Ko-Dabirɛnu 50 - ALLALA KUMƐ

¹ Yusufu ya a du a fa furi kuma. A dira ka a fa sunbu.

² Yusufu ya a fɔ ala bɛsi-bɔlɛnu ye ko, “Wo ni n fa furi wɔli alako a kana na tuli.” Anu ya a ma iko Yusufu ya a fɔ anu ye nya min.

³ Ka furi wɔli, tele bi-nani wɔlɛ le wo la. Tele bi-wɔrɔnfila kɔrɔ, Iyipiti kɛnu bi Yakoba dila.

⁴ Diyi-kɛ wo kara-a-la tumɛ min, Yusufu ya a fɔ mɔgɔ-ba donu ye ko, “Wo ta a fɔ mansɛ ye ko

⁵ yanni n fa ni a layigi tumɛ min, a ya a ma, n ya n keli a ye. A ara kaburu-soe min tabɛn Kenan nyamanɛ rɔ a ko n ni ta a togon nyɔ rɔ. Woletɔ n bi mansɛ madiyala ni a si sɔn, n ni ta n fa togon. N ba ban a togonna tumɛ min, n si sɛgi.” Mɔgɔ-banu tara wo fɔ mansɛ ye.

⁶ Mansɛ ya a yabi ko, “Ta, i ni i fa togon iko i ya i keli a ye nya min.”

^7-8 Yusufu anubɛ a na-kelen-nyɔgɛnu anubɛ anuna denbayɛnu tara anu fa furi la a togon tinɛ. Mansɛla kun-tiginu anubɛ Iyipiti mɔgɔ-banu, wonu dama bilara anu fɛ. Fɔ anuna dannu anubɛ anuna kolo-fannu, anu ya wonu denu dɔrɔn to anu kɔma Kosɛn sigisɔn rɔ.

⁹ Mɔgɛnu tara kirindinu anubɛ soeenu na anu bolo. A mara sɛrɛ-kɔngbɛ la.

¹⁰ Anu kera gbere-kole do ma Yorodan bɛ dafɛ min tɔgɛ Atadi. Tele wɔrɔnfila, anu bi Yakoba dila nyɔ.

¹¹ Kenan kɛnu ya anu yen dila nyɔ min kɛ, anu ko, “Nba, hɛrɛ-di-kɛ ma kɛ la, nyɛ?” Woletɔ anu ya nyɔ tɔgɔ sa Abɛli-Misiram bawo tɔgɛ wo kɔrɛ le iko mɔgɔ wa a fɔ ko, “Iyipiti kɛnu di-kɛ-tinɛ.”

^12-13 Yakobala den-keinu tara a furi la ha faran wo la anu benba Iburayima ya min san Hɛti kɛ do ma min tɔgɛ Ɛfirɔn. Faran wo ye Makipela tɛngbɛnya rɔ Mamireya telen tɔ Kenan nyamanɛ rɔ. Anuta kaburu-soe le faran wo la. Ala den-keinu ya a togon iko a ya a fɔ anu ye nya min.

¹⁴ Yusufu anubɛ a na-kelen-nyɔgɛnu anubɛ anu gba-fɛ-bilalɛnu bɔra a fa togon tinɛ ka sɛgi Iyipiti nyamanɛ rɔ.

Yusufu Kɔrɔnu Yisi-Kima-Kumɛ Fɔ-Koe

¹⁵ Nba, Yusufu na-kelen-nyɔgɛnu ya a yen tumɛ min ko anu fa ara faga, anu ya anu nyɔgɔn manyinika ko, “Ma ya ko-yogomɛ minnu ma Yusufu la, ni a ya a tayili sara ma la, wo si ma kama?”

¹⁶ Woletɔ anu ya kilayɛ lata a ma, anu ko, “I wa ta, i ni a fɔ Yusufu ye ko yanni ma fa ni faga,

¹⁷ a ya a fɔ ma ye ko ma ni ale Yusufu madiya alako ma ya ko-yogomɛ minnu ma a la, a ni ma makoto wo la. Kaka, male min bi a fata Alla kɔrɔ, ma ye ale madiyala, a ni ma to nyɔ a fata Alla wola ko la.” Yusufu ya kilayɛ wo lamɔɛn tumɛ min, a dira biribiri!

¹⁸ A ma mɛ, a kɔrɔ wonu nyɛrɛ-nyɛrɛ tara Yusufu wara. Anu ya anu madu a kɔrɔ ka a fɔ a ye ko, “Ma nara le iko ila yɔɔnnu. Ni ko-wo-ko diyara i ye, i ni wo ma ma la.”

¹⁹ Yusufu ya a fɔ anu ye ko, “Wo kana kilan. Alla ma nde la!

²⁰ Wole ya ko-yogomɛ sigi n na kɔnɔ Alla ya a yɛlɛma n ye a nyimɛ la alako mɔgɔ siyaman ni kanan n fɛ.

²¹ Wo kana kilan fenfen na. N si wobɛ wola dannuna dunɛ bi.” A ya anu yisi-kima-kumɛnu fɔ.

Yusufu Faga-Koe

²² Yusufu anubɛ a fala denbayɛ tora Iyipiti nyamanɛ rɔ.

²³ Yusufu kɔrɔyara ha a ya a tolo-birɛnu yen, ala den-keinu Ifɛrɛm anubɛ Manasa mamanɛnu, kɔni. Hali ala dan Manasata den Makiri, a ya wota dan yen a yɛ la.

²⁴ Yusufu ya a fɔ a na-kelen-nyɔgɛnu ye ko, “Nde fagamatoe le kɛ la. Alla si wo kandan yati, ka wo bɔ yan ka ta wo la lanyiri-nyamanɛ rɔ iko a ya lanyiri kiri ma benba-benbɛ Iburayima anubɛ ma benba Isiyaka anubɛ ma fa Yakoba ye minna ko la.

²⁵ Kɔnɔ yanni n ni faga tumɛ min, wo ni wo keli n ye ko ni wo ti ta n kolenu na Kenan nyamanɛ rɔ. Woletɔ wo kana sika, Alla si wo kandan yati!”

²⁶ Yusufu-sɔrɔn ya san kɛmɛ ani san tan (110) bɔ, a nara to fagala Iyipiti nyamanɛ rɔ. Anu ya a furi wɔli alako a kana tuli. Anu ya a sa kenkirɛ rɔ.