Ko-Dabirɛnu 36 - ALLALA KUMƐ

Isɔ Bɔnsɔnnu

¹ Isɔ bɔnsɔn le Idɔm kɛnu na.

² Isɔ kegeyɛnu le kɛnu na, Isɔ ya Kenan kɛnuna dunmusi fila furu. Kelan, Hɛtinuna dunmusi le wo la. A tɔgɛ le Eda. A fa tɔgɛ le Ilɔn. Doi wo, Hɛfanuna dunmusi le wo la. A tɔgɛ le Oholibama. A benba tɔgɛ le Sibiyɔn. A fa tɔgɛ le Ana.

³ A ya Nebayɔti tirisan-musi Basemati fanan furu, Sumanyilala dunmusi, kɔni. Kenan kɛ le kɛ dama la.

⁴ Isɔla musi min tɔgɛ Eda, wo ya Ɛlifasi sɔrɔn a ye. Ala musi min tɔgɛ Basemati, wo ya Ruwɛli sɔrɔn a ye.

⁵ Isɔla musi Oholibama ya den mɔgɔ sawa sɔrɔn a ye, Yewusi wo, Yalam wo, anubɛ Kora. Isɔla den-keinu ya dan minnu sɔrɔn Kenan nyamanɛ rɔ, wo le wonu na.

⁶ Isɔ ya ala denbayɛnu anubɛ ala bonna-mɔgɛ toenu anubɛ ala kolo-fannu anubɛ ala nɔnfuli mumɛ bɛɛ ya minnu sɔrɔn Kenan nyamanɛ rɔ, a ya wonu bi. Anu yirindira nyamani-gbɛrɛ tɔ ka bɔ a dɔgɛ Yakoba dafɛ

⁷ kamasɔrɔn anuna kolo-fannu siya. Anu ti ke sigila anu nyɔgɔn fɛ bawo anu siginɛ nyamanɛ kan tinɛ min tɔ, anu ti kun nyɔ rɔ.

⁸ Woletɔ Isɔ yirindira ka ta a daga makɛ Idɔm nyamanɛ rɔ kɔnkɛnu siya kan min.

⁹ Isɔ mamanɛ le kɛnu na,

^10-12 Isɔla musi Edala dan Ɛlifasi, wo ya den-kei mɔgɔ loli sɔrɔn, Timan wo, Omari wo, Sɛfo wo, Katam wo, anubɛ Kenasi. Isɔla dan Ɛlifasila yɔɔn-musi Timina ya Amalɛki sɔrɔn a ye.

¹³ Isɔla musi Basematila dan Ruwɛli, wo ya den-kei mɔgɔ nani sɔrɔn, Nehati wo, Sera wo, Sama wo, anubɛ Misa.

¹⁴ Sibiyɔnna dan Ena, wola dunmusi Oholibama, Isɔla musi, kɔni, wo ya den-kei mɔgɔ sawa sɔrɔn, Yewusi wo, Yalam wo, anubɛ Kora.

^15-16 Bɔnsɔn-kun-tigi minnu bɔra Isɔla musi Eda sɔrɛ rɔ, wonu tɔgɛ le kɛnu na, Timan wo, Omari wo, Sɛfo wo, Kenasi wo, Kora wo, Katam wo, anubɛ Amalɛki. Kun-tigi le kɛnu na minnu bɔra Isɔla dan Ɛlifasi bɔnsɔn rɔ Idɔm nyamanɛ rɔ.

¹⁷ Bɔnsɔn-kun-tigi minnu bɔra Isɔla musi Basemati sɔrɛ rɔ, wonu tɔgɛ le kɛnu na, Nehati wo, Sera wo, Sama wo, anubɛ Misa. Kun-tigi le wonu na minnu bɔra Isɔla dan Ruwɛli bɔnsɔn rɔ Idɔm nyamanɛ rɔ.

¹⁸ Bɔnsɔn-kun-tigi minnu bɔra Enala dunmusi Oholibama sɔrɛ rɔ, wonu tɔgɛ le kɛnu na, Yewusi wo, Yalam wo, anubɛ Kora.

¹⁹ Kun-tigi le wonu na minnu bɔra Isɔ bɔnsɔn rɔ.

