Ko-Dabirɛnu 4 - ALLALA KUMƐ

Ken anubɛ Ebɛli Wara-Koe

¹ Nba, Hadama ya ala musi Hawa latenbi a kɔma. A ya buyi bi ka den-kei sɔrɔn. Hawa ko, “N bara den-kei sɔrɔn Marita dɛnbɛnɛ fɛ.” A ya dan wo tɔgɔ sa Ken bawo tɔgɛ wo kɔrɛ le iko mɔgɔ wa a fɔ ko, “N bara fen sɔrɔn.”

² Wo kɔma, a ya Ken wo tagbara-sɛ sɔrɔn. A ya den-kei wo fanan tɔgɔ sa Ebɛli. Saga-fɛ-biralɛ le wo la kɔnɔ Ken, sɛni-salɛ le wo la.

³ Lunyɛ do, Ken nara fan do la ka bɔ ala sɛnɛ rɔ ka a ma Mari kɔ-fan la.

⁴ Ebɛli fanan nara ata saga-den-fɔlɔ-hakikɛ do la. Mari sɔnta Ebɛli anubɛ ala kɔ-fan la

⁵ kɔnɔ a ma sɔn Ken anubɛ ala kɔ-fan la. Woletɔ Ken diminyara bɛrɛkɛ! A ya a yakɔrɛ sisi yisi-bɔɛ bolo.

⁶ Mari ya a fɔ ale Ken ye ko, “I diminyanɛ nfen na? Nfenna i wara i yakɔrɛ sisi?

⁷ Ni i ya ko-nyimɛ le ma nun, n si n ban ila kɔ-fan la nun, wa? Kɔnɔ bawo i wara ko-yogomɛ ma min kɛ, hakɛ ye i manɛgɛnna. A sɔgɛ ye hakɛ la, a ni i bira kɔnɔ ile kana sɔn, a ni i nɔ.”

⁸ Wo kɔma, Ken ya a fɔ a dɔgɛ ye ko, “Ma ta binyɛ rɔ.” Anu tara binyɛ rɔ. Anu bi nyɔ tumɛ min, Ken kɛra a dɔgɛ Ebɛli ma ka a faga.

⁹ Mari ya Ken manyinika ko, “I dɔgɛ Ebɛli ye mintɔ?” Ken ko, “Nde ye wo kalama? Ile ya n lɔn n dɔgɔ-makandannɛ le la, wa?”

¹⁰ Wo kɔma, Mari ko, “I wara nfen ma kɛ la? I tole masɔ! I dɔgɛ yele ye dila n dala ka bɔ dugi rɔ a tayili-sara-koe la.

¹¹ Ile min bara i dɔgɛ faga, i si dankɛ sɔrɔn ka tenbi dugi wo la min bara a dɛ laka ka i dɔgɛ yele lakunu i bolo, ado i ti tɔnɔ sɔrɔn dugi rɔ tun.

¹² Ni i ya i tui ka dugi wɔli, i ti fen sɔrɔn a rɔ muk! I si ma yilan-yilantoe la dugu-kole kuma.”

¹³ Wo kɔma, Ken ya a fɔ Mari ye ko, “Nna tɔrɔyɛ kɛ da rakolo n kuma. N ti a nɔ.

¹⁴ Bawo i wara i yakɔrɛ firindi n ma min kɛ ka n gben nna sɛnɛ kuma, ka a dabira bi ma fɔ n ba ma yilan-yilantoe la, ado ni mɔgɔ-wo-mɔgɔ ya n yen, wo si n faga.”

¹⁵ Mari ya lanyiri kiri Ken ye, a ko, “Ni mɔgɔ-wo-mɔgɔ ya ile faga, n si i tayili sara wo la iko wɔrɔnfila.” Wo le ya a ma, Mari ya tamasere sa Ken ma alako mɔgɛ min ba tamasere wo yen Ken ma, wo kana a faga.

¹⁶ Ken bɔra Mari fɛ ka ta Yilan-yilan Tinɛ Idɛn nakɔɛ tele-bɔɛ wara la.

Ken Bɔnsɔnnu Bara-Koe

¹⁷ Ken ya ala musi latenbi a kɔma. Wo ya buyi bi ka Inɔki sɔrɔn. Ale Ken ya soe min datɛgɛ, a ya ala dan wo tɔgɛ sa soe wo kuma Inɔkiya.

¹⁸ Inɔki wo ya Iradi sɔrɔn, Iradi wo ya Mehuyɛli sɔrɔn, Mehuyɛli wo ya Metusayɛli sɔrɔn, Metusayɛli wo ya Lamɛki sɔrɔn.

¹⁹ Lamɛki wo ya musu fila furu. Kelan tɔgɛ Eda. Doi tɔgɛ Sila.

²⁰ Eda ya Yebɛli sɔrɔn. Yebɛli wo bɔnsɔn denu siginɛ fani-bɔnnu na nun. Wonu mara kolo-fen-tiginu na.

²¹ Yebɛli dɔgɔ-kei tɔgɛ le Yubɛli. Bɔlon-fɔlɛnu anubɛ fuli-fɛlɛnu benba le wo la.

²² Lamɛkila musi Sila ya Tubali-Ken sɔrɔn. Siyakinu anubɛ nunakɛnu benba le wo la. Tubali-Ken wo tirisan-musi le Nama la.

²³ Lamɛki ya ala musi Eda anubɛ Sila rakele ka a fɔ anu ye ko, “Wo ni wo tole masɔ. Keminɛ min ya n tanban, n bara wo faga.

²⁴ Ni niyi wɔrɔnfila bɔra n benba Ken niyila ko la, ni anu ya nde, Lamɛki faga, niyi bi-wɔrɔnfila ani niyi wɔrɔnfila si bɔ nde niyila ko la.”

Sɛti anubɛ Inɔsi Wara-Koe

²⁵ Hadama anubɛ ala musi ya den-kei do sɔrɔn tun. Ala musi ya wo tɔgɔ sa Sɛti bawo tɔgɛ wo kɔrɛ le iko mɔgɔ wa a fɔ ko, “ka a di.” A ya a fɔ ko, “Alla ara den-kei do di n ma Ebɛli gbɛ rɔ tun, Ken ya min faga, kɔni.”

²⁶ Sɛti wo fanan ya den-kei sɔrɔn. A ya a tɔgɔ sa Inɔsi. Mɔgɛnu ya Mari batoe dabira wati wo le tɔ.