Ko-Dabirɛnu 49 - ALLALA KUMƐ

Yakobala Wɔlɔyiya-Kumɛ Ala Dannuna Ko La

¹ Yakoba ya ala dannu kele. Anu ya anu nadɛn a dafɛ. A ya a fɔ anu ye ko, “Koe minnu bi nala mala wo la yarɔ, nde, Isirɛla bi nala wonu denu fɔla wo ye kɛ la.

² Nna dannu, wo ni wo madon n na ka wo tole masɔ nna kumɛ kɛnu na.

³ “Rubɛn, nna sarɛ le ile la. Ile le ya nna keiyɛ labɔ gbɛ ma. Sɛnbɛ anubɛ gbiliyɛ ye ile bolo ka tenbi nna dan doinu na.

⁴ Kɔnɔ ni gboron-gboronna-yi si ke a nyɛrɛ marala, mani, ile si ke i nyɛrɛ marala. I ti ma kun-tigi la tun bawo i ya n namiliya ka i sa nna musi do fɛ.

⁵ “Simiyɔn anubɛ Lifayi, na-kelen-dan de wole la, ado sɔn kelen le wole la fanan. Wo ya wola kɛlɛ-kɛ-fannu ma murutiya-fannu na ka bui mɔgɛnu ma.

⁶ N ti basan wo la gbundu-koe fɔ tinɛ hali ka ntɛ fɔ wota ladɛn kuma. Ni wo yisi magboyara doni bɛrɛni, wo si mɔgɛnu faga. Ni yɛlɛn-sɔgɛ ya wo bira, wo si turɛnu kin-kɔma-fasɛnu natɛgɛ alako wo ni anu mayɛlɛn. Woletɔ n ti kofu wo ma mumɛ, wola gbundinu tɔ.

⁷ Alamɛ yili kirita wola yisi-magboyɛ wo dan la bawo wo ara wotɛ latenbi. Woletɔ wole Simiyɔn anubɛ Lifayi bɔnsɔnnu ta si nyɛnsɛn nde, Yakoba bɔnsɔnnu tɛma Isirɛla nyamanɛ rɔ.

⁸ “Yuda, i na-kelen-nyɔgɛnu si i tanto ka anu madu i kɔrɔ. I si i yogenu nɔ.

⁹ Yuda, i bɔnsɔn si ma iko yara-bulan min si mansayɛ kɛ soge bɛɛ kuma. A wa ta soge bira, a ni na a la faran la ka a dɔn saa! A wa ban a dɔnna tumɛ min, a si a nyɛrɛ rasagan nyaratata ka a sa. Sogo-wo-sogo ti sisi a la.

¹⁰ Ile Yuda, i bɔnsɔn si ma wo nya na le. Mɔgɔ-wo-mɔgɔ ti sisi i sɔ tinɛ bɔla i bolo. Mansayɛ ti bɔ ile Yuda bɔnsɔn bolo ha Mansa-bɛrɛbɛrɛ si na, duninya bɛɛ si min gbiliya.

¹¹ Mansɛ wo ti kilan ala sofɛlɛ kirila nɔnbɔ-kurinu tɛma nɔnbɔ-gbɔɛnu siya kan min! A si ala kurɛnu ku nɔnbɔ-gbɔ-yi wo la siyayɛ bolo.

¹² A yɛ si malan nɔnbɔ-gbɔ-yi-minyɛ bolo. A nyin si gbɛ nono-minyɛ bolo.

¹³ “Ile Sɛbulɔn, i bɔnsɔn si sigi kɔgɔ-yi dafɛ. Nyɔ si ma kulun nasɔ tinɛ la. Ita nyamanɛ si ta fɔɔ Saidon soe.

¹⁴ “Ile Isakari, i bɔnsɔn si ma le iko sofɛlɛ tinya-mansɛ min sɔnɛ ata dunu filɛ la a bolo.

¹⁵ Ile Isakari, i bɔnsɔn si na nyamanɛ min sɔrɔn, wo kin. Yanni anu ni foo anuta nyamanɛ wo la, anu si sɔn ka yɔɔnya-wɔlɛ kɛ nyamanɛ wo rɔ.

¹⁶ “Ile Dan, i bɔnsɔn si ma kiti-tɛgɛ-latelennɛ anubɛ kɛlɛ-kurugbɛ la Isirɛla bɔnsɔn doinu tɛma.

