Ko-Dabirɛnu 8 - ALLALA KUMƐ

Yi Masagan-Koe

¹ Alla ma nyina Nowa anubɛ soge wonu ko minnu bi kulɔn wo rɔ nun. Alla ya fɔnyɔ latugu ka yi masagan.

² Yi min bi bɔla dugu kɔrɔ anubɛ yi min bi bɔla san ma, Alla ya wonu dan labira.

³ Yi ma tora yigila dugu-kole kuma tele kɛmɛ ani tele bi-loli kɔrɔ.

⁴ Nowa sɔrɔn-san kɛmɛ wɔrɔ nyɔgɛ, wo karɛ wɔrɔnfilɛ, tele tan-ni-wɔrɔnfila nyɔgɛ ma, kulɔn wo sigira Ararati kɔnkɔ-layan-bɛ do kuma.

⁵ Yi wo ma tora yigila ha san wo nyɛrɛ karɛ tan tele fɔlɛ ma. Kɔnkɛ wonu kumɛ tora gbɛ rɔ wulɔn.

⁶ Tele bi-nani tenbira tumɛ min, Nowa ya kulɔn wo wundan laka.

⁷ A ya bibi do boloka. Wo tora ta-ni-sɛgi kɛla ha yi gbalata dugu-kole kuma.

⁸ Wo kɔma, a ya purulan fanan boloka ka a lɔn ni yi ara fɔlɔ gbalala.

⁹ Kɔnɔ purulan ma a sigi tina sɔrɔn, woletɔ a sɛgira Nowa wara kulɔn rɔ kamasɔrɔn yi ye dugu-kole bɛɛ kuma fɔlɔn. Nowa ya a bole labɔ ka purulan wo bira ka a ladon kulɔn rɔ.

¹⁰ A ya a ma, tele wɔrɔnfila tenbira tun. A ya purulan wo lata tun.

¹¹ Purulan wo sɛgira a wara wurɛ la. Kɔlɔma yanba-kun-kuran min tɔgɛ Ɔlifi, wo ye a dɛ la. Nowa ya a lɔn wo le ma ko yi ara fɔlɔ gbalala dugu-kole kuma.

¹² A ya a ma, tele wɔrɔnfila tenbira tun. A ya purulan wo boloka tun. Wo tara kɔnɔ a ma sɛgi a wara tun.

¹³ Nowa sɔrɔn-san kɛmɛ wɔrɔ ani san kelen nyɔgɛ (601) ma, wo karɛ fɔlɛ tele fɔlɛ ma, yi gbalata. Nowa ya kulɔn wo kumɛ wayan ka a lɔn ni yi ma ara sagan.

¹⁴ A karɛ fila nyɔgɛ tele mogan-ni-wɔrɔnfilɛ ma, dugu-kole gbalata feu!

¹⁵ Alla ya a fɔ Nowa ye ko,

¹⁶ “Wobɛ ila musi ni bɔ kulɔn rɔ anubɛ ila den mɔgɔ sawɛ anubɛ wonuna musu mɔgɔ sawɛ.

¹⁷ I ni nima-fan bɛɛsi labɔ kulɔn wo burɔ, kona wo, sogo wo, nima-fan bɛɛ. I ni wo bɛɛ labɔ alako anu ni yiri ka dugu-kole lafa.”

¹⁸ Nowa anubɛ ala denbayɛnu bɔra kulɔn rɔ.

¹⁹ Nima-fan bɛɛsi bɔra iko anu sunu bi nya min.

Nowala Saraka-Bɔ-Koe Mari Ye

²⁰ Nowa ya saraka-mintan-tinɛ sɔ Mari ye. A ya sogo-sɛnimɛ anubɛ kona-sɛnimɛ donu bi ka wonu mintan gburr, ka wonu ma sarakɛ la Mari ye nyɔ.

²¹ Wo sumɛ ya a diya don Mari rɔ woletɔ Mari ya a fɔ a nyɛrɛ ma ko, “N ya a lɔn hali hadama-dan dennɛ le, a miriya bɛɛ bɛnnɛ ko-yogomɛ le ma kɔnɔ hali wo, n ti dugi danka tun mɔgɛnuna sɔn-yogomɛla ko la. N ti nima-fan bɛɛ faga tun iko n bara a ma nya min kɛ la.

²² Fananta duninya ye nyɔ, samɛ si don, telemɛ si bɔ, kimɛ si na, wusi si na, wɔli-kɛ-tumɛ si ke, a tɛgɛ-tumɛ si ke, suyi si ke, bandɛ si ka.”