Lankɛnimayɛ 10 - ALLALA KUMƐ

Melika anubɛ Gbolo-Lamininɛ Dɔgɔmanɛ Wara-Koe

¹ Wo kɔma, n ya melika-sɛnbɛ-tigi-gbɛrɛ namatoe yen bɔla Arinyɛni tɔ. A fɛrɛya bɔnɛ banda-finyɛ la. San-duri ye a kunyɛla minɛ rɔ. A yakɔrɛ ye malan-malanna iko tele. A kiannu dɔnkɔnyɔ iko tɛ tenbi kala-mɛlan la san ma.

² Gbolo-lamininɛ-dɔgɔmɛ lafulennɛ a bolo. A ya a bolo-nyimama-kian sɔ kɔgɔ-yi rɔ ka a maranma-kian sɔ gbele ma.

³ A gbele-gbelenta a kan-bɛ la. A kuman-kan manɛ iko yarɛ-borondo-kan. A ban gbele-gbelenna tumɛ min, san-sɛrɛn wɔrɔnfilɛ ya a yabi wɔrɔnde la.

⁴ Anu banta kumala nya min wo, n bi a fɛ nun ka sɛbɛli kɛ. Kɔnɔ n ya kuman-kan lamɔɛn bɔla Arinyɛni tɔ. A ko, “San-sɛrɛn wɔrɔnfilɛ ya min fɔ, i kana wo sɛbɛ bɛ min na. Gbundu-koe le wo la. A mara fɔlɔn!”

⁵ Wo kɔma, n ya melika min kin kelan yen kɔgɔ-yi rɔ, a kin kelan ye gbele ma, wo ya a bolo-nyimɛ layɛlɛ san ma.

⁶ A ya a gboro Alla rɔ min nimayanɛ habadan! San-kole anubɛ fan minnu bi a rɔ wo, dugu-kole anubɛ a kuma-fannu wo, kɔgɔ-yi anubɛ fan minnu bi a rɔ wo, ale le ya wo bɛɛ dan. Melika ko, “Matanbani mumɛ ti kɛ tun!

⁷ Melika wɔrɔnfila nyɔgɛ wa ata buri fɛ tumɛ min, Alla si ala gbundu-ko-latɛgɛnɛ kɛ iko a ya a fɔ ala wɔli-kɛlɛnu ye nya min, ala nɛbinu, kɔni.”

⁸ Nba, n ya kuman-kan min namɔɛn ka bɔ Arinyɛni tɔ, wo kumara n ye tun ko, “Gbolo-lamininɛ min tafulennɛ, i ni ta wo bi melika wo bolo min kian ye gbele anubɛ kɔgɔ-yi rɔ.”

⁹ N tara a fɔ melika wo ye ko a ni gbolo-lamininɛ wo don n bolo. A ya a fɔ n ye ko, “A bi. I ni a dɔn. I wa a dɔn, a si diya i da rɔ iko liyi kɔnɔ a si kunaya i burɔ.”

¹⁰ N ya gbolo-lamininɛ bi melika wo bolo ka a dɔn. A diyara n da rɔ iko liyi kɔnɔ n banta a lakununa tumɛ min, a kunayara n burɔ.

¹¹ Wo kɔma, kuman-kan ya a fɔ n ye ko, “I ni wɔlɔyiyɛ kɛ mɔgɔ siyamanna ko la tun anubɛ sibolo-siyamɛ anubɛ a mansa-siyamɛ iko anuna kan faranɛ nya min.”