Ko-Dabirɛnu 32 - ALLALA KUMƐ

Yakoba ya A Rabɛn A Kɔrɔ Isɔ Taran-Koe La

¹ Yakoba tamatoe a warɛ, Allata melikanu ya a labɛn.

² Yakoba ya anu yen tumɛ min, a ko, “Allata daga makɛ tinɛ le kɛ la.” Woletɔ a ya kan tinɛ wo tɔgɔ sa ko, “Daga Makɛ Tina Fila.”

³ Yakoba ya kilayɛnu nata a yarɔ a kɔrɔ-kei Isɔ ma Idɔm nyamanɛ rɔ.

⁴ A ya a fɔ ala kilayɛnu ye ko, “Wo ni a fɔ n tigi Isɔ ye ko nde, ala wɔli-kɛlɛ Yakoba kan le kɛ la ko n bara ta mɛ ma berin Leban barɛ Mɛsopotemiya nyamanɛ rɔ.

⁵ A fɔ a ye fanan ko yɔɔn siyaman bi n bolo anubɛ kolo-fannu. Baa wo, saga wo, ninki wo, sofɛlɛ wo, wonu bi n bolo duk! N bi wole, nna kilayɛnu natala a ma alako n bara-koe ni diya a ye.”

⁶ Kilayɛnu sɛgira Yakoba wara ka a fɔ a ye ko, “Ma ara ta a fɔ i kɔrɔ-kei Isɔ ye. Anubɛ kei mɔgɔ kɛmɛ nani ye nala i labɛn tinɛ.”

⁷ Hɔnyɛ sigira Yakoba kan la, woletɔ a ya a bolo-fannu tafara sigi tina fila la, mɔgɔni-gbu wo, kolo-fen wo, anubɛ nyomɛnu.

⁸ A ya wo ma bawo a ya a miri ko ni Isɔ nara ka kurun kelen kɛlɛ ka wo nɔ, kurɔn doi min bi tola, wonu si anu buri.

⁹ Yakoba ya Alla madiya ko, “E, n benba Iburayimata Alla, n fa Isiyakata Alla, i wɔlɔ matɔlɔ nta madiyalɛ kɛ la. Mari, ile le ya a fɔ n ye ko n ni sɛgi nna mɔgɛnu barɛ nta nyamanɛ kɛ rɔ. Ile le ya a fɔ ko i si koe bɛɛ ma a kilɛ fɛ nde ye ka ko-nyimɛ kɛ n ye.

¹⁰ I wara ko-latelennɛ anubɛ ko-nyimɛ min kɛ n ye, a ma bɛn defan nde ni wonu sɔrɔn. N bi bɔla n barɛ tumɛ min ka Yorodan bɛ tɛgɛ, mabɛ nna kɔrɔ-sɔ-sewuri le dɔrɔn ya bɛ tɛgɛ. Kɔnɔ tabarakala, kaka n bara na kurun filɛ kɛnu na n bolo.

¹¹ N bi i madiyala, Mari, i yandi, n kisi n kɔrɔ Isɔ masibɛ ma kamasɔrɔn n kilannɛ le a la alako a kana mabɛ nna denbayɛnu faga.

¹² Kɔnɔ i ya a fɔ ko i si ko-nyimɛ kɛ n ye serr, ka n bɔnsɔn siyaya iko ba-kɛnkɛn ye nya min.”

^13-15 Wo banda kɛ, nɔnfuli minnu bi Yakoba bolo, a ya a kɔrɔ Isɔ sanba wonu tɔ. A ya baa-musu kɛmɛ fila bi anubɛ baa-kɔrɔn mogan. Wo kɔma, a ya saga-musu kɛmɛ fila bi anubɛ saga-yigi mogan. Wo kɔma fanan, a ya ninki-musu bi-nani bi anubɛ tura tan. Wo kɔma fanan, a ya sofɛli-musuma mogan bi anubɛ a keima tan. A laban, a ya nyomɛ bi-sawa bi minnuna dannu bi anu fɛ. A ya wonu bɔ a rɔ ka wonu ma a kɔrɔ Isɔ sanbɛ la.

¹⁶ A ya wonu fara iko anu su ye nya min. A ya kolo-fen kurun kelen-kelan kɛ bɛɛ don ala wɔli-kɛla kelen-kelan bɛɛ bolo. A ya a fɔ anu ye ko, “Wo ta kɛnu na n kɔrɔ wara. Kɔnɔ wo tenbi tala, wo ni tɛtɛgɛ to kolo-fen-wɔrɛ kɛnu tɛma iko anu su ye nya min.”

