Ko-Dabirɛnu 28 - ALLALA KUMƐ

¹ Isiyaka ya ala dan Yakoba kele. A nara tumɛ min, a ya a kɔndɔn. Wo kɔma, a ya a makawandi ko, “I kana Kenan kɛnuna dunmusi fenfen furu.

² I ni ta i benba Bɛtuwɛli wara Mɛsopotemiya nyamanɛ rɔ ka i berin Lebanna dunmusi do furu nyɔ.

³ Alamɛ Alla Sɛnbɛ-Bɛɛ-Tigita duwɛ tora i kuma alako i ni yiri boi! Alamɛ i mara bɔnsɔn-kunyɛ la.

⁴ Alamɛ ma fa Iburayimata duwɛ tora wobɛ i bɔnsɔnnu ye. Alla ya lanyiri kiri i benba Iburayima ye nyamanɛ kɛ minna ko la, alamɛ wo mara iletɛ la.”

⁵ Isiyaka ya Yakoba lata. Yakoba tara a berin Leban wara Mɛsopotemiya nyamanɛ rɔ minnubɛ a na Rebɛka sɔrɔnta, Bɛtuwɛli, Aram kɛla dannu, kɔni.

Isɔla Musu Sawa Nyɔgɛ Furu-Koe

^6-9 Isɔ tara a fa kinama Sumanyila warɛ ka wola dunmusi Mahalati furu, Nebayɔti tirisan-musi, kɔni. A ya wo kofu ala Kenan musinu ma minnu bi a bolo nun. Ni i ya a yen Isɔ ya wo ma bawo a ya a lɔn ko a fa ara duwa a dɔgɛ Yakoba ye ka a lata Mɛsopotemiya nyamanɛ rɔ alako a ni ta a na-kelen-nyɔgɔ-dunmusi do furu nyɔ. Wo kɔma, a ara a lɔn fanan a fa anubɛ a na ara a fɔ Yakoba ye ko a kana Kenan kɛnuna dunmusi fenfen furu. A ara a lɔn fanan ko Yakoba ya anuna kumɛ bira ka ta Mɛsopotemiya. Isɔ ya a lɔn ko Kenan kɛnuna dunmusinu ma di a fa Isiyaka ye. Wo le ya a ma, Isɔ tara Sumanyilata dunmusi wo furu.

Yakobala Kiyo-Sa-Koe

¹⁰ Yakoba bɔra Biri-Siba soe burɔ ka Hɛran-so-kilɛ bira.

¹¹ A kera kan tinɛ do rɔ, a kira nyɔ kamasɔrɔn suyi ara ke a ma nyɔ. A ya kuri do bi nyɔ ka a ma a kun-kɔrɔ-sɛ la. A kinɔgɔra.

¹² A ye kinɔgɛ rɔ tumɛ min, a kiyora yɛlɛ-fan do la. A ye bɔla dugi ma ha san ma. Allala melikanu bi yigi-ni-yɛlɛ kɛla a ma.

¹³ Yakoba ya Mari sɔnɛ yen a tɔnkɔn rɔ. Mari ya a fɔ ale Yakoba ye ko, “I fa anubɛ i benba Iburayimata Mari Alla le nde la. I sanɛ dugi min kuma kɛ la, n si wo di wobɛ i bɔnsɔn ma.

¹⁴ I bɔnsɔn si siyaya iko dugi kɛ gbangban ye nya min. I bɔnsɔn si siyaya fanan ka taran duninya-tonko-nanɛ bɛɛ rɔ. Duninya-mɔgɛnu si duwɛ sɔrɔn i bɔnsɔn fɛ.

¹⁵ I tara kan-bo-kan, n si to i fɛ ka i kandan. N si na i la fɔɔ nyamanɛ kɛ rɔ tun. N ti i boloka fɔ n ba n kuman-kan latɔnbagaya.”

¹⁶ Yakoba kundenta, a ko, “Yaga, Mari ye yan nun kɔnɔ n ma wo lɔn?”

¹⁷ A kumakɔra ka a fɔ ko, “Yaga, kan-tina-makawanɛ le kɛ la. Allata bɔn le yan na. Arinyɛnɛ don-dɛ le kɛ la.”

¹⁸ Wo banda kɛ subagɛ ma, Yakoba ya kuru-kundi min ma kun-kɔrɔ-sɛ la, a ya wo bi ka a latelen. A ya tuli labɔn a ma alako ka a dantɛgɛ Alla ma.

¹⁹ A ya kan tinɛ wo tɔgɔ sa Bɛtɛli. Soe wo tɔgɔ-kɔrɛ le nun Lusi.

²⁰ Yakoba ya a dato, a ko, “Ni Alla tora n fɛ ka n kandan nta tagama kɛ rɔ, n ni dɔn-fan anubɛ fɛrɛya-bɔɛ sɔrɔn,

²¹ wo kɔma, n ni sɛgi n fa warɛ yisi-kimɛ rɔ, Mari si ma nta Alla la wo rɔ.

²² N bara kuri kɛ latelen kan min kɛ la, nyɔ si ma Alla madiya tinɛ la. Ni Mari ya fan minnu di n ma, n si wonu yaka bɔ wo rɔ ka a di a ma.”