Ko-Dabirɛnu 3 - ALLALA KUMƐ

¹ Mari Alla ya nima-fan min bɛɛsi dan nun, duguma-fan halli wo bɛɛ ko. Duguma-fan nara ka musi manyinika ko, “Alla le ya a fɔ wo ye nun ko wo kana kɔlɔma-gbɔɛ dɔn nakɔɛ kɛ rɔ, wa? Ile lara wo la?”

² Musi wo ya a fɔ duguma-fan wo ye ko, “Ma si kɔlɔma-gbɔɛ bɛɛsi dɔn de nakɔɛ kɛ rɔ

³ fɔ kɔlɔma min bi nakɔɛ tɛma. Alla ko ma kana wo gbɔɛ dɔn, hali ka ma bole tugu a la. Ni ma ya wo ma, ma si faga.”

⁴ Kɔnɔ duguma-fan wo ya kumɛ wo masɔsɔ, a ko, “Foninyɛ le wo la. Wo ti faga muk!

⁵ Alla ya wo fɔ kamasɔrɔn a ya a lɔn ko wo wa a dɔn tumɛ min, wo si hɛnkili sɔrɔn iko ale Alla ya ko-nyimɛ anubɛ ko-yogomɛ dan-nafarɛ lɔn nya min.”

⁶ Woletɔ musi wo ya bɔra kɔlɔma-gbɔɛ wo la bawo a kin. A dɔn-sɔgɛ ya a bira. A ya a lɔn ko ni a ya a dɔn, a si hɛnkili sɔrɔn. A ya wo gbɔɛ do keri ka a dɔn ka do di ala kei ma. Wo fanan ya do dɔn.

⁷ Anu banta a dɔnna nya min wo, anu ya hɛnkili sɔrɔn anu nyɛrɛ wara-koe ma. Anu nara to a lɔnna ko anu nakolɔn le. Anu ya toro-yanbɛ do keri ka wonu tugun anu nyɔgɔn na. Wo kɔma, anu ya wonu kiri anu na.

⁸ Wurɛ wo la, anu ya Mari Alla na-kan lamɔɛn nakɔɛ rɔ. Woletɔ anu ya anu buri Mari Alla kɔrɔ ka ta anu dogon kɔlɔma-kurinu kɔma.

⁹ Mari Alla ya kei rakele, a ko, “I ye mi?”

¹⁰ Kei ko, “N ya i na-kan le lamɔɛn, ado n bara a lɔn ko n nakolɔn le, woletɔ n kilanta ka ta n dogon.”

¹¹ Alla ko, “Yon ya a fɔ i ye ko i lakolɔn le? N ya i makawandi kɔlɔma-gbɔɛ min bara-koe ma, i wara wo le dɔn, wa?”

¹² Kei wo ko, “I ya musi min di n ma, wo le ya kɔlɔma-gbɔɛ wo di n ma. N ya a dɔn.”

¹³ Mari Alla ya a fɔ musi wo ye ko, “I ya kɛ tɛgɛ nfen ma?” Musi ko, “Duguma-fan le ya n yanfa woletɔ n ya gbɔɛ wo dɔn.”

Mɔgɛnu Danka-Koe Alla Bolo

¹⁴ Woletɔ Mari Alla ya a fɔ duguma-fan wo ye ko, “Bawo i wara ko-yogomɛ kɛ min kɛ, i wara ma dankatoe la gbɛ ka tenbi nima-fan bɛɛsi la. I si i sagan i bu-gbole la. I ti fenfen dɔn i siyi-tele-bɛɛ kɔrɔ ni bɔnkɛ sa min ma.

¹⁵ N si kɛlɛ-nyɔgɔnyɛ ladon wobɛ musi kɛ tɛma. Wo bɔnsɔnnu si to kɛlɛ-nyɔgɔnyɛ wo rɔ. Ile si a tanban boloko-yogomɛ-kɛ kɔnɔ a bɔnsɔn-mɔgɛ do si i kunyɛ ratɛrɛgbɛn.”

¹⁶ Alla ya a fɔ musi wo ye ko, “N si a lagbɛlɛya i kuma den sɔrɔn tinɛ. Hali wo, ila kei-sɔgɛ si taran i la, ado a si kun-tigiyɛ kɛ i kuma.”

¹⁷ Alla ya a fɔ kei fanan ye ko, “N ya a fɔ i ye ko i kana kɔlɔma-gbɔɛ wo dɔn kɔnɔ i wara ila musita kumɛ bira min kɛ ka a dɔn, woletɔ n si tɔrɔyɛ layigi dugi ma ilela ko la. I si i beli-fan sɔrɔn tɔrɔyɛ rɔ i siyi-tele-bɛɛ rɔ.

¹⁸ Wɔnɛ anubɛ binyɛ si fɛrɛn dugi rɔ i kan ma. Fɔ i wa i beli-fan nyini firɛ rɔ.

¹⁹ I ti i beli-fan sɔrɔn ni i ma wusi tirindi. I si to wusi tirindila ha i ni sɛgi bɔnkɛ rɔ tun bawo i bɔra bɔnkɛ le tɔ, ado i ye sɛgila bɔnkɛ le tɔ tun.”

²⁰ Kei wo min tɔgɛ Hadama, a ya ala musi tɔgɔ sa Hawa kamasɔrɔn mɔgɔ nimɛ bɛɛsi na le ale la.

²¹ Wo kɔma, Mari ya Hadama anubɛ ala musi fɛrɛya bɔ gbole la.

²² Wo kɔma Mari Alla ko, “Wo ara a yen, kei ara ma iko male. A ara ko-nyimɛ anubɛ ko-yogomɛ dan-nafarɛ lɔn. Awa, a kana a bole layɛlɛ ka nimaya-kɔlɔma-gbɔɛ kɛ do keri. Ni a ya a dɔn, a kɛndɛ si to dankɛ kɛ kɔrɔ burubukai!”

²³ Woletɔ Mari Alla ya a gben ka a labɔ Idɛn nakɔɛ rɔ alako a ni wɔli dugi rɔ a bɔra kan min.

²⁴ Wo kɔma, fan minnubɛ melika munta, Alla ya wonu nana Idɛn nakɔɛ wo makandan tinɛ tele-bɔɛ wara la. Kɛlɛ-kɛ-faan min bi malanna iko ta-mɛlan, wo ye firifirila nimaya-kɔlɔma warata-kilɛ la.