Saraka-Masɔlɛnuta Tɔnnu 11 - ALLALA KUMƐ

Isirɛla Mɔgɛnu Tanɛ ye min Na

¹ Mari ya tɔn kɛnu di Musa anubɛ Aruna ma

² Isirɛla mɔgɛnuna ko la ko, “Wo si gboloma-soge bɛɛ dɔn

³ minnu kin-tore faranɛ fila la anubɛ anu bi anu dɔntɛ nunkula fanan.

^4-6 Kɔnɔ wo kana nyomɛ dɔn anubɛ kɔnkɔbarɛ anubɛ fasan. Kɛnu ma sɛninya wo ye bawo kɛnu bi dɔn-fan nunkula kɔnɔ anu kin-tore farani ma fila la.

⁷ Wo kana kose anubɛ kungbilan dɔn bawo hali anu kin-torenu faranɛ, anu ti dɔntɛ nunku anu dɛ rɔ.

⁸ Wo kana soge kɛnu dɔn, hali ka i bole tugu anu suyi la. Anu sɛninyani ma wo ye.

⁹ “Yɛgɛ-wo-yɛgɛ min wɔrɛ anubɛ a wɔnɛnu bi a ma, wo ni wonu dɔn.

^10-12 Fenfen sufa min bi yi rɔ min wɔrɛ anubɛ a yole sa anu ma, wo kana wonu dɔn. Kɛnu sɛninyani ma wo ye. Wo kana wonu dɔn, hali ka wo bole tugu anu suyi la.

^13-19 “Wo kana kona minnu dɔn, wo le kɛnu na, kokɛ wo, gbingbinnyagan wo, anubɛ bibinu. Wo kana dogɛ anubɛ mansa-wala-kona dɔn fanan. Selekona wo, yi-fɛ-konanu wo, yɛgɛ-faga-kanko wo, yi-fɛ-sisinu wo, morobuwɛ wo, anubɛ tosɛnu, wonu fanan si ma wo tanɛ la.

^20-23 “Wo kana kɔinkian-wo-kɔinkian dɔn, fɔ kunantɔn-pɔrɛ anubɛ kɛran anubɛ kondɔn. Fen-mɛsɛ tomɛ min si tagama dugi ma anubɛ min si gban anu kanban rɔ, wonu sɛninyani ma wo ye.

^24-25 Ni min ya a bole tugu kɛ do sufa suyi la wa ka wo do-wo-do yatɔnbɔn, wo tigi ni ala kurɛnu ku kɔnɔ a sɛninyabɛlɛ si to ha wurɛ la iko tɔn ya a fɔ nya min.

^26-28 “Soge minnu tore latintannɛ anubɛ soge minnu kin-mɛnsannu bi a ma, mɔgɔ-wo-mɔgɔ ya a bole tugu wo do sufa suyi la, wo tigi ni ala kurɛnu ku kɔnɔ a sɛninyabɛlɛ si to ha wurɛ la iko tɔn ya a fɔ nya min.

^29-30 “Wo kana wo bole tugu tula-wo-tula la hali dugi-kɔrɔ-tulɛnu. Fenfen min manɛ iko basɛ anubɛ dandanma-yirɛ anubɛ nɔnsɛn, hali min kolo iko kana, wo kana wo bole tugu wonu na hali anu suyinu.

³¹ Ni min ya a bole tugu kɛ do la, wo tigi-sɛninyabɛlɛ si to ha wurɛ la.

³² “Ni kɛ do suyi buira fenfen kuma, hali sɛbɛna-wɔli si kɛ a la, fan wo sɛninyani ma tun. Ni a mara fenfen na min nadannɛ kɔlɔma la, wo sɛninyani ma. Ni a buira sogo-gbole kuma wo ladannɛ fenfen na, wo fanan sɛninyani ma. Ni a buira gbama-kurɛ kuma, ni wo ma, kura-dogbɛrɛ kuma, wonu fanan sɛninyani ma. Ni a buira fan min kuma, wo si wo bi ka a layigi yi kɔrɔ ka a layɛlɛ. Wo sɛninyabɛlɛ si to ha wurɛ la.

³³ Ni suyi kɛ do buira bɔnku-dagɛ do rɔ, a ni a taran, fan do ye bɔnku-dagɛ wo rɔ, fan wo sɛninyani ma. Wo kɔma, wo ni bɔnku-dagɛ wo bɛrɛn ratii.

³⁴ Ni a ya a taran, yi ye bɔnku-dagɛ kɛ rɔ, ni min ya yi wo bi ka a kɛ dɔnta-wo-dɔnta ma, wo fanan sɛninyabɛlɛ si to. Ni a mara fenfen sufa la min si min, a ni a taran, wo ye dagɛ kɛ rɔ, wo min-kɛ-yi fanan sɛninyani ma.

³⁵ Ni fan kɛ do suyi buira biredi mintan tinɛ do kuma, wo si biredi mintan tinɛ wo tinya.

³⁶ Ni fan kɛ do suyi buira tenke rɔ, ka, ni a taranta, yi kɛnɛ kuru-tasinnɛ do rɔ, a ni bui wo fanan tɔ, wonu filɛ sɛninyanɛ de! Kɔnɔ kɛ filɛ bɔnɛ a la, ni fan kɛ do suyi buira fenfen do rɔ, wo sɛninyabɛlɛ si to.

³⁷ Ni fan kɛ do suyi buira sugu-wo-sugu kuma, wo sɛninyanɛ de!

³⁸ Kɔnɔ a ni a taran, sugi wo kɛnɛ yi ma, wo sɛninyani ma worɔ.

³⁹ “Ni sogo-sɛninyanɛ do fagara a nyɛrɛ ma, mɔgɔ wa a bole tugu wo la, mɔgɛ wo fanan sɛninyabɛlɛ si to ha wurɛ la.

⁴⁰ Ni mɔgɛ do ya soge wo kan tinɛ do dɔn, a si ala kurɛnu ku kɔnɔ a sɛninyabɛlɛ si to ha wurɛ la. Ni a ya sogo-suyi wo do bi ka ta a la, fɔ a ni ala kurɛnu ku. A sɛninyabɛlɛ si to ha wurɛ la.

^41-42 “Wo kana fen-makisimiriyanɛ kɛnu dɔn min bi a saganna a bu-gbole ma anubɛ min bi tala anu kin nanɛ la anubɛ min kin-siyaman bi a kɔrɔ.

⁴³ Wo kana kɛnu dɔn. Ni wo ya anu do dɔn, wo sɛninyani ma.

⁴⁴ Nde le wota Mari Alla la min bi a fɔla wo ye ko, ‘Wo ni wo nyɛrɛ mara sɛninyɛ rɔ bawo nde sɛnima.

⁴⁵ N ya wo labɔ Iyipiti nyamanɛ rɔ alako n ni ma wota Alla la. Wo ni ma mɔgɔ-sɛnimɛnu na iko nde, Mari.’

⁴⁶ “Sogenu anubɛ konanuna tɔn le kɛnu na. Fenfen sufa min bi yi rɔ anubɛ fenfen sufa min bi dugu-kole kuma, wonuna tɔn le kɛnu na.

⁴⁷ Wo si a ma wo fɛrɛma ka fen-sɛninyanɛ anubɛ fen-sɛninyabɛlɛ dan-nafarɛ lɔn. Wo ni a lɔn wo tanɛ ye soge min na anubɛ wo tana ma minnu na.”