¹⁷ Anu si halliyɛ ladan anu yogenu nɔ-koe la iko tunfi min bi a dogonna kilɛ la soeenu kin-koe la alako so-laburilɛ wo ni bui.”

¹⁸ Yakoba ya madiyali kɛ ko, “E, n Mari, mabɛ nna dannu bi ila kisi-koe makɔnɔna.” Wo kɔma, a ya wɔlɔyiya-kumɛ dabira tun.

¹⁹ “Ile Kadi, mɔgɛnu si na bui i bɔnsɔn ma kɔnɔ wo kɔma, yili si sigi a tɛrɛn na. I bɔnsɔn ni anu gben.

²⁰ “Ile Asɛra, dɔn-fannu ti dasa i bɔnsɔnla nyamanɛ rɔ. Mansɛnuta dɔn-fannu si bɔ ile bɔnsɔn bolo.

²¹ “Ile Nafatali, i bɔnsɔn la si to lafɛrɛ rɔ iko minan-musi min bi a kun fɛ. Ko-nyimɛ si bɔ i bɔnsɔn rɔ iko minan-musi si to den-nyimɛnu sɔrɔnna nya min.

²² “Ile Yusufu, i bɔnsɔnnu si sabati iko kɔlɔma kuru-gbɔnɛ min bi tenke dafɛ. A si nanfa kubukubu, ka a bolɔnnu nata soe tarɛ kuma.

²³ I yogenu si to ile Yusufu bɔnsɔnnu makeliyala ka anu kɛlɛ kalabɛn la.

²⁴ Kɔnɔ hali wo, nde, Yakobata Alla Sɛnbɛ-Bɛɛ-Tigi, wo ya Yusufuta kalabɛn ragbɛlɛya. A ti bɔ a gbɛ rɔ. Ma makandannɛ le ale la. Wo le si a ma, ile Yusufu bɔnsɔnnu ti kilan. Anu si anu sɔ gben!

²⁵ Anu si anu sɔ gben, bawo ndeta Alla le wo la min bi anu dɛnbɛna. Alla Sɛnbɛ-Bɛɛ-Tigi le wo la min bi ata duwɛ tola wo kuma ka bandɛ lana wo kuma ka yi labɔ dugi kɔrɔ wo ye. A si a ma, i bɔnsɔnnu ni yiri. Ila kolo-fannu fanan ni sabati.

²⁶ N bara duwɛ minnu kɛ ile Yusufu ye kɛ la, wo kolo ndeta duwɛ ko i benbanu ya min kɛ nde ye. Iko kɔnkɔ-wɛnu bara mɛ dugu-kole kɛ kuma nya min, ileta duwɛ si mɛ wo nya na le. Ile Yusufu min bi i na-kelen-nyɔgɛnu kun na kɛ la, alamɛ duwɛ kɛnu birara ile ma.

²⁷ “Ile Bɛnyamɛ, i bɔnsɔn si to anu yogenu birala iko suluku-feremɛ si to sogenu birala sɔgɔma ani wurɛ la nya min.”

²⁸ Yakoba ya wɔlɔyiya-kumɛ minnu fɔ ka a masara ale Isirɛlala den tan-ni-filɛ la nya min, wo le wonu na.

Yakoba Faga-Koe

^29-30 Wo kɔma, Yakoba ya a fɔ ala dannu ye ko, “N sa mɛla fagala tun ka ta n benbanu taran lakira. Kɔnɔ ni n fagara tumɛ min, n benba Iburayima ya dugi min san Hɛti kɛ Ɛfirɔn ma Makipela tɛngbɛnya rɔ Mamireta kɔlɔmanu tele bɔɛ Kenan nyamanɛ rɔ, wo ni ta n togon n benbanu fɛ faran wo la. Mala kaburu-soe le nyɔ la.

³¹ N benba Iburayima anubɛ ala musi Sira togonta nyɔ le. N fa Isiyaka anubɛ ala musi Rebɛka togonta nyɔ le fanan. N ya nna musi Liya fanan togon nyɔ le.

³² Faran wo anubɛ dugi min bi ala foolɛ rɔ, Iburayima ya wo san Hɛtinu ma.”

³³ Yakoba banta wonu fɔla tumɛ min, a ya a sa ka so-sɛgi-kɛ.