Siyiri Bɔnsɔn Idɔm Nyamanɛ La

^20-22 Isɔ ya Idɔm nyamanɛ wo duguran minnu taran nyɔ, wonu benba tɔgɛ le Siyiri. Siyiri wo ya den-kei mɔgɔ wɔrɔnfila sɔrɔn. Wonu tɔgɛ le Lotan wo, Sobali wo, Sibiyɔn wo, Ena wo, Dison wo, Ɛsɛri wo, Disan wo, anubɛ anu tirisan-musi Timina. Anu benba tɔgɛ le Hora. Lotan wo ya den-kei mɔgɔ fila sɔrɔn. Wonu tɔgɛ le Hori anubɛ Himam.

²³ Siyirila den Sobali wo ya den-kei mɔgɔ loli sɔrɔn. Wonu tɔgɛ le Alifan wo, Manahati wo, Ibali wo, Sɛfo wo, anubɛ Onam.

²⁴ Siyirila den Sibiyɔn wo ya den-kei mɔgɔ fila sɔrɔn. Anu tɔgɛ le Aya anubɛ Ena. Ena wo ye a fa Sibiyɔnna sofɛlɛnu de-nyinina wulɛ rɔ tumɛ min, ale le fɔlɔfɔlɔn ya tenke-yi-kaliyanɛ yen nyɔ.

²⁵ Siyirila den Ena wo ya den mɔgɔ fila sɔrɔn. A keimɛ tɔgɛ le Dison. A musumɛ tɔgɛ le Oholibama.

²⁶ Siyirila den Dison wo ya den-kei mɔgɔ nani sɔrɔn. Wonu tɔgɛ le Himadan wo, Ɛsiban wo, Itiran wo, anubɛ Keran.

²⁷ Siyirila den Ɛsɛri wo ya den-kei mɔgɔ sawa sɔrɔn. Wonu tɔgɛ le Bilihan wo, Safan wo, anubɛ Akan.

²⁸ Siyirila den Disan wo ya den-kei mɔgɔ fila sɔrɔn. Wonu tɔgɛ le Yusi anubɛ Aran.

^29-30 Horanuna kebila-kunyɛnu le kɛnu na iko anu siginɛ nya min Idɔm nyamanɛ rɔ, Lotan wo, Sobali wo, Sibiyɔn wo, Ana wo, Dison wo, Ɛsɛri wo, anubɛ Disan.

Idɔm Mansɛnu Bara-Koe

³¹ Mansɛ le kɛnu na minnu ya mansayɛ kɛ Idɔm nyamanɛ kun na yanni Isirɛla mɔgɛnu ni anuta mansaya-koe dabira Isirɛla nyamanɛ rɔ.

³² Beyorila dan Bela le fɔlɔn sigira mansayɛ la Idɔm nyamanɛ rɔ. A sigira Dini-Haba soe burɔ.

³³ Bela tenbira tumɛ min, Serala den Yobabu wo sigira a gbɛ rɔ. Wo sigira Bɔsira soe burɔ.

³⁴ Yobabu tenbira tumɛ min, Husihama min bɔra Timannuna nyamanɛ rɔ, wo sigira a gbɛ rɔ.

³⁵ Husihama tenbira tumɛ min, Bedadila den Hedadi min ya Midiyannu kɛlɛ ka anu nɔ Mohabu nyamanɛ rɔ, wo sigira a gbɛ rɔ. A sigira Afiti soe burɔ.

³⁶ Hedadi tenbira tumɛ min, Masireka kɛ Samila wo sigira a gbɛ rɔ.

³⁷ Samila tenbira tumɛ min, Sala sigira a gbɛ rɔ. Wo sigira Rihoboti soe burɔ min bi ba-dɛ la.

³⁸ Sala tenbira tumɛ min, Akiborila den Beyali-Hanan sigira a gbɛ rɔ.

³⁹ Beyali-Hanan tenbira tumɛ min, Hadari sigira wo gbɛ rɔ. A sigira Pawo soe burɔ. Ala musi tɔgɛ le Mahatabɛli. Wo na tɔgɛ le Matiredi. A mama min ya a na sɔrɔn, wo tɔgɛ le Mesahabi.

⁴⁰ Bɔnsɔn kunyɛ minnu bɔra Isɔ rɔ, wonu tɔgɛ le kɛnu na, Timina wo, Alifa wo, Yetɛti wo,

⁴¹ Oholibama wo, Ila wo, Pinoni wo,

⁴² Kenasi wo, Timan wo, Mibisari wo,

⁴³ Magidiyɛli wo anubɛ Iram. Kɛnu denu tɔgɛ sara anu sigi tinɛnu kuma.