Ko-Dabirɛnu 30 - ALLALA KUMƐ

¹ Resɛli ya a yen tumɛ min ko a ma dan sɔrɔn Yakoba ye, a ya a kɔrɔ-musi Liya makeliya. A ya a fɔ Yakoba ye ko, “Ni n ma dan sɔrɔn i ye, n bi fagala le.”

² Yakoba diminyara a ma, a ko, “Alla le nde la wa, min bara den-koe tinya i la?”

³ Resɛli ko, “Nta solo-dununɛ Biliha bi ka wo ma ila musi la. Wo ni dan sɔrɔn n ye alako nde fanan ni ma denbaya-tigi la.”

⁴ Resɛli ya ala solo-dununɛ Biliha di ala kei ma. Yakoba ya wo latenbi a kɔma.

⁵ Biliha ya buyi bi ka den-kei sɔrɔn Yakoba ye.

⁶ Resɛli ko, “Alla ara nna kiti tɛgɛ ka ko-latelennɛ kɛ n ye. A ara n kuman-kan fanan namɔɛn ka den-kei di n ma.” Woletɔ a ya wo tɔgɔ sa Dan bawo tɔgɛ wo kɔrɛ le iko mɔgɔ wa a fɔ ko, “Ko-latelennɛ.”

⁷ Resɛlila solo-dununɛ Biliha ya buyi bi tun ka ala den-kei fila nyɔgɛ sɔrɔn Yakoba ye.

⁸ Resɛli ko, “Mabɛ n kɔrɔ-musi ara kɛlɛ kɛ bɛrɛkɛ kɔnɔ nde ara ale nɔ.” Woletɔ Resɛli ya dan wo tɔgɔ sa Nafatali bawo tɔgɛ wo kɔrɛ le iko mɔgɔ wa a fɔ ko, “Kɛlɛ kɛ.”

⁹ Liya ya a lɔn tumɛ min ko ale sa den sɔrɔnna tun, ale fanan ya ala solo-dununɛ Silipa di ala kei Yakoba ma. Wo fanan ya a latenbi a kɔma.

¹⁰ Liyala solo-dununɛ Silipa ya den-kei sɔrɔn Yakoba ye.

¹¹ Liya ya a fɔ ko, “N bara hɛrɛ sɔrɔn.” Woletɔ a ya a tɔgɔ sa Kadi bawo tɔgɛ wo kɔrɛ le iko mɔgɔ wa a fɔ ko, “Hɛrɛ.”

¹² Liyala solo-dununɛ Silipa ya ala den-kei fila nyɔgɛ sɔrɔn Yakoba ye.

¹³ Liya ko, “N sewanɛ kaka. Musinu si n kele ko, ‘Nyagalen.’ ” Woletɔ a ya dan wo tɔgɔ sa Asɛra bawo tɔgɛ wo kɔrɛ le iko mɔgɔ wa a fɔ ko, “Nyagalen.”

¹⁴ Liyala den-kei-sarɛ Rubɛn tara a matagamana sɛnɛ rɔ fui-fen-tɛgɛ-wati rɔ. A ya bagɛ do taran binyɛ rɔ min tɔgɛ mandirɛki. A nara wo do la ka a di a na Liya ma. Resɛli ya wo yen Liya bolo tumɛ min, a ya a madiya alako a ni ala den-keila bɛsɛ wo do di a ma.

¹⁵ Liya ko, “I wara nna kei bi n bolo. Wo ma i wasa? A sɔgɛ ye i la i ni nna den-keila bɛsɛ fanan bi n bolo?” Resɛli ko, “Ni i ya n dɛnbɛ, n ni bɛsɛ wo sɔrɔn, mala kei si ki i warɛ bi.” A ya bɛsɛ wo di a ma.

¹⁶ Yakoba bɔmatoe sɛnɛ rɔ wurɛ la, Liya tara ka a labɛn. A ya a fɔ a ye ko, “I ni ki n bara bi bawo n bara i sinka Resɛli ma nna danla bɛsɛla ko la.” Woletɔ Yakoba kira a wara suyi wo rɔ.

¹⁷ Alla ya Liya kan lamɔɛn. A ya buyi bi ka ala den-kei loli nyɔgɛ sɔrɔn Yakoba ye.

¹⁸ Liya ko, “Alla ara n sarɛ di n ma kamasɔrɔn n bara nna solo-dununɛ di nna kei ma.” Woletɔ a ya dan wo tɔgɔ sa Isakari bawo tɔgɛ wo kɔrɛ le iko mɔgɔ wa a fɔ ko, “Alla ara n sara.”

¹⁹ Liya ya buyi do bi tun ka ala den-kei wɔrɔ nyɔgɛ sɔrɔn Yakoba ye.

²⁰ Liya ko, “Alla ara kɔ-fen-hakikɛ di n ma. Nna kei si n gbiliya gbɛ kamasɔrɔn n bara den mɔgɔ wɔrɔ sɔrɔn a ye.” Woletɔ a ya ala dan wo tɔgɔ sa Sɛbulɔn bawo tɔgɛ wo kɔrɛ le iko mɔgɔ wa a fɔ ko, “Gbiliyɛ.”

²¹ Wo kɔma, Liya ya dunmusi do sɔrɔn. A ya wo tɔgɔ sa Daina.

²² Alla ya a fonde lamiri Resɛli ma ka ala madiyali-kan lamɔɛn. Alla ya tɔn bɔ a la

²³ woletɔ Resɛli ya buyi bi ka den-kei sɔrɔn. A ko, “Alla ara miliyɛ bɔ n kuma.

