Lankɛnimayɛ 9 - ALLALA KUMƐ

¹ Wo kɔma, melika loli nyɔgɛ ya ata buri fɛ. N ya lole min yen bɔla san ma nun ka bui dugu-kole kuma, Alla ya denka-dan-yenbɛlɛ da-nyin di wo ma.

² Lole wo ya denka-dan-yenbɛlɛ laka. Ta-sisi ye bɔla a rɔ iko sulubondon-ta-sisi-wɛ. Tele anubɛ fɔnyɔ finta ta-sisi wo bolo min bɔra denka-dan-yenbɛlɛ wo rɔ.

³ Kondɔnnu bɔra ta-sisi wo rɔ dugu-kole kuma. Alla ya sɛnbɛ di anu ma iko bondalɛ.

⁴ A ya a fɔ anu ye ko bin wo, kɔlɔma wo, ki-fen wo, anu kana wo tɔrɔ fɔ mɔgɛnu dɔrɔn, Allata mandan sa minnu telɛ ma, kɔni.

⁵ A ya a fɔ kondɔn wonu ye ko anu kana mɔgɛ wonu faga fɔ ka anu nyankankantan karɛ loli kɔrɔ. Dumɛ min bi anu na nyankankantan wo rɔ, wo tɔrɔyɛ mani de iko bondalɛ wa mɔgɔ bon.

⁶ Karɛ lolɛ wo kɔrɔ, mɔgɛ wonu si sayɛ nyini kɔnɔ anu ti ke a sɔrɔnna. Faga-sɔgɛ si anu bira kɔnɔ sayɛ si a buri anu kɔrɔ.

⁷ Kondɔn wonu manɛ iko soee minnu tabɛnnɛ kɛlɛ-kɛ-koe la. Fan do ye anu kunyɛ la min manɛ iko sɛnɛ-mansaya-fulɛ. Anu yakɔrɛ manɛ iko mɔgɔ yakɔrɛ.

⁸ Anu kun-sigi manɛ iko musu-kun-sigi. Anu nyin manɛ iko yara-nyin.

⁹ Fan do ye anu kɔgɔ-dɛ rɔ min manɛ iko kɔgɔ-matanka-fan min nadannɛ nɛgɛ la. Anu kanban-tagbesi-kan manɛ iko so-siyamɛnu tenbi kirindinu saganna anu burimatoe kɛlɛ-kɛ-tinɛ.

¹⁰ Anu mɔgɔ bon tinɛ min bi anu fɔɛn-sungban la, wo mani de iko bondalɛtɛ. Ni anu ya mɔgɛ bon anu fɔɛn wo la, karɛ loli, a ye wo dumɛ kɔrɔ.

¹¹ Mansɛ min bi anu kun na, melika le wo la min bi kun-tigiyɛ kɛla denka-dan-yenbɛlɛ kun na. Ale tɔgɛ Hiburu-kan rɔ ko, “Abadon.” A tɔgɛ le Kiriki-kan rɔ ko, “Apɔliyɔn.” Wonu kɔrɛ le ko, “Halakilɛ.”

¹² Gbalo fɔlɔtɛ ara tenbi. Kɛ kɔma, a ara to gbɛ gbalo fila.

¹³ Wo kɔma, melika wɔrɔ nyɔgɛ ya ata buri fɛ. Saraka-bɔ-tinɛ min nadannɛ sɛnɛ la, wo sɔnɛ Alla yakɔrɔ. N ya kuman-kan lamɔɛn ka bɔ wo tonko nanɛnu tɔ.

¹⁴ Kuman-kan wo kumara melika wɔrɔ nyɔgɛ wo ye, buri ye min bolo tɔ, kɔni. A ko, “Melika nanɛ minnu kirinɛ Yufereti-ba-kinamɛ dafɛ, wonu fulen!”

¹⁵ Mɔgɛ bɛɛ faranɛ sigi tina sawa la, melika nanɛ wonu fulenta ka mɔgɛ wonu sigi tina kelan faga. Alla ya anu namara wati wo nyɛrɛla ko la, tele wo nyɛrɛ rɔ, karɛ wo nyɛrɛ la, san wo la gben!

¹⁶ Kɛlɛ-dan minnu siginɛ soeenu na, wonu yatɛ fɔra n ye. Wulu kɛmɛ fila (200,000,000) le nun.

¹⁷ Nna ko-rayirɛ wo rɔ, n ya soeenu yen anubɛ minnu siginɛ anu kuma. Kɔgɔ-matanka-fan minnu wulennɛ iko tɛ, wo ye anu bolo anubɛ a bilolamɛ iko kuru-da-gbɛlɛ min tɔgɛ safaira anubɛ min nɛrɛ-munkulamɛ. Soee wonu kunyɛnu mani de iko yarɛnutɛ. Tɛ anubɛ ta-sisi anubɛ munku-gbɛ ye bɔla anu da rɔ.

¹⁸ Mɔgɛ faranɛ sigi tina sawa la, wo sigi tina kelan fagara tɔrɔya-fitina sawɛ wo bolo. Tɛ anubɛ ta-sisi anubɛ munku-gbɛ minnu bɔra soee wonu dɛ rɔ, wo le ya mɔgɛ wonu faga.

¹⁹ Soee wonu sɛnbɛ ye anu dɛ anubɛ anu fɔɛn fanan tɔ. Anu fɔɛn-sungban manɛ iko duguma-fan-kunyɛ, ado anu si mɔgɛ madumɛ wonu denu na.

²⁰ Mɔgɛnu ya bɛsɛ minnu nadan anu bole la, anu ma tubi ka fara wonu kɔɛ la. Mɔgɔ-toe wonu ma faga fitina sawɛ wonu kɔrɔ. Anu ma fara nyina-kɔɛ la. Bɛsɛ minnu nadannɛ sɛnɛ anubɛ wodi-gbɛ la wo, bɛsɛ minnu nadannɛ silɛɛ anubɛ kuri la wo, bɛsɛ minnu nadannɛ kɔlɔma la wo, anu ma fara wonu fanan kɔɛ la. Bɛsɛ wonu ti ke fen yenna. Anu ti ke ko lamɔɛnna. Anu ti ke tagamana. Anu ti ke fenfen mala.

²¹ Anuna mɔgɔ-fagɛ wo, anuna duriyɛ wo, anuna yɛlɛnyɛ wo, anuna kankanyɛ wo, anu ma fara wonu na ka tubi mumɛ!