarakɛ la nun ka anu yele bi ka ta a la Sɛnima-Sɛnima-Tinɛ, saraka-masɔlɛ do si wo gbolenu bi anubɛ a sogenu anubɛ a nuginu ka ta anu mintan anuna dagɛ kɔma.

²⁸ Yanni kei wo ni sɛgi a kɔma dagɛ rɔ tumɛ min, a si ala kurɛnu anubɛ a fɛrɛ-bɔnkɛ ku.

²⁹ “Karɛ wɔrɔnfilɛ wo tele tan nyɛrɛ ma, Isirɛla mɔgɛnu anubɛ anuna sundannu ni sunyɛ don ka anu sulen anu halala-wɔlɛ ma wo tele nyɛrɛ ma.

³⁰ Saraka-masɔlɛ wo si sarakɛ kɛnu bɔ tele wo nyɛrɛ rɔ alako anu hakɛ yama si togon nya min. Wo kɔma, anu si sɛninya Mari yala iko tɔn ya a fɔ nya min.

³¹ Tele wo si ma anu sɛninya-tele la, anu dama si sunyɛ don ka anuna wɔlɛnu to nyɔ wulɔn tele kelan. Wo si tɔn kɛnu bira ka a fɔlɔ bi ma ha tumɛ min di Alla ye.

³² Min si sarakɛ kɛ sufa masɔ, fɔ tuli kɛnɛ min kunyɛ rɔ, a dantɛgɛnɛ Mari ma, ado a siginɛ a fa gbɛ rɔ. A si saraka-masɔla-wɛla kurɛnu don a kan na ka sarakɛ wonu masɔ.

³³ Wo le si Marita Fani-Bɔn sɛninya anubɛ Sɛnima-Sɛnima-Tinɛ, anubɛ saraka-mintan-tinɛ, anubɛ saraka-masɔla-tomɛnu anubɛ Isirɛla mɔgɛnu damasi. Sarakɛ kɛnu denu si anu damasi sɛninya.

³⁴ Wo si tɔn kɛnu bira ka to sarakɛ kɛnu bɔla san la iko kelen ka a fɔlɔ bi ma ha tumɛ min fanan di Alla ye. Wo ye kɛ le mala alako wo hakɛnu yama si togon nya min.” Anu ya a ma iko Mari ya a fɔ Musa ye nya min.