²⁴ Alamɛ Mari ya den-kei-dogbɛrɛ sa kɛ kuma n ye.” Woletɔ a ya dan wo tɔgɔ sa Yusufu bawo tɔgɛ wo kɔrɛ le iko mɔgɔ wa a fɔ ko, “Do di n ma tun.”

Leban anubɛ Yakoba ya Kewuyɛ Sigi Anu Nyɔgɔn Na

²⁵ Resɛli ya Yusufu sɔrɔn tumɛ min, Yakoba ya a fɔ a berin Leban ye ko, “I yandi, n boloka. N ni ta n fa warɛ.

²⁶ N wɔlita i ye nna musinu anubɛ nna dan minnuna ko la, i ni wonu di n ma. N ni ta kamasɔrɔn n bara wɔli min kɛ i ye, i ya wo lɔn.”

²⁷ Kɔnɔ a berin Leban ya a fɔ a ye ko, “N bara fɔlɔla a lɔnna bolo-tafɛlan rɔ ko Mari ara duwa n ye ilela ko la, woletɔ ni i si sɔn, i yandi, i ni to n fɛ tele fila kɔrɔ.”

²⁸ A ko, “I sarɛ dan-natɛgɛ fɔ n ye. N si wo di i ma.”

²⁹ Yakoba ya a fɔ Leban ye ko, “N bara wɔli min nyɔgɔn kɛ i ye, i ya wo lɔn. Ila kolo-fannu bara sabati n bolo nya min, i ya wo fanan lɔn.

³⁰ Kɔnɔ yanni n ni na yan, kolo-fen siyaman sa i bolo nun, ado kebi n nara, Allata duwɛ tora i kuma. Ila kolo-fannu tora sabatila. N bara n taya i ye nun kɔnɔ kaka, a fisa, n ni n taya n nyɛrɛ ma.”

³¹ Leban ya a fɔ a ye ko, “N si i sara nfen nyɔgɔn na wo rɔ?” Yakoba ko, “Hali i ma n sara. Kɔnɔ n bi ko kelen pe min fɔla i ye, ni i ya wo ma n ye, n si to ila kolo-fannu de-nyinina tun.

³² Ni i si sɔn, n ni ta saga-finyɛnu bɔ ila saga-wɔrɛ rɔ bi, anubɛ baa-pusannu anubɛ baa minnu gbɛ kelen-kelannu bi a rɔ. Wonu ni ma n sarɛ la.

³³ Wo si a ma, yarɔ, i si na nta telenbagayɛ dan-natɛgɛ lɔn. I wa na n sara tinɛ tumɛ min, ni minnu mapusenni ma baanu tɛma anubɛ minnu finni ma sagɛnu tɛma, ni i ya wo do taran n bolo, n bara i kankan wo rɔ.”

³⁴ Leban ya a fɔ a ye ko, “N bara sɔn wo ma. I ni a ma iko i wara a fɔ nya min.”

³⁵ Kɔnɔ wo tele nyɛrɛ rɔ, baa minnu mapusennɛ anubɛ minnu gbɛ kelen-kelannu bi a rɔ, anubɛ saga-finyɛnu, Leban ya wo bɛɛsi bi ala kolo-fannu tɛma wulɔn ka wonu don ala den-keinu bolo.

³⁶ Wonu tara kolo-fan wonu na kan min ka bɔ nyɔ rɔ ka na ke Yakoba sigi tinɛ, tele sawa tagama le wo la. Yakoba tora a berinna kolo-fan toenu de-nyinina.

³⁷ Yakoba ya kɔlɔma-kuran subolo sawa bi, alimɔndi wo, pɔpila wo, pileni wo. A ya wonu gbole donu bɔ anu ma alako anu nyɛgan ni basan a la.

³⁸ A ya kɔlɔma wonu sɔ kolo-fannu min-kɛ tinɛ dafɛ. Anu ba ta anu min tinɛ tumɛ min, anu si yɛlɛ anu nyɔgɔn ma nyɔ.

³⁹ Ni kolo-fan minnu ya buyi bi kɔlɔma wonu kɔrɔ, wonu bi wolonna dan minnu na, wonu manyɛgannɛ iko kɔlɔma wonu.

⁴⁰ Yakoba ya baanu anubɛ sagɛnu fara. A ya ala kolo-fan wonu yɛ bɛn a berin Lebanna kolo-fen-manyɛgannɛ anubɛ a finmɛnu ma. A ya ata kolo-fen-wɔrɛ wo sɔrɔn a berin Leban bolo wo nya le ka atɛnu namara a dan na.

⁴¹ Baa minnu tagbɛlɛ, ni wonu ba wuli yɛlɛla anu nyɔgɔn ma, a si kɔlɔma-nyɛgan wonu bi ka ta wonu sɔ baa wonu yakɔrɔ.

⁴² Ni baa minnu ta ma gbɛlɛ, wonu tenbi anu nyɔgɔn yɛlɛla, a ti sɔn ka kɔlɔma-nyɛgan wonu sɔ anu yakɔrɔ. Wo le ya a ma, Yakoba ya kolo-fan minnu sɔrɔn, wonu tagbɛlɛyara a berinta kolo-fannu ko.

⁴³ Wo le ya a ma, Yakoba mara nɔnfulu-tigi-wɛ la. Yɔɔn siyaman taranta a bolo anubɛ sagɛnu anubɛ baanu, hali nyomɛnu anubɛ sofɛlɛnu.