Lankɛnimayɛ 18 - ALLALA KUMƐ

Babilɔn Soe Bui-Koe

¹ Wo kɔma, n ya melika-yigimatoe yen bɔla Arinyɛni tɔ, sarati ye min bolo dɔgɔma-ma-de! Waan rakara dugu-kole kuma ata gbiliyɛ bolo.

² A gbele-gbelenta kan-ba la ko, “A ara bui! Babilɔn-so-belebele ara bui fogbo! A ara ma nyinɛnu anubɛ nyina-kɔsɔnɛnu barɛ la gbɛ! Koni-yogoma-su bɛɛ anubɛ koni-haramunɛnu denu gbansan ladɛnnɛ a rɔ kaka.

³ Wo mara bawo a ya ala yɛlɛnyɛ-nata-baan-kunayanɛ di mɔgɛ bɛɛ ma alako anu ni a min. Mansɛnu bara yɛlɛnyɛ kɛ a fɛ. Yilanu mara nɔnfulu-tiginu na ala nata-dan-natenbinɛ fɛ.”

⁴ Wo kɔma, n ya kuman-kan-gbɛrɛ lamɔɛn bɔla Arinyɛni tɔ. A ye a fɔla ko, “Nna mɔgɛnu, wo bɔ! Wo ni bɔ a fɛ feu! Wo kana kofu a ma ata hakɛ rɔ alako wo kana tɔrɔyɛ sɔrɔn a fɛ!

⁵ A hakɛnu na ara dɛn anu nyɔgɔn kuma ka yɛlɛ ha ka ke san-kole ma. Nba, Alla ara a fonde to ala ko-yogomɛ ko.

⁶ Wo ni a bira iko a ya wo bira nya min. Wo ni wo tayili sara kinyama fila ala wɔli-yogomɛ wola ko la. A ya minni-fen-kunayanɛ min tabɛn wo ye, wo ni ala yi-lafɛ lafa wo nyɔgɔn fila la a ye.

⁷ A ara gbiliyɛ anubɛ nɔnfuli min nyɔgɛ di a nyɛrɛ ma nun, wo ni wo nyɔgɔn nyagbɛ anubɛ yisi-gbalɛ di ale ma kaka bawo a tora a fɔla a nyɛrɛ ma ko, ‘Wo ma a yen, n siginɛ musu-mansayɛ le la gbɛ! Kɛɛ-musu ma n na. N yisi ti gbala mumɛ!’

⁸ Ka a tɛgɛ wo ma, fitinɛ kɛ bɛɛ si na kɛ a ma tele kelen kɔrɔ, kirayɛ anubɛ yisi-gbalɛ anubɛ kɔnkɛ, kɔni. Tɛ si a mintan gburr bawo Mari Alla, Sɛnbɛ Bɛɛ Tigi le a kiti tɛgɛla.”

⁹ Mansɛ minnu ya yɛlɛnyɛ anubɛ fɛrɛ-bɔnku-nata kɛ a fɛ, wonu ba soe wo mintan-sisi yen tumɛ min, anu si gbele-gbelen ka di ala ko la biribiri!

¹⁰ Anu si anu sɔ wulɛ la pon alako anu kana do sɔrɔn ala nyagbɛ wo rɔ. Anu si a fɔ ko, “E, gbalo! Gbalo! Ile Babilɔn-so-belebele, so-sɛnbɛlamɛ, ila tɔrɔyɛ ara na kɛ i ma hawa kelen pe kɔrɔ!”

¹¹ Yilanu fanan si gbele-gbelen ka di ala ko la bawo mɔgɔ-wo-mɔgɔ sa anuna fere-fannu sanna tun.

¹² Anuna sɛnɛ wo, anuna wodi-gbɛ wo, anuna kuru-da-gbɛlɛmɛnu wo, anubɛ anuna kɔnɔ-kolo-da-gbɛlɛmɛnu, wonu sanna sa nyɔ tun. Anuna linɛn-kura-nyimɛnu anubɛ kura-bilolamɛnu, anuna kura-manunkunɛ, anubɛ kura-wulannu, wo fanan sanna sa nyɔ tun. Anuna kɔlɔma-hakikɛnu wo, anuna sogo-ba-nyin nadannɛ fan minnu na wo, kɔlɔma-da-gbɛlɛmɛnu wo, anubɛ silɛɛ wo, nɛgɛ wo, anubɛ bɛrɛ-kurinu wo, wo fanan sanna sa nyɔ tun.

