Lankɛnimayɛ 11 - ALLALA KUMƐ

Nɛbi Filɛ Wara-Koe

¹ Wo kɔma, melika do ya fen-suman-kɔlɔma di n ma. A ko, “I lasɔ ka Alla-Bato-Bɔn anubɛ saraka-bɔ-tinɛ suman. Ta batoli-kɛlɛnu dan minnu bi Alla-Bato-Bɔn la.

² Kɔnɔ kata-burɛ minnu bi Alla-Bato-Bɔnla minɛ rɔ, i kana nyɔ suman bawo kan tinɛ wonu bara di sibolo-gbɛrɛnu ma. Anu si So-Sɛnimɛ kɛ radɔn karɛ bi-nani ani karɛ fila (42) kɔrɔ.

³ N si nna nɛbi fila lata minnu fɛrɛya bɔnɛ kasa-kurɛ la. Wonu si Allala kumɛ fɔ tele waga kelen ani tele kɛmɛ fila ani tele bi-wɔrɔ (1,260) kɔrɔ.”

⁴ Nɛbi filɛ wonu, ɔlifi-kɔlɔma filɛ anubɛ lɛnpu filɛ le wonu na. Kɛnu denu sɔnɛ Duninya-Mumɛ-Tigi-Mari yakɔrɔ.

⁵ Ni mɔgɔ-wo-mɔgɔ ye a fɛ ka nɛbi wonu tɔrɔ, tɛ si bɔ nɛbi wonu da rɔ ka anu yogenu halaki. Ni nɛbi wonu tɔrɔ-sɔgɛ ya mɔgɔ-wo-mɔgɔ bira, wonu tigi si halaki tɛ la min bi bɔla nɛbi wonu da rɔ.

⁶ Sarati ye anu bolo ka san-kole dɛ latugun. Woletɔ anu bi Allata kumɛ fɔla wati minnu tɔ, bandɛ ti na mumɛ! Sarati ye anu bolo tenkenu kuma ka anu yɛlɛma yele la. A wa diya anu ye tuma-wo-tuma, sarati ye anu bolo fanan ka dugu-kole tɔrɔ fitina-su bɛɛ la.

⁷ Anu ba ban anuta kumɛ fɔla tumɛ min, sogo-feremɛ min si na bɔ denka-dan-yenbɛlɛ rɔ, wo si anu kɛlɛ. A si anu nɔ ka anu faga.

⁸ Anu Mari gbangbanta kɔlɔma ma kan min, anu furinu si sa kilɛ la so-wɛ wo rɔ. Soe wo misalɛ le Sɔdɔm soe la, ni wo ma, Iyipiti nyamanɛ.

⁹ Sibole bɛɛ anubɛ bɔnsɔn bɛɛ anubɛ mɔgɔ-su bɛɛ iko anuna kan faranɛ nya min, wonu si nɛbi wonu furi mafɛlɛn tele sawa ani a tala kɔrɔ. Anu ti sɔn wonu togon-koe ma.

¹⁰ Duninya-mɔgɛ bɛɛ si sewa nɛbi filɛ wonu faga-koe la. Anu si nyagalen ka anu nyɔgɔn sanba bawo nɛbi filɛ wonu ya tɔrɔya-ba lana duninya-mɔgɛ bɛɛ kuma.

¹¹ Tele sawa ani a talɛ banta tumɛ min, Alla ya anu niyi lasɛgi anu tɔ. Anu ya anu nasɔ. Min bɛɛ ya wo yen, wonu kilanta kati!

¹² Wo kɔma, nɛbi filɛ wonu ya kuman-kan-ba lamɔɛn ka bɔ Arinyɛni tɔ. A ko, “Wo yɛlɛ yan tɔ!” Anu yogenu bi anu mafɛlan kun na tumɛ min, banda-finyɛ ya anu bi ka anu nayɛlɛ Arinyɛni tɔ.

¹³ Dugu-yɛrɛyɛrɛn-ba kɛra wati wo nyɛrɛ rɔ. Soe wo faranɛ sigi tina tan na, wo sigi tina kelan halakira. Mɔgɔ waga wɔrɔnfila (7,000) fagara dugu-yɛrɛyɛran wo bolo. Mɔgɔ-toenu kilanta kosɛbɛ! Anu ya Alla tanto min bi mansayɛ kɛla Arinyɛni tɔ.

¹⁴ Gbalo fila nyɔgɛ ara tenbi kɔnɔ a makɔnɔ, a sawa nyɔgɛ si na tiriya!

Buru-Fɛ Wɔrɔnfila Nyɔgɛ Wara-Koe

¹⁵ Wo kɔma, melika wɔrɔnfila nyɔgɛ ya ata buri fɛ. Kuman-kan-wɛnu bɔra Arinyɛni tɔ ko, “Duninya-mansaya-sɛnbɛ ye mata Mari anubɛ ata Mɔgɔ-Yabɔnɛ bolo gbɛ, ado a si mansayɛ kɛ tolon!”

¹⁶ Wo kɔma, kɛmɔgɔ mogan-ni-nanɛ minnu mayiginɛ anuna mansaya-sigi-fannu tɔ Alla yakɔrɔ, wonu ya anu naburun-a-ma Alla bato tinɛ.

¹⁷ Anu bi a fɔla ko, “Mari Alla Sɛnbɛ Bɛɛ Tigi, min bi nyɔ kaka, min bi nyɔ kebi fɔlɔn, ma ye baraka birala i ye bawo i wara ila sɛnbɛ-wɛ mayira. I wara wuli mansayɛ kɛla gbɛ!

¹⁸ Sibolenu yisi bɔra bɛrɛkɛ, ado ila diminyɛ-labɔ-wati ara ke anubɛ furi kiti-tɛgɛ-wati. Ila wɔli-kɛlɛnu, ila nɛbinu, kɔni, anubɛ ila mɔgɛ bɛɛ, a dɔgɔma wo, a kinama wo, anubɛ min bɛɛ kilannɛ i la, anuna barayi-sɔrɔn-tumɛ ara ke. Minnu ya dugu-kole halaki, wonu halaki-wati ara ke!”

¹⁹ Alla-Bato-Bɔn min bi Arinyɛni tɔ, wo lakara. Tɔn-kenkirɛ ye kan min, bɛɛ si ke wo yenna Alla-Bato-Bɔn wo la. Wo kɔma, bandɛ ya a nyin masɔgɔ. A tugura. San serenta. Dugu yɛrɛyɛrɛnta. Banda-kolo-wɛnu buira.