Lankɛnimayɛ 17 - ALLALA KUMƐ

Musu-Yɛlan min Malɔnnɛ Wɛ-Kɛ, Wo Wara-Koe

¹ Wo kɔma, pani-kunba wɔrɔnfilɛ ye melika minnu bolo, wo kelen ya a fɔ n ye ko, “Na ma ni ta. Babilɔn-so-wɛ min manɛ iko yɛlan, wo tɔrɔta nya min, n ni wo yira i la. Babilɔn wo sɔnɛ ba-siyaman dafɛ.

² Mansɛnu bara yɛlɛnyɛ kɛ musu-yɛlan wo fɛ, ado mɔgɛ bɛɛ ara ma gbɛɛtoe la ala yɛlɛnyɛ bolo.”

³ Melika tara n na wulɛ rɔ Allata Ni-Sɛnimɛ baraka rɔ. N ya musi do yen nyɔ, a siginɛ sogo-ferema-wulan la. Sogo-feremɛ wo, a kunyɛ wɔrɔnfila, a kere tan. Alla-rapɔsi-kumɛnu sɛbɛnɛ a kan tinɛ bɛɛ ma.

⁴ Musi wo fɛrɛya bɔnɛ kura-bilolamɛ anubɛ a wulenmɛ la. A makirinɛ sɛnɛ anubɛ kuru-da-gbɛlɛ anubɛ kɔnɔ-kolo-da-gbɛlɛ-gbɛmɛ la. Sɛnɛ-yi-lafɛ ye a bolo tɔ. Wo lafanɛ ko-latinyanɛnu anubɛ ala yɛlɛnya-ko-haramunɛnu na.

⁵ Tɔgɛ do sɛbɛnɛ ale musi wo telɛ ma min nya-yen-koe gbɛlɛ. A sɛbɛnɛ a ma ko, “Yɛlan bɛɛ anubɛ dugu-kolo-haramu-koe na le Babilɔn so-wɛ la.”

⁶ N ya a yen ko musu-yɛlan wo mara gbɛɛtoe la Allala mɔgɛnu yele-minyɛ bolo. Allata mɔgɛ wonu fagara anuta lanayɛla ko la Yisa ye. N ya musi wo yen tumɛ min, n kawara kati!

⁷ Melika wo ya n manyinika ko, “I ye kawala nfenna? Min nya-yen-koe gbɛlɛ musi kɛ wara-koe rɔ, n si wo fɔ i ye anubɛ sogo-feremɛ min tara a la, a kunyɛ wɔrɔnfila, a kere tan.

⁸ I ya sogo-feremɛ min yen, wo kɛndɛ le nun kɔnɔ a ara faga, bi ko ma! Alla si a furi layɛlɛ ka bɔ denka-dan-yenbɛlɛ rɔ. A si a halaki. Kɔnɔ minnu tɔgɔ sɛbɛni ma nimaya-kitabu rɔ, yanni duninya da ni bira, wonu ba sogo-feremɛ wo yen tumɛ min, anu si kawa. Sogo-feremɛ wo kɛndɛ nun kɔnɔ a ara faga. Kɔnɔ sogo-feremɛ wo si bɔ gbɛ rɔ tun!

⁹ “Hɛnkili ye minnu bolo, anu si kɛ nya-yen. Kun wɔrɔnfilɛ wo, kɔnkɔ wɔrɔnfilɛ le wonu na musi wo siginɛ minnu kuma. Mansa wɔrɔnfila le wonu na fanan,

¹⁰ ado i ya mansa lolɛ minnu yen nun, wonu bara bui kɔnɔ kelan wo ye mansayɛ la fɔlɔn. Kelan wo min ma na wɛ, wo wa na tumɛ min, a si to mansayɛ la wati-kundu-ni kɔrɔ.

¹¹ Sogo-feremɛ wo min kɛndɛ fɔlɔ-nun kɔnɔ a faganɛ kaka, mansa segin nyɔgɛ le wo la. Mansa wɔrɔnfilɛ wonu segin nyɔgɛ le kɛ la, ado a bɔra wonu denu tɔ. Ale fanan bi a halaki-kilɛ le ma wo la.

¹² “I ya kere tan min yen wo la, mansa tan de wo la minnu ma wuli wɛ mansayɛ kɛla kɔnɔ anu bi sarati sɔrɔnna hawa kelen pe le kɔrɔ anuna mansaya-koe rɔ sogo-feremɛ wo fɛ.

¹³ Mansa tan wonu miriya kelen. Anu si anuna sɛnbɛ anubɛ anuna sarati di sogo-feremɛ wo ma.

¹⁴ Wonu si saga-dan kɛlɛ. Kɔnɔ saga-dan anubɛ ata mɔgɛnu si anu nɔ. A ya mɔgɛ wonu kele ka anu yabɔ anuta lanayɛla ko la. Saga-dan si anu nɔ bawo marinuta Mari le ale la anubɛ mansɛnuta Mansɛ.”

¹⁵ Melika ya kɛ fɔ n ye fanan. A ko, “I ya musu-yɛlan wo siginɛ yen bɛ minnu dafɛ, mɔgɔ-su bɛɛ le bɛ wonu na anubɛ sibolenu anubɛ nyama iko anuna kan faranɛ nya min.

¹⁶ I ya sogo-feremɛ min kere tan yen wo la, musu-yɛlan wo si gboya kere tan wonubɛ sogo-feremɛ wo ye. Anu si a bolo-fan bɛɛ bi a bolo ka a gbu-makolɔn to. Anu si a fɛrɛ-bɔnkɛ dɔn ka a toe lakɛ tɛ rɔ.

¹⁷ Anu ya anuna sarati di sogo-feremɛ wo ma alako a ni mansayɛ kɛ ha Allata kumɛ wo ni bɔ-a-la tumɛ min, ado Alla le ya miriya kelan wo di anu ma ko anu ni a sako kɛ.

¹⁸ “I ya musi min yen wo la, so-belebele le wo la min bi duninya-mansɛnu kun na.”