¹⁷ Wɔli-kɛlɛ min bi tala ala kolo-fen-kurun fɔlɔtɛ wonu na, Yakoba ya a fɔ wo ye ko, “Ni i bɛnta n kɔrɔ Isɔ la, a ni i manyinika ko, ‘I tigi ye yon na? I ye tala mintɔ? Yontan ye kolo-fan kɛnu na?’

¹⁸ I si a fɔ a ye ko, ‘Ila wɔli-kɛlɛ Yakoba, wo letan le kolo-fan kɛnu na. A ya kɛnu nana ile, a kɔrɔ Isɔ sanbayɛ le la.’ I si a fɔ a ye ko ata wɔli-kɛlɛ Yakoba ye nala kɔma.”

¹⁹ A ya a sara wɔli-kɛla kelen-kelennamɛ-bɛɛ la wo nya na le ko,

²⁰ “Wo dama ni a fɔ a ye ko ata wɔli-kɛla Yakoba ye nala wo kɔma.” Yakoba ya a miri ko, “Tumado n bara sanbɛ minnu nata n kɔrɔ ma n yarɔ, wonu si a ma, a yisi ni kimɛ.”

²¹ Woletɔ a ya a kɔrɔ-sanbɛ wonu sɔ a yarɔ. Ale kira dagɛ rɔ nyɔ.

Yakobala Turuni-Kɛ-Koe Pɛniyɛli Soe Dafɛ

²² Suyi wo nyɛrɛ rɔ, Yakoba ya a lasɔ ka ala musu filɛ anubɛ wonuna solo-dununa filɛ bi. A ya ala den mɔgɔ tan-ni-kelan fanan bi. A ya anu natɛgɛ yi do la min tɔgɛ Yabɔki.

²³ A ban wonu natenbila, a nara to a bolo-fan toenu natɛgɛla yi wo la.

²⁴ Kɔnɔ ale Yakoba tora yi kɔgɔma. Su kelan wo rɔ, a ma mɛ, kei do nara a wara. Anubɛ wo ya turuni-kɛ dabira. Anu kira turunɛ kɛla kudu ha banda-ka-dɛ ma.

²⁵ Kei wo ya a yen min kɛ, a ti ke Yakoba nɔla, a ya Yakoba gbesi a woro-kuri ma. Nyɔ purukuluta anu nyɔgɔn na.

²⁶ Kei wo ko, “N boloka kamasɔrɔn waan ra ye ka tinɛ le.” Kɔnɔ Yakoba ko, “N ti i boloka mumɛ, fɔ i wa duwa n ye.”

²⁷ Kei wo ya Yakoba manyinika ko, “Ile tɔgɛ kama?” A ko, “N tɔgɛ le Yakoba.”

²⁸ Kei wo ya a fɔ a ye ko, “I tɔgɔ ma tun Yakoba. I tɔgɛ le gbɛ Isirɛla bawo wo kɔrɛ le iko mɔgɔ wa a fɔ ko ‘Minnubɛ Alla ya turunɛ kɛ.’ Wobɛ Alla ya turunɛ kɛ anubɛ mɔgɛnu, ado i wara anu nɔ.”

²⁹ Yakoba ya ale fanan manyinika ko, “Ile fanan tɔgɛ kama?” Kei wo ko, “I ye n tɔgɔ lɔn-koe rɔ kama?” A duwara Yakoba ye nyɔ ka a masara a la.

³⁰ Woletɔ Yakoba ya kan tinɛ wo tɔgɔ sa Pɛniyɛli bawo wo kɔrɛ le iko mɔgɔ wa a fɔ ko, “Alla Kolonkɛ.” A ko, “N bara Alla nyɛrɛ kolonkɛ yen n yɛ la kɔnɔ n ma faga.”

³¹ Yanni Yakoba ni bɔ nyɔ tumɛ min, tele ara bɔ a ma. A ye a tonkanna kamasɔrɔn a woro-kuri purukulunɛ anu nyɔgɔn na.

³² Kamasɔrɔn kei wo ya Yakoba gbesi a woro-kuri ma, woletɔ ha bi, soge min bi woro-kuri ma, Isirɛla mɔgɛnu ti sɔn wo dɔn-koe ma.