¹³ Anuna fan min tɔgɛ sinamɔn wo, kɛnɛ wo, isɛnti wo, mira wo, anubɛ farankinsɛnsɛ, yila-wo-yila sa nyɔ min si wonu fanan san. Baan wo, tulu wo, dɛgɛ-munku wo, fui-fen wo, wonu sanna-wo-sanna sa nyɔ. Ninki wo, sagɛ wo, soee wo, kirindi wo, yɔɔn wo, hali mɔgɔni-gbui, wonu fanan sanna-wo-sanna sa nyɔ.

¹⁴ Yilanu ya a fɔ a ye ko, “Fere-fan min sɔgɛ ye i la ko anu ni ma itɛ la, wo bɛɛ ara tunu yen! Ila nɔnfuli anubɛ ila kinyɛ bɛɛ ara ban. I ti anu yen tun!”

¹⁵ Yila minnu ya yilayɛ kɛ soe wo burɔ ka ma nɔnfulu-tiginu na, wonu si anu sɔ wulɛ la pon, alako anu kana do sɔrɔn ala nyagbɛ wo rɔ. Anu bi gbele-gbelenna di-kɛ-tinɛ.

¹⁶ Anu si a fɔ ko, “E, gbalo! Gbalo ye so-wɛ wo kuma! A duruta a nyɛrɛ fɛrɛya bɔla linɛn-kura-hakikɛ la anubɛ kura-bilolamɛ anubɛ kura-wulan la ka a nyɛrɛ makiri sɛnɛ anubɛ kuru-da-gbɛlɛmɛ anubɛ kɔnɔ-kolo-da-gbɛlɛmɛnu na!

¹⁷ A ara bɔnɔ ala nɔnfuli wo bɛɛ rɔ hawa kelen pe kɔrɔ!” Kulun-kun-tigi bɛɛ anubɛ kulun-tasigilɛ bɛɛ anubɛ kulun-tawɔli-kɛlɛnu anubɛ min bɛɛ ye anu beli-fan sɔrɔnna kɔgɔ-yi rɔ, wo bɛɛ ya a masɛgi ale soe wo la pon!

¹⁸ Anu ya soe wo mintan-sisi yen yɛlɛla tumɛ min, anu gbele-gbelenta ko, “So-karantan wo nyɔgɔn sa nun mumɛ!”

¹⁹ Anu ya gbangban kɛ anu kunyɛ rɔ yisi-tinya bolo. Anu gbele-gbelenta di-kɛ-tinɛ ko, “E, gbalo! Gbalo ye so-karantan wo kuma! Soe le nun. Kulun-tigi min bɛɛ ye kɔgɔ-yi kuma, anu bara ma nɔnfulu-tiginu na ala nɔnfuli rɔ! Kɔnɔ a ara bɔnɔ fan wo bɛɛ rɔ hawa kelen pe kɔrɔ!”

²⁰ Kɔnɔ ile Arinyɛnɛ, i ni nyagalen soe wo tinya-koela ko la! Wole Allala mɔgɛnu anubɛ ata kilayɛnu anubɛ ata nɛbinu, wo ni fa sewɛ la ka a tɛgɛ min bara ma soe kɛ la. A ara wo tɔrɔ nya min, Alla ara a kiti tɛgɛ wola ko la!

²¹ Wo kɔma, melika-sɛnbɛ-tigi ya kuru-belebele-wɛ bi ka a lakɛ kɔgɔ-yi rɔ fɔrɔsɛ la. A ko, “Babilɔn-so-belebele-wɛ la si bui sɛnbɛ la ka le. Wo kɔma, a ti yen tun.

²² Sɔrɔn-fɔ-kan anubɛ hadama-den-kan anubɛ fulu-fɛ-kan anubɛ buru-fɛ-kan na ti mɔɛn a rɔ tun! Boloma-wɔli-kɛla fenfen ti taran ale soe wo burɔ tun. Hali kolon-tugu-kan, ala ti mɔɛn a rɔ tun!

²³ Hali lɛnpu-waan fenfen ti yen a rɔ tun. Kɔɛn-kura-tolon ti kɛ ale soe wo burɔ tun. Sɛnbɛ ye ala yilanu bolo duninya kan tinɛ bɛɛ rɔ nun, ado a ya duninya-mɔgɛ bɛɛ yanfa ala foninya-duriyɛ la!”

²⁴ Babilɔn tɔrɔta bawo nɛbinu yele anubɛ Allata mɔgɛnu yele taranta soe wo burɔ. Ɔnde, min bɛɛ fagara dugu-kole kuma, wonu yele taranta soe wo burɔ.