Ko-Dabirɛnu 9 - ALLALA KUMƐ

Alla ya Lanyiri Min Kiri Nowa Ye

¹ Alla ya ata duwɛ layigi Nowa anubɛ ala dannu kuma ka a fɔ anu ye ko, “Wo ni yiri bui ka dugu-kole lafa tun.

² Nima-fan bɛɛ si kilan wo la, a sogo wo, a kona wo, a yɛgɛ wo. N bara wonu ma wotɛ la.

³ Nima-fan min bɛɛ ye dugu-kole kuma, wonu si ma dɔn-fan la wo ye. N bara nima-fan bɛɛ di wo ma iko n ya fui-fannu di wo ma nya min nun.”

⁴ Alla ya a fɔ Nowa ye tun ko, “Kɔnɔ wo kana soge anubɛ a yele dɔn mumɛ kamasɔrɔn niyi ye a yele wo le tɔ.

⁵ Ni min ya a ta-nyɔgɛ faga, wo fanan ni faga. Ni soge min ya hadama-dan faga, wo fanan si faga.

⁶ Bawo nde, Alla ya mɔgɛ dan n nyɛrɛla muninyɛ le tɔ, woletɔ ni min ya a ta-nyɔgɛ niyi bɔ, mɔgɛ do si wo fanan niyi bɔ.

⁷ Nba, wo ni to dannu sɔrɔnna alako wo kebilɛnu ni taran dugu-kole kan tinɛ bɛɛ rɔ.”

⁸ Alla ya a fɔ Nowa anubɛ ala den-keinu ye ko,

⁹ “N bara nta lanyiri kɛ kiri wobɛ wo bɔnsɔnnu ye

¹⁰ anubɛ nima-fan bɛɛsi min bɛɛ bɔra kulɔn rɔ, kona wo, sogo wo.

¹¹ N bara nta lanyiri kiri wo ye ko n ti duninya halaki yi la tun. N ti wo ma muk!”

¹² Alla ya a fɔ tun ko, “N bi nta lanyiri min kirila wobɛ wo bɔnsɔn anubɛ nima-fannu ye,

¹³ wo tamasere si ma san-duri la n bara min sa san ma wo la.

¹⁴ N ba bandɛ lafin tumɛ min, wo kɔma, wo ni san-duri yen san ma,

^15-16 wo ni a lɔn wo rɔ ko n bara n hɛnkili lamiri habadan-lanyiri kɛ ma, n ya min kiri wobɛ nima-fan bɛɛsi ye ko n ti duninya halaki yi la tun.”

¹⁷ Alla ya a fɔ Nowa ye tun ko, “N bara lanyiri min kiri mabɛ nima-fan bɛɛsi tɛma dugu-kole kuma, wo tamasere le san-duri kɛ la.”

Nowa anubɛ Ala Dannu Bara-Koe

^18-19 Nowala dan minnu bɔra kulɔn rɔ, wonu tɔgɛ le kɛnu na, Sɛma wo, Hama wo, anubɛ Yefɛti. Hamala den-kei, wo tɔgɛ le Kenan. Den mɔgɔ sawɛ kɛnu denu yirita ka dugu-kole lafa.

²⁰ Nowa le ya sɛni-sɛ dabira. Ale fɔlɔn ya nɔnbɔ-gbɔ-kuri-kiyi dabira.

²¹ A ya nɔnbɔ-gbɔ-yi wo do min. Wo ya a bira. A lakolɔn sani tora ala fani-bɔn la.

²² Kenan fa Hama, wo le ya a fa Nowa lakolɔn yen. A tara wo fɔ a na-kelen-nyɔgɔn mɔgɔ filɛnu ye luyi ma.

²³ Sɛma anubɛ Yefɛti ya duruku-ba-wɛ bira anu kan kɔma. Anu sɛgira anu kɔma kilɛ la ka anu fa sutura. Anu ma anu yɛ sɔ anu fa la alako anu kana na a lakolɔn yen.

²⁴ Nɔnbɔ-gbɔ-yi bɔra Nowa yɛ la tumɛ min, a nara to a lɔnna ala den Hama ya min ma a la.

²⁵ A ya a fɔ wo rɔ ko, “Hamala den Kenan anubɛ a bɔnsɔn si ma dankatoenu na. Anu si ma yɔɔnnu na Sɛma anubɛ Yefɛti bɔnsɔnnu kɔrɔ.”

²⁶ “Ma ni baraka bira Sɛmata Mari Alla ye. Alamɛ Kenan bɔnsɔn mara yɔɔnnu na Sɛma bɔnsɔn kɔrɔ.”

²⁷ “Alamɛ Yefɛti bɔnsɔn siyayara. Alamɛ Sɛma bɔnsɔn anubɛ Yefɛti bɔnsɔn sigira kan-tina-kelen, kɔnɔ Kenan bɔnsɔn si ma yɔɔnnu na Yefɛti bɔnsɔn fanan kɔrɔ.”

²⁸ Nowa ya san kɛmɛ sawa ani san bi-loli (350) bɔ yita-kasarɛ kɔma.

²⁹ Nowa siyi-tele-bɛɛ bɛnta san kɛmɛ kɔnɔntɔ ani san bi-loli (950) ma, a nara to fagala.